COUNG" NGHEI 94
1 Aseing we" nang gi dam kaid nyid da" Mangsoo nghoid da.
Re" da" nheigloem: nge" lung khyoo: ri toin" shed we'.
2 Nang gi byu nyid moo: nyid bang: ri tarha" dang: phyed su: nghoid.
Too re nghoid boin: lho: phau: khuang nyid bang: ri
yo" yu eung: ziyo' dakhyoo" ti" dam kaid byid: re.
3 Akhyeung" da" byu yigi kha: yo, ju" sho' gau yi nyid goo" wa la".
Aseing we" khanham ju" sho' nyid nyid goo" wa lha".
4 Yooboo shoid gei tab, yen" mo, gi
khayo, ju" sho phau: khuang wigi
yo" nghoid boin: nyid boem wa lha".
5 Aseing we" Nyangnu" gi re" da" byu yiri mhoin' pyam, nyid lho:
nang seung: ci: bye: da" byumyu" yiri
nyangnu" gi doin: zeig zo: nyid boem ago".
6 Nyangnu" gi cougmoo" myhi' yi yo'
coug" zoo: nu" yiri said pyam nyid boem ziyo'
Nyangnu" mungdain: moo: bo nyid da-
tungbau byu yiri we' said pyam nyid boem ago".
7 Nyangnu" tid zigi Aseing gi ngoonu" ri amyang-
Israela da" Mangsoo gi ngoonu" ri ayu" nyid" ga: tid nyid ago".
8 Nga" da" byumyu" yi we"-
nanu" gi khasu" wim wigi phajhi" abo boem ziyo'
akoo" adoug: bui" nau nyid go" lha".
9 Mangsoo gi ngoonu" da" nukhyab' ri phain" so: too" byid: bye:-
nyang: ashoug" gyoo: loo: nyid wa la".
Nyang: gi myojid" ri phain" so: too' byid: bye:-
nyang: gi ayo" myang wa ein: go" la".
10 Nyang: gi byumyu" yiri jhau" byid: nyid.
Nyang: gi nyangnu" ri we' dam akaid wa ein: go" la".
Nyang: gi byu xangsu: dangain" da" jhau" byid: sara: nghoid-
nyang: gi phajhi" aboo su: nghoid lha".
11 Aseing gi nyangnu" ce: noem myid nyid ziri se' nyid
nyang: gi nyangnu" da" myid soin: khyoo: gi
cigyeing" we' anghoid ziri se' nyid.
12 Aseing we" nang khyoo" shed ziyo' nang jhau" byid: tarha" khyoo: moo
cang loo" su: gi khayhi' ngilho' nyid la.
13-14 Aseing gi nya: byumyu" yiri she: pyam, too" wa zi anghoid-
nyang: seung: ci: da" byumyu" yiri du" pyam, too" wa zi anghoid.
15 Tarha" yung moo deingmain" da" khyoo: ri doem myang lo wigi
deingmain" da" byu yi dangain" we'
hau: khyoo: ri bo thoug pang" wa zi nghoid nyid.
16 Akhyeung" bang: ri tu: lhoin" lo" da" uri
kha: yug gi nga" thang: dab, yu" la".
Akhyeing" da" moo" zei: mo, ri thougtheung lo" uri
kha: yug gi nga" thang: dab, yu" la".
17 Aseing ngoo ri apang" thoug nghoid rigi
jham" dung" khe" da" mungdain: khyoo:
myab, myab, ngoo yhe: loo" wa zi nghoid.
18 Ngoo gi jhoid leung lo" nyid bye:- ein: ngoo tid nyid bye:.
Nghoid loug we' Aseing we" nang gi
re" da" athang agoin jhed khyeing: kang: khyeing: yo'
ngoo ri she: yu nyid bye:.
19 Ngoo gi myid myoo: ung: loug zi thoung" shoug" nyid da" uri
nang gi ngoo ri: nheug teung ung: teing byid: ziyo'
gau yi ngei pyoo: nhang: nyid da:.
20 Atarha" da" moo" ri zei: lho:
akyang" byo, da" tarha" agyi yiri
nang gi avhoo: angei nghoid da:.
21 Nyangnu" gi byu yiri akhyeing" ashoeb khyo" soin' lho:
ce" yooboo adab, bang: ri shid: wa dam byid: nyid ago".
22 Nghoid loug we' Aseing gi nga" da" yoem yu jang: nghoid wigi
nga" Mangsoo gi ngoo ri goem loem byid: nyid.
23 Nyang: gi nyangnu" ri tarha" aci: da" moo" zoo" yoomo dam byid: wa ziyo'
nyangnu" da" yooboo joem yoomo nyangnu" ri
lhu: phyo' pyam, byid: wa zi nghoid.
Ngoonu" da" Aseing Mangsoo gi nyangnu" ri
lhu: phyo' lhu: jhoem" pyam wam bye: o".