6
1 Aseing gi Moshe ri
2 Vhoo: moo: lhid" to" da" pyeing: dang: joem ri Israela byumyu" yiri byid: wa shid" re" amyeing" byid: da:. Yuggi nghoid nghoid myiyi: nghoid nghoid dayug yug gi Naziri bui" wa shid re" gooki' lid jham' tang: to" wigi Aseing ri nyang: nya: gung shugbyid: too" yug hang" nghoid loug we'
3 Ref 6.3: Luk 1.15. zabyid yhid: yo' yhid shed ri jang" pyam wa nghoid ago". Nyang: gi zabyid shi" yo' koid to" da" cite" shug ja: ri we' age shug. Cite" zabyid shi" anghoid lang" zabyid shikyug ri we' age zoo wa nghoid da:.
4 Nyang: Naziri danghoid nyid nyid gi zabyid nei mo ce: ja: ri we' age zoo: zabyid jid" yo' zabyid koug rilang" age zoo: nghoid da:.
5 Nyang: gi Naziri koid wa jham' tang: to" da" akhoug: moo: danyid nyid gi nyang: gi nya: xam: ri nyham" we' age nyham"- yed we' age yed pyam wa nghoid. Nyang: gi nya: gung ri Aseing jang" moo shugbyid: to" da" ayo, byeung" sho' shid re" jham' tang: to" wigi vang: too" shau" da:. Houg: yoomo nyang: gi nya: xam: ri yug jo, nhang: wa zi nghoid.
6-7 Nya: xam: gi Mangsoo ri nya: gung ri shugbyid: da" asoo" nghoid da:. Houg: yoomo nyang: gi shid: mang nam khyoo: tab yhe: da" khyo" nyang: nya: gung ri ayung" alho' age bui" nhang: nghoid da:. Nya: phoo nya: myhi' nya: nhung" nya: nhammoo" yi shid: mang wigi lang" anyhoin: athung" age bui" nhang: nghoid da:.
8 Nyang: Naziri danghoid nyid nyid gi nyang: gi Aseing ri shugbyid: too" shoug" su: nghoid da:.
9 Naziri koid wigi shugbyid: to" da" xam: ri nya: nam mo byu dayug yug nyeigdain tung" shid: wigi anyhoin: athung" bui" nhang: nghoid rigi nyang: gi nyhed nyid" lang" nyid lho: hau: thang: ri nya: xam: ri phyed pyam wa zi nghoid. Houg: lang" nyang: gi thung" khyo" younglho' yug bue" loo wa.
10 Shed nyid" ein: nyid" ri nyang: gi pheing" kyoug" eig du: anghoid lang" jid: u: ngho' eig du: ri Aseing da" Zoem" khoem" duang: moo khainjung phoo jang" khyoo: ci yhi: wa zi nghoid.
11 Khainjung phoo gi dadu: ri yooboo khyoid xoin" khyo" gootu: dadu: rigi nghe' ngei" xoin" khyo" ngei" byid: wigi nyang: gi shid: mang yo' xo' tei" goo" lho: ayung" alho' bue" da" shid re" thung" khyo" younglho' pyam khyoo: ri koid wa zi nghoid. Hau: nyid" mo byu hau: yug gi nya: xam: ri doem kyeing shang: byid: wigi
12 Naziri dayug khyo" Aseing ri nyang: ayo" doem shugbyid: wa zi nghoid. Kyeing shang: bye: da" nya: xam: gi anyhoin: athung" bui" pyam bye: yoomo lid loo" da" ayo, ri age soin: nghoid da:. Nyang: gi jhen: xab byid: da" xoin" khyo" dazain byeung" da" yang nu" dadu: ri ci: yhi: wa zi nghoid.
13 Naziri koid yug gi nyang: jham' tang: ziri bain koid pyam lang" nyang: gi thung" yo' sen ziri koid wa nghoid. Nyang: gi Zoem" khoem" duang: khyoo: yhe: wigi
14 ce: dam abo da" gougnyhoug soem" du: Aseing ri shugbyid: wa zi nghoid. Hau: joem gi nghe' ngei" wa shid re" dazain byeung" da" yang loo: dadu: yooboo khyoid xoin" khyo" dazain byeung" yang moo" dadu:- zoem" khau: xoin" shid re" yang loo: dadu: nghoid ago".
15 Nyang: gi doocid" akaid da" zooyho' dagyoin ri we' ngei" byid: wa zi nghoid. Hau: joem gi cen: moin" phei" yo' zhainloin: xu: lheug lho: koid to" da" zooyho' pyi" joem zhainloin: xu: joid to" da" zooyho' joem yo' shivoo: xoin" yo' zabyid yhid: xoin" joem nghoid da:.
16 Khainjung phoo gi hau: gu: dangain" ri Aseing jhang shugbyid: wigi yooboo khyoid xoin" yo' nghe' ngei" xoin" ri shugbyid: wa zi nghoid.
17 Nyang: gi zoem" khoug: da" xoin" khyo" Aseing ri yang loo: xoin" ngei" byid: wigi hau: ziri zooyho' gyoin yo' dage" shugbyid: da:. Nyang: gi shivoo: xoin" yo' zabyid yhid: xoin" ri we' to' byid: da:.
18 Naziri koid yug gi Zoem" khoem" duang: moo nya: xam: ri yug pyam lho: hau: xam: ri Zoem" khau: xoin" nghe" byid da" myi: moo kaid pyam wa zi nghoid.
19 Hau: thang: yang loo: lo, sain: ri bain jhoug lang" khainjung phoo gi hau: ziri yu wigi gyoin, khoug: mo zooyho' daloem: yo' zooyho' dakhyab ri yu wigi hau: zi yo' dage" Naziri koid yug lo, moo: kaid byid: wa zi nghoid.
20 Hau: thang: khainjung phoo gi Aseing ri shugbyid: da" gooki" lid jhungshug khyo" hau: joem ri shugbyid: wa zi nghoid. Tarha" khyo" wigi khainjung seing: da" yang lo: yanggang shoo" yo' bungsain: joem gi khainjung shid re" younglho' da" xoin" joem nghoid nyid. Hau: thang: ri Naziri koid yug gi zabyid yhid: ge shug da:.
21 He: joem gi Naziri yi shid re" thung" tarha" joem nghoid da:. Nghoid loug we' Naziri dayug gi nyang: jham' tang: jang" moo nyang: byid: ca" da" xoin" mo jain" lho: dangsoo" byid: to" nghoid rigi nyang: dangsoo" byid: to" ziyo' toeb byeung" sho' koid ca" da:.
22 Aseing gi Moshe ri
23 Israela byumyu" yiri mainkaid byid: uri vhoo: moo lhid" to" da" dang: khoin" joem ri ci: wa shid re" Arun yo' nya: yuggi zoo: yiri tid kyoo" wa shid re" amyeing" byid: bye:.
24 Aseing gi nanu" ri mainkaid byid: wigi lhoug zung" goin coung: byid: baja".
25 Aseing gi nanu" ri nheig khyeug wigi nheig myen: jeju" byid: baja".
26 Aseing gi nanu" ri myonhoo: byid: yu" coung: wigi nanu" ri myenjham" yug yo zi byid: baja" ein: tid wa zi nghoid.
27 Hau: thang: Aseing gi ?Nyangnu" gi nga" myeing ri Israela byumyu" yi adang moo mainkaid jeju" khyo" tid fu" nghoid rigi ngoo nyangnu" ri mainkaid byid: wa? ga: tid.