1 Lid: loo" bye: da" ayo' moo byu yi jhang moo mhau' da" lapi: yi thu' lo boem ziyo' dakhyoo" ti" nanu" jhang moo we' mhau' da" sara yi thu' loo boem nghoid. Nyangnu" gi lhu: phyo' lhu: shoin khyoo: adeung amain" jhau" shed da" khyoo: joem ri shu" vang lo wigi nyang: tu: nyang: ri khyen: yu bye: da" Aseing ri ngeug pyam boem wa zi nghoid. Hougsu" koid yoomo nyangnu" gi nyangnu" da" atho' moo byo, lo" khyoo: gi myab myab, ju" loo nhang: boem wa zi nghoid. 2 Hougsu" danghoid sho' loug we' byu myoo" sho' bang: gi nyangnu" da" age aved asam" khyoo: moo bo cang lo" boem wa zi nghoid. Nyangnu" houg: su" koid boem yoomo hau: deingmain" da" akhyoo" ri byu gooji bang: gi age khyoo" gei sang: juang" yi pyam boem wa nghoid. 3 He: da" mhau' sara yi gi- nyangnu" da" vhoo: boo myo, no' da" nheigloem: yo' nyheung' phain" yu da" mhoomyid: joem ri tid kyo" zoore amyaid sho: lo boem wa nghoid. Goonham, mo wigi nyangnu" ri dang: phyed said pyam wa da" tarha" agyi phoo' gi jen" nyid gu: nghoid ziyo' nyangnu" ri lhu: phyo' lhu: shoin' pyam wa su: gi- yhoeb' nau lho: yhoeb' nghui" nghue" nyid zi anghoid.

4 Mangsoo gi yooboo koid da" moug: lagyoo: yi rilang" gi khyam" sa: abyid: loo: za: moovoo moug: khyoo: khyo' pyam lho: wigi hau: joyoo mo mougcoid khoug: moo myeug" tei" to" wigi tarha" dang: phyed wa da" bidnyid ri dalang" nyid nhang. 5 Mangsoo gi goolheung: mo da" mougmyid byu xangsu yi ri we' khyamsa: abyid: loo: za: tarha" aphau" cang da" mougmyid byu xangsu: yi da" mougmyid ri tigyid shi pyam bye:. Deingbyeing" khyoo: ri tid kyoo" su: Noa yo" gootu: byu nyhed' yug ri za nyang: khyoid yu bye:. 6 Mangsoo gi Sodom yo' Gomora eig voo ri we' myi: nghe' shoin pyam wigi tarha" anau cang bang: moo khasu" bue" loo: wa da" akhyoo" again daloem: ri toin" shid too" bye:. 7 Nyang: gi tarha" aci: aved asam" byo, nyid da" byu yi yoomo nheigloem: gye" byo, nyid bye da" byu ri za: nyang: khyoid yu bye:. 8 Hau: deingbyeing" da" byu gi nyangnu" da" akhoug: moo nyid nyid shi" uri nyid" khang" moo" nyangnu" nya: da" akhyeung" ashoeb da" moozoo" ri bo myang bo shau" gyo: nyid yoomo nheigloem: moo atho tid loo sho' yaukhi" kyikhyeig shau" nyid. 9 Hougsu" nghoid yoomo Mangsoo gi- tarha" phau" cang nyid bang: ri nyangnu" thoung" shau" nyid da" jham" ca: da" akoug: mo wigi- khakhyo" khyoid yu wa ziyo' akhyeung" ashoeb bang: ri tarha" dang: phyed da" bidnyid ju" sho' khakhyo" wigi shen" yhen' wa khyoo: ri we' nyang: se' nyid. 10 Je" wigi gungshoo" da" aco' ajhoid- nyam, da" khyoo: mo: zheung: cang nyid boem wigi Mangso da" amyeung" akhang" ri aphoug" akhyoid koid nyid bang: gi houg: yhang: te" khyoo: deing" deing shug wa zi nghoid.

He: da" mhau' sara yi gi gye" ngi thu' boem wigi- nghoidboin: boem ziyo' tho' phung" yoeb boo bang: ri phau" myang: khyoo: atoin" loo: za: nyangnu" ri juang" yi gei sang: boem da. 11 He: da" mhau' yen" sara yi tho' moo- yoem: je bo da" mougkhung: lagyoo: yi lang" Aseing da" shid moo nyangnu" ri rue" juang" yi ziyo' yooboo foin: khyoo: akoid yu". 12 Nghoid loug we' he: da" byu yi gi kuang myheug yu lho:- said pyam wa shid re" nyid yen" da" gougnyhoug lam: joem yhang: ti" nyangnu" lang" ase' da" khyoo: ri ung: khoug: nheigloem: yo' juang" yi rue" nyid moo" zei: ago". Nyangnu" gi kyang: da" gougnyhoug lam" joem ri yhang: ti" lhu: phyo' lhu: shoin' pyam zi shau" boem wa nghoid. 13 Nyangnu" gi sabi" ri thoung" shau" nhang: da" kyikhyeug sho" jhen: khyoo: gi nyangnu" nyang: moo we' latoo: doem phug zi shau" zo: boem wa nghoid. Nyangnu" gi bidnyid" dang: gung rilang" nyangnu" da" gungshoo" nheigloem: yoo: bei: wa shid re" nyangnu" nheug shid: jang: koid ago". Nyangnu" yo' dage" zo: shug mo, phung: moo dage" yhe: vang boo yoomo nyangnu shid re" asho' ashid: ziyo' myonhoo: ngilang: gyoeb khyoo: bue" nhang: nyid. Nyangnu" gi khanham fain" vo, khyoo: moo gye" pyoo: thui: gyo: boem. 14 Nyangnu" gi gootu: ce" ja: ri we' ayu" noug nghoid ago". Myid nheigloem: byo, ci: da" myiyi: yi riza: date: yu" nau ago". Nyangnu" yooboo koid lho: yo" shau" kham: yu da" myo' no, khyoo: gi atho' thang nghoid ago". Nyangnu" gi loemkhau: khyoo: moo yoem: nu: bang: ri nyangnu" da" lhid moo myhi" sho' yo" mhe' yu ago". Nyangnu" da" nheigloem: emyed joem ri aco' ajhoid khyoo: moo vhoo: boo myono, loo wa shid re" zei: zhang: nhang: nyid boem. Nyangnu" ri gi Mangso tarha" dang: phyed nheung" khoin" zang" nyid boem abye: go". 15 Nyangnu" gi dain: da" khyoo" ri too" pyam lho: khyoo: vhang" lo" boem abye:. Nyangnu" gi Beora da" nya: zoo: Balam cang da" khyoo: moo cang lo" byug boem abye: go". Balam gi adeung amain" da" moo" zei: lho: yo" da" ngei ri myo, no, su: nghoid nyid 16 Nyang: gi nyang: zei: da" yooboo yoomo yooboo foin: zi shug bye:. Nya: da" loozei: gi byu thui: khyo" dang: tid lo wigi Lapi: pho da" ko" agyeung" moo" ri no: pyam nhang: bye:.

17 He: da" byu gi kyoug kain" byug bye: gyid bug yo" we' uglid wigi houg tang" yen" da" jhoem: moug" yo" we' du nyid boem. Mangsoo gi nyangnu" shid re" mougcoid no, thang da" jang" moo joyoo daloem: nyheung' too" byid: bye:. 18 Nyangnu" gi shoid vang: khyoo: dam: dam: lo" byu phung: khoug: mo aseig shi" daloid thu' loo bang: ri ce: akyu" abo da" nghoidboin: dang: tid lho gungshoo" aco' ajhoid da" nheigloem: yo' lhoem: tau, yu lho: khyoo shu" vhang: lo" boem. 19 Nyangnu" gi nyangnu" nyang byo yoin" lo" da" aved' asam: yi da" join zheung nghoid wigi gootu: byu yi ri lhoid' pyoin' kaid wa dang: soo" byid: boem ago". Khasu" wim ga: ri nyang nyang ri- ung: sho' vhoeb khang" pyam da" ziyoo join yi: nghoid nyid. 20 Byu yi gi ngoonu" da" khyoid yu Aseing Yesu Khristu ri se' wigi mougmyid mo aco' ajhoid da" yoem: vhoo" khoug: mo loid lo" thang: ri hau: aco' ajhoid khyo: wigi doem oung: pyam zi shau" nghoid rigi Houg: bang: da thang: mo bue" lo akhyoo" gi xangshid" tho' moo je" yau: loo" wa bye:. 21 Deingbyeing" khyoo: ri bain se' yu lho: nyangnu" ri ab byid: too" bye:- hau: gyeungshang: da" amyeung" mungdang: mo ve: gang: loo" wa tho' moo hau: khyoo: ri dajhi' we' asi loo: nyid rigi je ge nyid. 22 �Lakhuid" gi nyang: doug boem to" zi doem geug zo:. Hau: lho: vu, gi bain cid" byid: thang: ri thoem" boeb, moo doem lhu" nyid� ga: da" dang: zhoem gi nanu" shid re" deung" nyid zi nghoid.