COUNG" NGHEI 60
1 Mangsoo we"- nang gi: ngoonu" ri ngeug pyam lho: wigi
ngoonu" ri soem" loo" nhang: abye:.
Nang gi ngoonu" ri nheug yoo: bye:
nghoid loug we' akhid" koem gi ngoonu" jhang khyoo: doem lheung: loo re.
2 Nang gi mougmyid ri nain" nhang: lho: hau: ziri nang jab, kho' too" bye:.
Hau: zigi ajab, amoin" bue" loo" yoomo akhid" hau: dam ri ze: gi byid: we'.
3 Nang gi re" byumyu" yiri gyi" sho' phu" zoo: nhang: bye:.
Ngoonu" gi yhid: yed mo, yhang: ti" apyi: afeing: daso" yen".
4 Nang ri gyoug phau" nyid bang: ri phyo' shoin: pyam jang" mo yo" loid loo" wa shid re"
nang gi nyangnu" ri tid poin" tid kyeung" yu" abye:.
5 Nang jheddab da" byumyu" yigi khyoid khyi: yu zi shoug" wa shid re re" da" myonhoo: yoem: vhoo" yo'
ngoonu" ri khyoid yu we' ngoonu" da" akyu" mho' thui: ri tu" byid: we'.
6 Mangsoo gi nya: da" gyeung" shang: joyoo mo wigi
oung: doid lo" jang" moo: ngoo Shekhem ri kho' byid: lho:
Sukhod koolhang ri: we' nga" byumyu" yi da" lo, moo: gam byid: loo: wa nghoid.
7 Gilead yo' Manashe we' nga" moug: zi nghoid bye:.
Ephrim gi: nga" joto' mug nghoid wigi Yuda gi nga" khokham zoug: myeing" lhamdung: nghoid.
8 Nghoid loug we' Hoba rigi nga" khyid: cid" jarung: yhang: ti" ci: wa zi nghoid.
Edom da" atho' moo: we' nga" khyid: baid ri du" ke" too" wa zi nghoid.
Hau: zigi ngoo seung: yu wa ein: da" alhoo: nghoid.
Nga" tho' moo: yo" oung: doid nyho: zheug too" goo" wam: bye: ein: Philisti yi nanu" jho: nyid go" la".
9 Mangsoo we"- hau: geung: teung da" voomoo" khyoo: ngoo ri hang" shu" yhi: wa nghoid lha".
Edom khyoo: ngoo ri hang" shu" yhi: wa lha".
10 Nang gi ngoonu" ri gyeing" gyeing" nyang: she: pyam bye: la".
Ngoonu" da" gyiphung: moo" yo' nang athu yhi: loo: wa ein: la".
11 Gyivoo phoo ri lhoem: thougtheung wa shid re" ngoonu" ri pang" thoug byid: we'.
Byu yi pang" thoug khyoo: gi ce: phoug" adab.
12 Mangsoo gi yha" jhang khyoo: bo yab jo, nghoid rigi
ngoonu" oung: doid lo" khyoo: yo" yu boem wa zi nghoid.
Nyang: gi yha" gyivoo joem ri joem: loo" nhang: pyam wa zi nghoid.