1 Nga" da" jheddab byencang" yi we"- he: zigi ngoo nanu" jhang khyoo: eig lheung: ein: lhid" kaid da" mougsoug" nghoid. He: da" mougsoug" eig pug moo nanu" da" young" lho' nheigloem: yo' se' gyoo: wa shid re" vhoo: moo lhid" to" da" khyoo: yi yo' tid poin" tid kyeung" kaid. 2 Gyeungshang: da" lapi: yi shid phyang" tid kyo" to" dang: ri we' nanu" lagyoo: yi da" lo, khyo" wigi khyoid yu da" Aseing tid to" amyeung" dang: joem ri we' ngoo nanu" ri doem myid boin: nhang: nau nyid. 3 Hau: da" lo" thang bidnyid joem moo gi nyang: tu: nya: gungshoo" aco' ajhoid da" nheigloem: vho: khyo" cang wigi kangso dei bang: thu' loo wa ziri dangain" da" shid moo se' too" ge. Nyangnu" gi nanu" ri juang" yi zoore Hau: Aseing doem ju" ri" wa ga: dangsoo" khoin" byid: to" anghoid goo" la". Akhid" nyang: khayoo: lo" lha". 4 Ngoonu" da" phoug" pho gi shid: lid lo" boem bye:. Nghoid loug we' dangain" gi mougmyid ri phain" da" bidnyid mo dakhyoo" ti" da nghoid nyid shi" nhung: lha"� ga: wigi myed: lo boem wa nghoid. 5 Mangsoo gi xangshid" mo wigi mougkhung: mougdi yo' mougmyid yoosoo" ri nya: amyeung" yo' phain" too" bye: ziri we- mougmyid ri gyid khoug: mo wigi gyid yo' khu" thu' yu too" bye: ziri we'. 6 Houg: lho: mougmyid xoung" ri gyid yo' nyang: tigyid shi lhu: phyo' shoin' pyam bye: ziri we' nyangnu" gi payhi: koid to" myhed' pyam boem ago". 7 Nghoid loug we' Mangsoo gi akhid" jo, da" mougkhung: mougdi yo' Mougmyid yoosoo" ri myi: yo' phyo' soin' pyam wa shid re" goonham da" mungdang: yo' nyang: dakhu: shoung: to". Nyangnu" gi Mangsoo: ayo" da" byu yi ri tarha" dang: phyed lho: phyo' soin' pyam wa bidnyid ju" sho' dakhu: myhu: too" shi.

8 Nghoid loug we" jheddab da" byen, cang" yi we' khyoo: dakhaid ri ato" myhed' pyam goo". Aseing shidkhoin" moo bidnyid danyid" yo' zain nyid dakhyeung" gi du go" nyid da. Nya: shidkhoin" moo hau: eig loem: gi dakhyoo" ti" nghoid nyid. 9 Byu dayham: bang: myed ziyo' dakhyoo" ti" Mangsoo gi nyang: dang: soo" khoin" byid: too": bye: ziri cang" zei: pyeung wa shid re" ayo' ri lang" lho: nhe" nyid zi anghoid. Nghoid sho' loug we' byu xangsu: dangain" mo, yau: noo yooboo mo lheung: lo wigi hang" we' byo, lo" zi ashoug" baja" ga: nyang: vho: nyid yoomo nyang: nanu" tho' moo gyi: sheung: da" nheigloem: toin: shed nyid.

10 Hau: Aseing da: bidnyid koem gi- khoug" su: re" yhang: ti: ju" ri wa zi nghoid. Hau: bidnyid moo mougkhung: mougdi gi gye" gyi: myeung' da" thui: zeung' yo' bei: loo" byug wa zi nghoid. Mougkhung: mo bidbang, gung; joem we' myi: nge" kyu" gyo" pyam boem wa zi nghoid. Mougmyid yoosoo" yo' jo, moojo, joem we' bei: lo" byug khare" boem wa zi nghoid. 11 Zi yoo jo, mo: jo, hid: khyo" wigi phyo' shoin' pyam zi dashug" wa nghoid rigi nanu" gi khayhang: te" da" byu yi bui" ca" nyid boem lha". Nanu" da" kangso dei da" khyoo: gi gyeungshang: wigi Mangsoo moo xoin" to' pyam da" kangso dei khyoo: nghoid ca" nyid boem bye:. 12 Nanu" gi Mangso da" bidnyid zeing ri dalang" nyid boem da" khyoo: moo phyed ju" loo: baja" ge thang khyo" yoem: kaid thoug shang" zoore dalang" nyid ge. Hau: bidnyid moo mougkhung: mougdi joem gi nge" kyu" wigi byo, yoin" pyam wa. Mougkhung: mo, bidbang gungdu: joem we' sung ngi" yoomo yau, yu: loo" wa zi nghoid. 13 Nghoid loug we' Ngoonu" gi Mangsoo dangsoo" khoin" byid: too" bye deingbyeing" bang: nyid wa yhoem: ein: da" mougkhung: aseig- myed jang: aseig ri ngoonu" nheig byu dalang" nyid boem.

14 Hougsu" nghoid yoomo nga" byen, cang" yi we' nanu" hau: bidnyid ri lang" nyid da: ayo, moo Mangso shid moo nanu" da" nheigloem: young" lho' lho: wigi yooboo adab boem baja". Nyang: moo ngei pyo: myenjham" nyid boem wa shid re" yoem: goin' sho' yoem: kaid nyid ge. 15 Ngoonu" jheddab da" mangnhung" Polu we' Mangsoo byid: ga" phajhi" juyhi yo' dakhyo": ti" nanu" jhang da" khyoo: mougsoug" lhid" kaid ziyo' dakhyoo: ti" nyha" Mangsoo kham zeung: lho: lang" nyid khyoo: gi nanu" khyoid yu zi shau" wa shid re" akhang" byid: ziri myang se' nyid ge. 16 Polu gi he: khyoo: yo' sen: lho: nyang: lhid" da" mougsoug" jhoem moo houg yo' dakhyoo" ti" lhid" shed nyid. Nya: mougsoug" moo bo da" akhyoo" dayham" gi se' gyoo: wa zi yug; yoo mo akoo" afang: bang: yo' nheigloem: khyeing" khyang: awim bang: gi shoid vang ago" khyo" dangkang: phoid: yu ago". Gootu: da" Jhoem: mungdang: ri we' hougsu" shoid yoomo nyangnu" da" byo, yoin � lo" khyoo: ri nyangnu" nyang: koid yu boem ago".

17 Nghoid loug we' byencang" yi we"- nanu" gi he: da" khyoo: ri se' nyid gu nghoid abye: go". Hougsu" nghoid yoomo nanu" gi ce: tarha" abo da" bang: shoid vhang: lo" da" khyoo: moo shu" vhang: lo" jang" moo abo loo" wa ziyo' gau: nyu: da" kangso' dei khyoo: mo abyid: gyoo" loo" wa shid re" zid" nyid ge. 18 Nanu" gi; ngoo nu" da" khyoid yu Aseing Yesu Khristu da" jeju" yo' nyang: ri se' lo khyoo: moo je wigi gyi: xo' lho geingteing loo goo" baja"- akhid" nghoid loug we' apyaid atoo: moo ju" sho' nghoid loug we' Yesu Khristu jhang moo myonhoo: phung" yoeb gi dajo, jo, baja" o". A men