COUNG" NGHEI 68
1 Mangsoo gi to' lo lho: nya: gyivoo joem ri
khaid sain" pyam bye:.
Nyang: ri ngheung" nyid bang: soem" lo" ziyo'
phang: lo" byoug boem abye: go".
2 Myikhoug" thu' bei: lo" yhang: ti"-
nyang: gi nyangnu" ri koin" thu pyam bye:.
Byoomain" gi myikhyoem yam' moo: yau, yu: lo" yhang: ti"
akhyeung" bang: gi Mangso shidkhoin" mo
byo, yoin" lo" byoug ago".
3 Nghoid loug we' deing byeung" bang: gi
gau, yi lho: nya: shidkhoin" moo ngei bu: nyid boem.
4 Mangsoo ri coung" byid: ge'.
Nya: myeing khyang" ri nghei byid: ge'.
Jhoemmoug" tho' moo: zhung: su: shid re" khyoo: nyheing byid: ge'.
Nya: shidkhoin" moo: gau, yi ngei bu: nyid ge'.
5 Mangsoo gi nya: da" gyeung" shang: Noku Yhoem: Moo" khoug: moo: nyid lho:
cougzoo: cougmoo" yiri goin coung: lhoug zung" nyid.
6 Nheug kyoo" nheuggyam wim nyid su: ri nyid wa joyoo yhoem: ri soin byid: nyid wigi
thung: loung" jo, mo, gau yi loid byoin da" akhang"
yo" loo wa shid re" nyang: shu" vhu" she: nyid.
Nghoid loug we' thougtheung gyi koid nyid mo, ri koem gi
kyug kyiri" da" mougmyid moo: shoug" nyid boem wa zi nghoid.
7 Mangsoo we"- re" byumyu" yiri nang shu" vhu" she: lo wigi
siyoo khoug: khyo" shu" phyed lid lo da" uri
8 Mougmyid gi nain" lho: mougkhung: gi moug: ri vo, khyo kaid.
Khasu" wim gari Sina boem da" Mangsoo-
Israela da" Mangsoo ju" gyo" loo yoomo nghoid.
9 Nang gi moug: ri agoin' ayu: vo khyo' kaid wigi
re" da" kyug byug bye: mougmyid ri doem joem: to' loo nhang:.
10 Re" da" mung" byu yigi hau: da" joyoo moo: yhoem: joem gi
asho" ajhen: bang: shid mo nyheung byid: nyid.
11 Aseing gi mungdang: tarha" ri byid: kaid ziyo' myi yi: yi myoo" sho' bang-
hau: lu dang: ri voin, so" yen".
12 ?Khokham yi yo' nyangnu" da" gyiphung yi phang: lo" byoug boem abye:.
Yhoem: moo: nyid da" myiyi: yigi ngei yo' thoeb pyam lho:
dung soo" joem moo: gi sheing: gyeing" yo'
doug bang jo, da" pheing" kyoug" lhoo: lanyhoeb joem ri gam yu ago".
13 (Nyangnu" mo dayham" bang: gi ci: yoomo
meing: zain: nyid da" bidnyid moo yang khyam: joem cang nyid nyid boem la".)
14 Gyi: myhang: da" Mangsoo gi khokham joem ri
Zalmon boem khyoo: kaid sain" kaid uri
nyang: gi hau: joyoo moo gyu: khyoo, nhang: nyid.
15 Bashan boem gi gye" gyi: zi nghoid wigi
boem phyoo" myoo" sho' loem: bo da" boem nghoid nhung.
16 Gyi: myhang: thang boem phyoo" joem mo wigi
Mangsoo nyid wa ga: khyen: yu to" da" boem ri cikoid nang yu" juang" nyid lha".
Aseing gi hau: joyoo moo apyaid atoo: danyid nyid wa zi nghoid.
17 Aseing gi khyeing" moin myo: da yoem: bo da" gyi myang: rheing" joem yo'
Aseing gi Sina boem mo wigi gyeung" shang: joyoo khyoo: gyoo" lo.
18 Gyipui" mo myheug lo da" byu yi myoo" sho' yo'
hau: myhang: da" boem khyoo: nyang: do' lo" nyid.
Nyang: gi tu: lhoin" da" byu yi jang" mo jhungshug joem ri lhoem: yu to".
Aseing Mangsoo gi hau: joyoo moo: danyid nyid wa nghoid.
19 Yha" da" yoovoin' ri nyid" khang" moo" bo voin byid: nyid da-
Aseing ri coung" byid: we'.
Nyang: gi nyhang" ri khyoid yu da" Mangsoo nghoid nyid.
20 Yha" da" Mangsoo gi khyoid yu da" Mangsoo nyang: nghoid bye:.
Nyang: gi Aseing nghoid. Shid: gyoin' noogyoin' mo khyoid khyi: yu da-
yha" Aseing nyang: nghoid bye:.
21 Yooboo khyoo: moo: jhen" yhe: lo" da-
nya: gyivoo joem da" vhuloem ri
Mangsoo gi gyeing" nyang: baid khyoeb pyam byid: wa zi nghoid.
22 Aseing gi ?Re" da" gyivoo joem ri ngoo Bashan mo doem khe: tau" yu wa zi nghoid.
Nammugdara da" no, thang joyoo moo we'
ngoo nyangnu" ri khe tau" yu wa zi nghoid.
23 Hougsu" wigi nyangnu" da" suid" moo nang nang: lid loo" wa ziyo'
re" lakhuid" joem gi vho: myhoo' yo" shug goo" baja"? ga: tid.
24 Mangsoo we"- nga" da" khokham Mangsoo gi
nya: gyeung" shang: da" joyoo khyoo: oung: doid lo" ziyo'
thoid yhe: lo" ziri dangain" mo, coem myang nyid boem.
25 Jikhoin" khoin" bang: gi shid khyoo: yhe: lo" wigi
music phung: gi thang: moo: cang lho:
agung moo: gi jhabceing baid da" zoomyi: yi cang nyid boem.
26 Nya: mung" byu yi da" zoebphung: moo Mangsoo ri coung" byid: we'.
Yaku da" akung: ako' dangain" bang: we" Aseing ri coung" ge'.
27 Zoo thang nghoid da" Benyamin akung: bang: shid khyoo: yhe: lo" lho:
hau: thang: moo: Yuda vhujhung: yi yo' Nyangnu" da" mo, phung: zeing-
Zebulun yo' Nabthali da" vhujhung: yi xo' lho: cang lo" boem wa zi nghoid.
28 Mangsoo we"- ngoonu" ri nang ci: yhung: byid: we' ngoonu" shid re"
nang ri jhungshug re" byid: boem bye:.
29 Yerusalem re" noku yhoem: mo" khoug: moo khokham yigi
nang ri jhungshug re" byid: boem bye:.
30 Gyidpheing" pa: mo kyang: da" gougnyhoug goug: doo: ein: da"
Egutu ri nang gyikoid we'- nujung loo: joem yo'
nyangnu" da" nujung bam: joem ein: da" byumyu" joem gi
nang ri poid thug coem thoug wigi nyangnu" da" ngei thung: ci: lho:
lo pid da" mung" byu yiri lhu: sain" pyam we'.
31 Egutu meing: mo mung" lagyoo: yi ju" re" boem wa. Etiopi byu yi we'
nyangnu" da" lo, tu: lho: Mangsoo ri akyu" mho' boem wa.
32 Moug: gyab, mo mungdain: joem we' Mangsoo ri coung" byid: ge'.
Aseing ri coung" nghei nyid ge'.
33 Goonham gooco' mo wigi Mougkhung: moo: zhoung: jo, su: ri
phung bo da" thui: zeing yo' nyho: kaid da" nya: thui: ri tam" gyoo: ge'.
34 Mangso yoem so, yo' koid da" moo" zoo" ri tid fu" ge'.
Nya: da" myonhoo: phung" yoeb gi Israela byumyu" yi da" atho' moo dajo, jo.
35 Nya: da" gyeung" shang: joyoo mo wigi re" lo da"
Israela Mangsoo gi khayhi' gyeing" gyoug phoug" gi su: nghoid lha".
Nyang: gi nya: mung" byu yiri yoem: vhoo" yo' yoem: so' byid: nyid.
Mangsoo ri coung" nghei nyid ge' o".