COUNG" NGHEI 135
1 Aseing ri coung" nghei ge' Aseing da" deizoo: yi we"-
nya: myeing khyang" ri coung" byid: we'.
2 Aseing da" yhoem: vang" khoug: yo' ngoonu" da" Noku Yhoem: Moo" khoug: moo
yab jo, da" Aseing deizoo: yi we"- nya: myeing khyang" ri coung" nghei nyid we'.
3 Nyang: gi gi su: nghoid yoomo Aseing ri coung" nghei byid: we'.
Khasu" wim ga: ri nyang: gi nheig se' khyeug su: nghoid yoomo
nya: myeing khyang" ri coung" nghei jihkoin" khoin" nyid we'.
4 Nyang: Yaku ri khyen: yu zigi Israela gi
Aseing nyang: seung: da" byumyu" bue" loo: wa shid re" nghoid.
5 Ngoonu" da" Aseing gi gyi: sheung: nyid wigi
yu phara" joem dangain" tho' moo
je gyi: su: nghoid nyid ziri ngoo se' nyid.
6 Mougkhung: mougdi yo' mougmyid yoosoo" tho' moo: we'
panglai: joem yo' no, thang joyoo khyi khang" moo" moo: we'
nyang: myid vho: khyo" za: dakoid nyid.
7 Nyang: gi mougmyid da" lo" thang joyoo mo wigi uglid yo' jhoemmoug" joem ri ci: lo lho:
uglid shid re" lhab' ri myeug nhang: ziyo'
nya: khoug: lhung mo lid ri phang thu' kaid nyid.
8 Nyang: gi Egutu meing: mo byu yo' gougnyhoug-
zooshid" yi dangain" ziri said pyam bye:.
9 Hau: meing: moo: nyang: gi khokham phoo yo'
nya: zoug: ludaid yi dangain" ziri shen" yhen wa shid re"
alhoo: again joem yo' mau" pho" moo" zoo" joem ri toin" shed bye:.
10 Nyang: gi mungdain: joem myoo" sho' ri phyo' shoin pyam lho:
khoin" so, bo da" khokham joem ri we' said toem" pyam, bye:.
11 Amori yi da" khokham Sihon- Bashan khokham Oga yo' Khanan mung" mo
khokham dangain" ri we' said toem" pyam bye:.
12 Nyang: gi nyangnu" da" mougmyid ri
nya: da" byumyu" yi da" lo, moo: ab byid: pyam bye:.
Nyang: gi hau: mougmyid joem ri Israela byumyu" yi da" lo, moo: byid: too' bye:.
13 Aseing we"- nang gi Mangsoo nghoid ziri
khanham we' tid fu" nyid boem wa zi nghoid wigi
byu ngoug xiyam: dangain" moo: nang ri myid boin: so" nyid boem wa nghoid.
14 Aseing gi nya: byumyu" yiri goem loem byid: nyid wa
nyang: gi nya: deizoo: yi da" atho' moo
nheig khyeug shoomyen: yu wa nghoid.
15 Gootu: byumyu" yi da" Mangsoo joem gi ngei sheing: joem yo' koid to" zi nghoid wigi
hau: zigi byu yi da" lo, yo' koid to" da" soolhoo: joem za: danghoid.
16 Nyangnu" gi nhoid dab, nghoid loug we' ase' meing-
myojid" dab, loug we' myo, amyang boem.
17 Nyangnu" gi nu: khyab nghoid loug we' ashoug" gyo: boem-
Nyangnu" gi so, khyalang" ayo" she: boem nghoid ago".
18 Hau: ziri koid too" mo, yo' nyangnu" ri
loem khoug: bang: dangain" mo, gi
nyangnu" koid da" soolhoo: yhang: ti" bue" lo" byoug boem wa zi nghoid.
19 Israeala byumyu" yi we"- Aseing ri coung" nghei nyid ge'-
Mangso khainjung yi we"- nyang: ri coung" byid: ge'.
20 Levi bi" we"- Aseing ri coung" byid: ge'- nyang: ri coung" pid nyid mo, nanu" dangain"-
nyang: ri coung" nghei we'.
21 Ziun mo wigi we' nya: yhoem: jo, da" Yerusalem mo wigi we' Aseing myeing ri coung" byid: ge'- Aseing ri coung" nghei we'.