5
1 Aseing gi Moshe ri
2 ?Manggam bui" su: gung goin" dam joid joid su:- yo' shid: mang moo: zang" tain" khyo" ayung" alho' da" yugkhang" moo" gi dab mo kho' thu pyam wa shid re" we'
3 Nga" byumyu" yi agyoo: mo ngoo nyid joyoo- dab ri nyangnu" wigi ayung" alho' abui" nhang: goo" wa shid re" hau: thung" khyo" ayung" alho' bue" nyid mo, dangain" ri tunggung khyoo: nhang: thu kaid wa shid re" Israela byumyu" yiri amyeing" byid: we'? ga: tid.
4 Israela byumyu" yigi tid dang: gyo: wigi houg: bang: dangain" ri dab mo kho' thu pyam bye:.
5 Ref 5.5-8: Xng 6.1-7. Aseing gi Moshe ri
6 Israela byu yi shid re" vhoo: moo: tid to" da" pyeing: dang: joem ri byid: bye:. Byu dayug gi Aseing ri dang: azung" ziyo' dayug yug ri shoid vhang: yooboo koid nghoid ri
7 nyang: gi nya: yooboo ri yen: yu lho: nyang: wigi shoid da" yug ri jonu" dangain" moo: shoo: boem 20 ri lung: wigi xab ca" da:.
8 Nghoid loug we' byu hau: yug shid: wigi jhen: xab ziri yu wa da" bidnoem jhang jhang anyid nghoid rigi hau: ziri khainjung shid re" Aseing ri byid: wa zi nghoid da:. Yooboo yoo" su: shid re" thung" khyo" younglho' byid: khyo: koid jang" moo yang loo: ri ci: wigi koid wa zi nghoid.
9 Israela byumyu" yi wigi Aseing ri shugbyid: da" gooki lid pang" thoug jhungshug ja: khang" moo" ri nyangnu" yhe: shugbyid: da" khainjung phoo seing: wa zi nghoid.
10 Khainjung yugkhang" moo" gi nyangnu" ri shugbyid: da" xoin" joem ri seing: wa zi nghoid.
11 Aseing gi Moshe ri
12-14 vhoo: moo: lhid" to" da" pyeing: dang: joem ri Israela byumyu" yiri byid: wa shid re" amyeing" byid: to" da:. Yuggi dayug gi nya: yhoem: seing: myhi' wigi nyang: ri dang: azung" loo: za: gootu: yuggi dayug yo' gung shoo" zoem" khyo" nyang: nya: gung ri ayung" alho' bui" nhang: da: ga: nyang ri aloem" bui" da" khyoo: ge bui" lo da:. Nghoid loug we' nya: yhoem: seing: myhi' gi nyang: shoid nyid ziri azang" myheig- sagse: we' ajo,- hau: khyoo: ri zau" too" yoomo yhoem: seing: phoo gi hau: khyoo: ri goolhoo: ase' zi ge bue" da:. Anghoid lang" yhoem: seing: myhi' gi dang: azung" moo" ri akoid sho' nghoid loug we' yhoem: seing: phoo gi nya: yhoem: seing" myhi' ri aloem" zi ge bue" da:.
15 Ci su" nghoid nghoid yuggi phoo gi nya: yhoem: seing: myhi' ri khainjung phoo jang" khyoo: shu" yhi: wa zi nghoid. Nyang: gi ca" da" ngei" xoin" shid re" yoono, cen: moin" dakyen" jain" ri we' yu ci: yhi: wa. Nghoid loug we' nyang: gi hau: jang" moo zhainloin: xu: yo' nam pyo: ja: ciri: we' age kaid nghoid da:. Ciwim gari hau: zigi deingmain" zi myang thu ri" nhang: wa shid re" yhoem: seing: myhi' ri aloem" da" yhoem: seing: phoo da" xoin" nghoid da:.
16 Khainjung phoo gi hau: myiyi: ri shid khyoo: shu" yhe: wigi phoin: shid vhu" moo: yab jo, nhang: wa zi nghoid da:.
17 Nyang: gi gyeung" shang: da" gyid dayham" ri myid jarung: moo foid kaid wigi Aseing Zoem" phyang" gung mo myidzhoo" dayham" ri yu wigi hau: ziri gyid moo: kaid wa zi nghoid.
18 Hau: thang: nyang: gi hau: myiyi: myhi' da" xam: ri pei: sain" kaid byid: wigi nya: lo, khoug: moo: hau: ngei" xoin" cen: moin" ri kaid byid: wa. Khainjung phoo gi nya: lo, moo: nheing" khoin" zang" nhang: da" gyid khoo" jarung: ri zei: ci: wa zi nghoid.
19 Hau: thang: khainjung phoo gi nyang: tid da" he: jham' tang: dang: ri myiyi: myhi' ri khab yu nhang: wa zi nghoid. Hau: zigi?Nang gi lang do, da" moo" zoo" akoid nghoid rigi he: gyid wigi bui" nhang: da" nheing" khoin" yo' nang ri dam tab wa zi anghoid.
20 Nghoid loug we' nang lang do, moo" zoo" koid nghoid rigi
21 Aseing gi re" byu yi phung: moo: re" myeing ri nheing" khoin" kaid baja". Nyang: gi re" da" myiyi: alhoo: ri kyug zhoin: loo" nhang: wigi re" voem: dau: yam: loo nhang: baja".
22 He: gyid gi re" voem: dau khyoo: vang lo" wigi voem: dau: yam: lo ziyo' re" myiyi: alhoo: we' kyug zhoin: loo" nhang: baja"? ga: zi nghoid.
Myiyi: myhi' gi ?Ngoo myid veing" Aseing hougsu" koid baja"? ga: phug tid wa zi nghoid.
23 Hau: thang: khainjung phoo gi he: nheing" khoin" ri lhid" wigi hau: ziri gyid khoo" jarung khau: moo: cid" zei kaid wa zi nghoid.
24 Khainjung phoo gi nyang: ri gye" khe" noo nhang: da" nheing" khoin" gyid ri ashug nhang: shi" ri
25 hau: myiyi: myhi' da" lo, mo ngei" xoin" cen: moin" ri yu lho: hau: ziri ci: lho: Aseing ri shugbyid: wigi phoin: dang moo: ki" byid: wa zi nghoid.
26 Hau: thang: nyang: gi ngei" xoin" asoo" khyo" houg: mo dazhoeb zhoeb yu lho: phoin: dang moo: nghe' ngei" wa zi nghoid. Lo" thang ri nyang: gi myiyi: myhi' ri shug nhang: wa zi nghoid.
27 Nyang: gi lang do, bye: nghoid rigi hau: gyid gi gye" khe" noo nhang: ri" wa zi nghoid. Nya: voem: dau: gi yam: lo wigi nya: myiyi: alhoo: we' kyug zhoin: loo" wa nghoid. Nya: myeing gi nya: byu phung: moo: nheing" khoin" bue" lo wa.
28 Nghoid loug we' nyang: ce: yooboo ayoo" nghoid rigi ce: dam we' adab wa wigi nyang: gi zoonu" yo" khu: loo wa.
29-30 He: zigi yuggi phoo dayug no" zo wigi nya: yhoem: seing: myi' gi lang do, da" moo" koid bye: ga: aloem" bue" da" khyoo: bue" ri" da" moo" moo ci: da" tarha" nghoid da:. Myiyi: myhi' ri phoin: shid vhu" moo yab jo, nhang: wigi khainjung phoo gi he: thung" yo' sen: da" moo" ri koid wa zi nghoid.
31 Yhoem: seing: phoo gi yooboo mo loid wa zi nghoid. Nghoid loug we' myiyi: myhi' gi yooboo yo" nghoid rigi yooboo aphoug" joem ri kham zoo: ca" wa nghoid.