COUNG" NGHEI 63
1 Mangsoo we"- nang gi nga" Mangsoo nghoid nyid wigi
ngoo nang ri nheug nge nyid.
Nga" gung goin" nang ri vho: ngei so, kho' nyid.
Kyoug kain" byoug lho: ce" akyu" aboo lo: ziyo'
gyid aboo lo: moug: kyug yhang: ti" nga" nheigloem: soozoo: gi
nang ri gyid su" shed nyid.
2 Gyeung: shang: da" joyoo moo- ngoo nang ri myang nhang: we'.
Nang gi khayhi' yoem: moo" bo nyid ziyo'
myonhoo: phung" yoeb bo nyid ziri we' ngoo ri myang nhang: we'.
3 Re" da" geung: teung jhed khyeing: kang: khyeing: gi
kangso' tho' moo: je ge nyid yoomo
ngoo nang ri coung" nghei nyid.
Re" da" geung: teung jhed khyeing: kang: khyeing: gi
kangso' tho' moo: je ge nyid yoomo ngoo nang ri coung" nghei nyid.
4 Ngoo dadei nyid da" bidnyid bain sho' moo
nang riza: jeju" boin: so" nyid wa nghoid.
Nang ri akyu" mho' da" uri ngoo gi nga" lo, ri tu: too" wa zi nghoid.
5 Nga" da" soozoo: gi cau: main' da" zoo: noem ri shoug" zo: yhang: ti"
nheugshid: zi shoug" wa nghoid wigi
ngoo nang ri coung" nghei da" gau yi jikhoin" joem ri khoin" nyid wa nghoid.
6 Ngoo gi yhoeb yoo tho' moo: leung jo, uri nang ri myid boin: nyid.
Damyen goin" nang ri myid so" nyid.
7 Khasu" wim ga: ri nang gi ngoo ri khanham we' pang" thoug su: nghoid.
Re" da" dung soo" yoeb khoug: moo ngoo gi gau, yi jikhoin" khoin" nyid.
8 Ngoo gi re" jang" moo: byen cang pu" lhang" nyid lho: re" da" lo,
ngoo ri gau: nyu: nhang: nyid.
9 Ngoo ri: said pyam wa shid re" yoem: kaid nyid bang: gi
moovo moug: khyoo: gyoo" lo" boem wa zi nghoid.
10 Nyangnu" gi meing: zain: jang: moo said pyam zi shoug" wa nghoid wigi
Nyangnu" da" gung du: joem ri we' Zeigni joem wigi
phyo' zo: pyam zi shau" boem wa nghoid.
11 Mangsoo gi khokham ri oung: doid lo" khyoo: byid: yoomo
khokham phoo gau yi ngei pyoo: wa zi nghoid.
Mangsoo da" myeing khyang" khoug: moo
dang: theing too" bang- nyang: ri coung" nghei boem wa.
Nghoid loug we' mhau, fain" da" nhoid joem ri koem gi
myhed" pyam byid: zi shau" boem wa zi nghoid.