COUNG" NGHEI 95
1 Ri" ge'- Mangsoo ri nyhangnu" coung" nghei nyid boem shang.
Nyhang" ri lhoug zung" nyid da" Mangsoo ri
gau yi jihkoin" khoin" shang.
2 Nya: shidkhoin" moo jeju" boin: ziyo' ngoonu" vang yhi: shang-
jihkoin" dang: thui: yo' nyang: ri ngei bu: coung" byid: shang.
3 Khasu" wim gari Aseing gi gyi: thang Mangsoo nghoid lho:
yu phara" yi dangain" tho' mo
gyi myhang: thang da" khokham zeing nghoid.
4 Nyang: gi no, thang da" lug khyug: khoug: mo wigi
myhang: thang da" boem phyoo" tho' moo: ju" sho'
mougmyid gyab, goin" ziri vhoebkhang" nyid su: nghoid.
5 Nyang: gi nyang: phain" so: to" da- panglai: gyid yo'
nyang: gung nyang: alhoo: zhoug to" da" myidjang ri we' vhoebkhang" nyid.
6 Ri" ge'- nyhang" nyang: ri poid thug thug lho:
noku coung" nghei nyid boem shang.
Yha" da" Aseing phain" so: soo: su da" shidkhoin" moo:
poid thoug thug to" boem shang.
7 Nyang: gi: ngoonu" da" Mangsoo nghoid-
nyhang" gi nyang: lhoug zung" goin coung: nyid da byumyu" yi nghoid.
Nyang: lhoug zung" nyid da" yang phung: yi we' nghoid nyid.
Nyang: ce noem tid nyid ziri akhid" nyid" nyang: tam" gyoo: we'.
8 Meriba moo: nyid lid loo bye:
nanu" da" nya: phoug" phyid" yi yhang: ti" we'
Nasa siyoo khoug: moo hau: bidnyid ri nyangnu" koid lid lo yhang: ti" we'
nanu" da" nheigloem: ri athain: nyid loo: goo.
9 Nyangnu" gi nyangnu" da" shid re" ngoo zei: shoug da" moo" zoo" ri
shau" myang boem abye: go:.
Nghoid loug we' ngoo ri hau: joyoo moo jham" ca: yu abye: go.
10 Ngoo gi myid xi: zain' bain sho hau: byumyu" yiri anau, yu" loo.
Nyangnu" gi dang: gye" azung" bang: nghoid goonhung:.
Hau: lho: nyangnu" gi ngoo tid to" da" tarha" joem ri
ngeug pyam bang: nghoid nyid boem ago" ein: ngoo tid bye:.
11 Ngoo gi nheig yoo: nau nyid ziyo'
Nyangnu" ri myenjham" za: shoug" nyid wa shid re"
ngoo byid: wa ein: da" mungdain: khyoo: khanham we'
ayo" vang loo" goo" wa ein: ngoo nheung" too" bye:.