COUNG" NGHEI 83
1 Mangsoo adei aloeb loo: akoid nyid.
Sam" zoo we' anyid nyid.
2 Yu" we' re" gyivoo joem gi khaid zain: lo nyid ziyo'
nang ri ngheung" nyid mo, doin: lhoem" lo nyid boem abye: go.
3 Nyangnu" gi re" da" byumyu" yiri tu: lhoin" wa shid re"
phajhi" gau" khyoug" go" nyid ziyo'
nang wigi goem loem byid: nyid bang: ri we'
nyangnu" tu: lhoin" wa ga: soin' go" nyid.
4 Nyangnu" gi ri" ge'- nyangnu" da" mungdain: ri
nyhang" lhu: shoin' byid: pyam shang-
Israela byumyu" yigi pyaid moo: too: moo:
to" myhed pyam zi shoug" goo" baja" ga: tid go" nyid boem.
5 Nyangnu" gi nyheung soin' lo" khyoo: ri coem myid veung" boem ziyo'
nang ri tu: lhoin" wa shid re" bidnoem phung daloem: ri
coem shoin" phang to" boem ago".
6 Houg: bang: gi Edom byumyu" yi yo' Ishmela byumyu" yi
Moba byumyu" yi yo' Hagara byumyu" yi
7 Gabala byumyu" yi Amon yo' Amaleg byumyu" yi Philisti yi yo'
Turu byumyu" yi bo boem ago".
8 Loid da" amyed ashen yi nghoid da"
Amon byu yi yo' Moba byu yi shoid mo
Asuri byu yi we' bo jo, abye: go.
9 Kishon gyid zeing yam moo Midian byumyu" Sisera yo' Yabin ri
nang koid yhang: ti" Nyangnu" ri koid pyam we'.
10 Nang gi nyangnu" ri Edora moo: oung: pyam ziyo'
Nyangnu" da" shid: mang joem gi
myidjang moo: boeb leung: yoin" to".
11 Oreb yo' Zeb ri nang koid pyam yhang: ti"
nyangnu" da" vhujhung: yiri we' koid pyam we'.
Zeba yo' Zalmunna ri nang koid pyam yhang: ti"
nyangnu" da" zoug: ludaid dangain" ri we' oung: pyam we'.
12 Nyangnu" tid zigi Mangsoo seung: ci: da" mougmyid ri
ngoonu" gi ngoonu" nya: shid re" yu pyam zi nghoid ga: wigi tid nyid ago".
13 Mangsoo we"- Nyangnu" ri myidzhoo" phei" ri yhang: ti" lhu: sain" pyam wigi
lid moo: dang: lo" da" pheipyang" ri yhang: ti" lhu: tang" pyam we'.
14 Yooyang" no, yoid yoo ri myi: yo' nghe' pyam ziyo' boem ri nge" gyo" pyam da-
siyoo myiyham: joem yhang: ti"
15 re" da" uglid zoo" yo' nyangnu" ri
cang khaid lo" wigi re" da" gye" thain: lid doin: zoo" yo'
nyangnu" ri gyoug nain" nyid nhang: we'.
16 Aseing we' nyangnu" da" myonhoo: joem ri asho' ashid: bui" nhang: lho:
re" da" yoem zeing so, moo" ri nyangnu" xoem" sho' koid we'.
17 Nyangnu" gi pyaid moo: too: moo
soem" joem: lo" ziyo' kyug nhain' da" khyoo: za: thoung" shoug" nyid goo" baja".
Nyangnu" gi sho' thu ziyo' shid: doem: loo" goo" baja".
18 Nang za: Aseing danghoid nyid da" khyoo: yo'
mougmyid gyab goin" jang" moo
myhang: thang su: nghoid nyid khyoo: ri nyangnu" se' yu loo" goo" baja" o".