3
1 Houg su" nghoid yoomo Yuda byumyu" yigi nghi zain byumyu" yi tho' moo ci: noem je nghoid boin:" Nyangnu" da shooyid thang: yham" yoomo ce: akyu" bo?
2 Akyu" gi shoid khang" moo" bo. Xangshid" mo Yuda byumyu" yigi Mangso da" mungdang: ri loem" khoug: boem.
3 Nghoid loug houg: bang: dayham" gi nheigloem: azung" yoomo Mangsoo: we' nheigloem: azung" ein: tid wa la".
4 Gyeing" ga: rigi houg: su" ayo" tid . Byu yug khang" moo" mhoug nghoid loug we' Mangsoo: gi deing: main" wa zi nghoid. Jhoem: mungdang: moo Nang tid to" dang: gi deing byeung" loo wa. Tarha" dang: phyed nyid" ri nang za: oung: loo" wa? ga: lhid" to" ziyo' dakhyoo" ti" nghoid.
5 Nghoid loug we' byu dayham" gi- ngoonu" zei: shoid vhang: khyoo: gi Mangso da deingmain" khyoo: ri gyeung: gyeung: sho' sho' myang loo nhang: zi nghoid la". Ngoonu" ri dam kaid zigi atarha" ein: wigi ngoonu" tid wa la". ( Hidsu" ngoo tid zi gi- byu yi lhoung tid zi yo" dakhyoo" ti" nghoid)
6 Mangsoo: ri atarha" ein: kha: khyo" we' ayo" tid. Gyeing" nyang: Mangsoo: atarha" nghoid rigi he: mougmyid ri khakhyo" tarha" dang: phyed wa la".
7 Gyeing" nyang: Mangso deingmain" khyoo: ri ngoo adeung amain" nghoid loug we' nya: deingmain" khyoo: ri gyeung: gyeung: myang nhang: khyo" wigi Mangso da" myonhoo: phung" yoeb ri je doug bang nhang: la". Ci wim gari ngoo yooboo shoid vhang: su dayug khyo" yooboo dam kaid zi shau" kham ca" wa la".
8 Ge zi bue" loo wa shid re" age moo" ri ngoonu" zei: shang ein: ciwim atid' go". Hidsu" nyang: ngoo tid ga: byu dayham" gi- cang joeb yooboo foin: lho:- ngoo ri juang" yi boem bye:. Houg: bang: gi yooboo dam kham: moin: zi yo" dakhyoo" ti" gyeing" gyeing" nyang: shau" kham: boem wa.
9 Hougsu" nghoid loug we' ngoonu" Yuda byumyu" yi gi- tungbau byumyu" yi da tho' moo cije gi mo, nghoid la". Jege khyoo: ci aboo. Yuda byumyu" we' tungbau byumyu" we' yooboo yoemso khoug: moo danyid da" khyoo: ri nanu" ri ngoo toin" shid bye:.
10 Jhoem: mungdang: moo tid zigi- Mangso shidkhoin" moo deingbyeing" su: dayug we' anyid.
11 Deingmain" tarha" ri si su: we' anyid.
Mangsoo: ri noku su: we' anyid.
12 Byu dangain" mo gi Mangsoo: ri nung phug pyam bye:-
nyangnu" dangain" mo, khyoo: vhang: byug boem bye:.
Ge da" moo" zei su anyid- dayug we' anyid.
13 Nyangnu" da khyung" kang: gi- phang to" da loeb duang: nghoid nyid.
Lhangmyu no, dug- nyangnu" da" nhoid' khoug: moo bo jo,
14 Nyangnu" da nhoid' khoug: gi-
gye" kho" ziyo' nheing" myeing" nheing" thui: yo" byeung" jo.
15 Nyangnu" gi- shid: nhang: wa zi yo" byu kang: ri said wa lo, myab ago".
16 Nyangnu" ju" lo" joyoo khang" moo" moo lhu: shoin' lhu: phyo' zi yo' kougshu: khyoo: za: koid.
17 Nyangnu" gi myenjham" ngei pyo: khyoo: ri ase' boem.
18 Nyangnu" mo: Mangsoo: ri gyoug voem nheigloem: yo' phau" myang: khyoo: abo boem- ga: wigi lhid" to".
19 Tarha" moo bo da" zi dangain" gi tarha" khoug: moo nyid mo shid re" za: danghoid' da" khyoo: byu yi da" kyiyang myeing da" nhoid' joem ri nghoeb' pyam byid: wa zi yo' xangsu: byu dangain" gi Mangso da" tarha" dang: phyed da khyoo: ri kham nhang: wa shid re" nghoid da" zi ri akhid" ngoonu" se boem bye:.
20 Tarha" ri cang lo" khyo" hang" we' Mangso da" shidkhoin" moo deingbyeing" jang" moo ayo" ju. Tarha" gi- nyang: nyang: shoid da" yooboo ri nyang: nyang: si wa shid re" nghoid.
21 Hougsu" nghoid loug akhid" uri- Mangso da" shidkhoin" moo xangsu: byu yi khasu" koid lho: yo" deingbyeing" wa da" khyoo: ri toin" shid too" bye:. Hau: zigi tarha" cang khyoo: khyo" anghoid. He: da" khyoo: ri Moshe da" tarha" yo" lapi: yi da mungdang: gi sagsi kham byid: nyid.
22 Mangso da" shidkhoin" moo byu xangsu: yi gi Khristu Yesu ri loemkhau: khyo" za: deingbyeing" khyoo: yo" lo. Byu gi Mangso shidkhoin" moo Khristu ri loem jeing" mo, dangain" gi dayhang: ti" nghoid.
23 Byu yug khang" moo" gi yooboo yoo" mo, za: nghoid wigi Mangsoo: khyoid yu khyoo: mo ve: gang: lo" byug boem bye:.
24 Xangsu: byu yi ri yooboo mo loid' byoin loo: nhang: da" Khristu Yesu khyo" Mangsoo: gi ce: phoug" asang: da" jeju" jhungshug khyo" wigi xangsu: byu yi ri deing byeung" mo ga: lhoem: kham: yu bye:.
25 Khristu shid: kham: khyoo: khyo" xangsu: byu yi gi yooboo mo yo" loid' loo" wa shid re" Mangsoo: gi hau Aseing ri gung leig xoin" gyeing" khyo" nyang: soin' phyed pyam bye:. Xangsu: byu yi gi Khristu ri loem" jeing" khyoo: khyo" yau: noo yooboo mo yo" loid lo" boem bye:. Mangsoo: gi Khristu ri gungleig xoin" gyeing" ga: soin: pyam da" khyoo: gi nya: shidkhoin" moo xangsu: byu yi deingmain" deingbyeing" mo, agyeing" khyo" khasu" koid lhoem kham: yu da" khyoo: ri toin" shid wa shid re" nghoid. He pyaid he yo, ju" sho' Mangsoo: gi nheigloem: sheing: sheing: zeing: kham nyid lho: byu yi shoid da" yooboo ri we' khyoid pyam byid.
26 Nghoid loug we' akhid" da" pyaid ayo moo Mangsoo: gi nya: deingmain" khyoo: ri toin" shid wa shid re" xangsu: byu yi da yooboo ri xoem" too" bye:. Mangsoo: gi nyang: nya: gung nyang: deingmain" su: nghoid da" khyoo: ri we' Aseing Yesu ri loem" jeing" loo mo dangain" ri deingbyeing" mo, nghoid ein: kham: yu wa da" khyoo: ri we' toin" shid.
27 Houg: yoomo ngoonu" gi ci: phau: khuang cang bo la". Ngoonu" phau: khuang jang: ci ajo, tarha" ri ngoonu" cang yhi: yoomo anghoid. Loem" jeing" khyo" za: danghoid'.
28 Loem" jeing" khyoo: khyo" za Mangso da shidkhoin" moo deingbyeing" khyoo: dayo" yu yoomo toung: to: da: tarha" mo ayo" yu da" khyoo: ngoonu" akhid" se boem bye:.
29 Mangsoo: gi Yuda byumyu" yi da" Mangsoo: za danghoid' la". Tungbau byumyu" yi da" Mangsoo: gi abo nghoid la". Tungbau byumyu" Mangsoo: gyeing" gyeing" nghoid.
30 Mangsoo: gi dayug kyeing" nyid. Nyang: ri loem" jeing" khyoo: ayang: qei yoomo Yuda byumyu" yi ri deing byeung" mo ga: lhoem: kham yu. Hougsu" loem" jeing" da" tungbau byumyu" yi ri we' deingbyeing" mo, ga: lhoem kham yu.
31 Hougsu" nghoid ri ngoo nu" gi loem" jeing" khyoo: khyo" tarha" ri she: lhei" pyam boem wa la". Ashe: lhei" tarha" ri je geing: teing nhang: wa khyoo: nghoid.