COUNG" NGHEI 71
1 Aseing we"- goem loem byid: wa shid mo
ngoo re" jang" moo: tain" loo bye:.
Ngoo ri: khanham we' asoem" joem: loo" nhang:.
2 Nang gi deungbyeung" su: nghoid nyid yoomo
ngoo ri pang" thoug lho: khyoid yu we'.
Ngoo mho' thui: ri tam" gyoo: byid: ziyo'
ngoo ri khyoid khyi: yu we'.
3 Nga" da" gau: nyu: nghe: khoug: joyoo yo'
ngoo ri goem loem byid: wa da" gyidab, nghoid.
Yoem bo da" nang gi nga" khoug: loo lug ug yo'
theung shang" joyoo nghoid.
4 Nga" Mangsoo we"- ngoo ri
akhyeing" bang: da" lo, khoug: mo khyoid khyi: yu we'.
Athoug" akhyoug: mo, yo' ashoeb mo, da"
yoem so, khoug: mo ngoo ri khyoid yu we'.
5 Myhang: thang da" Aseing we"- nang moo: ngoo nheug byu nyid.
Ngoo ri: ngi shi" da" ayo, mo wigi
nang moo: za: nghe: khau: nyid bye:.
6 Ngoo gi nga" pyaid goin" nang moo: za: nghe: khau: nyid.
Ngoo khu: lo da" bidnyid mo wigi
nang ngoo ri lhoug zung" goem loem byid: bye:.
Houg: yoomo ngoo gi nang ri: khanham we'
coung" nghei nyid wa nghoid.
7 Nang gi nga" yoem bo da gyivo su" nghoid nyid yoomo
nga" apyaid gi byu myoo" sho' mo, da" shidkhoin" moo
khoo" shid: bue" nyid bye:.
8 Ngoo gi danyid" goin nang ri coung" nghei nyid lho:
re" myonhoo: phung" yoeb ri tid fu" nyid wa nghoid.
9 Akhid" gi ngoo mang: loo" bye: yoomo
ngoo ri angeug pyam.
Akhid" ngoo yoem neung: nyid bye: yoomo
ngoo ri ashe: pyam too".
10 Nga" gyivoo joem gi ngoo ri said pyam nau nyid boem-
Nyangnu" gi ngoo ri thougtheung tu: lhoin" pyam wa shid mo sham: go" nyid boem.
11 Mangsoo gi nyang: ri she: pyam abye:-
nyhang" nya: thang: moo cang yhe: lho: myheug yu boem shang.
Nyang: ri khyoid yu wa byu dayug we'
anyid" ga: wigi nyangnu" tid nyid boem.
12 Mangsoo we"- gye" vi: moo: anyid nyid
nga" Mangsoo we"- ngoo ri pang" yu wa shid mo myab myab ju" ri we' o".
13 Ngoo ri: zain: lo nyid bang: soem" lo" wigi
ngoo ri noo: nhang: wa shid mo yoem kaid nyid bang-
sho thu lho: myonhoo: soem" loo" goo" baja".
14 Nang moo: ngoo khanham we' nheug byu nyid hougsu" nang ri ngoo gi
je" je coung" nghei nyid wa zi nghoid.
15 Re" da" ge lho' khyoo: ri ngoo kho" kyo" nyid wa nghoid.
Ngoo se' gyo: tho' moo dang: kang: je" no, jo.
Nghoid loug we' re" da" khyoid yu khyoo: ri
danyid" goin" ngoo tid kyo" nyid wa.
16 Ngoo gi Aseing da" gyi: myhang: thang da yoem so, ri
coung" byid: wa nghoid.
Re" da" ge lho, khyoo: ri za: ngoo tid fu" nyid wa nghoid.
17 Ngoo ngi shi" da" pyaid mo nyang:- nang gi ngoo ri jhau" byid: abye:.
Re" da" mau" pho" moo" zoo" joem ri akhid" ju" sho' ngoo tid fu" nyid.
18 Akhid" koem gi ngoo mang: loo" bye: ziyo' nga" xam: phyu: loo bye:.
Mangsoo we"- ngoo ri ato" pyam- doem ju" loo wa myid: yam: zo: xeig yiri
re" da" yoem so, ri tid fu" lo" uri ngoo yo' dage" bo nyid we'.
19 Mangsoo we"- re" da" deingmain" da" khyoo: gi
mougkhung: joem moo: myhi: jo.
Nang gi gye" gyi: da" moo" zoo" joem ri zei: bye:.
Nang yo' du su: gooyug dayug we' anyid loo.
20 Nang gi yau: khi" phu" zo: khyoo: yo' gyoug nain" khyoo: ri
nga" tho' moo: thoung" shoug" nhang: nghoid loug we'
Loeb duang: khoug: mo we' nang ngoo ri khyoid yu wa zi nghoid.
21 Nang gi ngoo ri goonham tho' mo wigi
je" gyi: sheung: loo nhang: wa zi nghoid.
Nang gi ngoo ri nheug teung ung: doem teing byid: wa zi nghoid.
22 Ngoo gi nang ri gyeing" gyeing" nyang:-
teing yo' baid coung" byid: wa zi nghoid.
Nga" Mangsoo we"- re" da" nheigloem: zung" khyoo: ri
ngoo coung" byid: nyid wa zi nghoid.
Israela da" gyeung" shang: su: nang ri
ngoo gi teing baid lho: coung" byid: wa.
23 Re" shid mo teing baid uri ngoo gau yi nyho: nyid wa.
Nang gi ngoo ri khyoid yu bye: yoomo
nga" nheigloem: ung: khoug: gung du dangain" yo'
ngoo jikhoin" khoin" nyid wa nghoid.
24 Ngoo ri: noo nhang: wa khyo" yoem kaid nyid bang: gi
soem" joem: lo" lho: wigi asho ashid: zi
shoug" nyid boem bye: yoomo
re" da" deingmain" da" khyoo: ri ngoo danyid" goin" tid fu" nyid wa bye:.