24
1 Akhid" Balam gi Israela byumyu" yiri nyang: wigi mainkaid byid: wa ziri Aseing vho: nyid khyoo: ri si' yoomo nyang: shid ri koid lid lo yhang: ti" boid phyed wa shid re" ayo" yhi: loo: nghoid da:. Nyang: gi dain" pyoid yoo khyoo: doem tau" wigi
2 Israela byumyu" yi akung: yo' akung: dab koid lho: nyid boem ziri myang. Mangso da" Venyi nyang: ri vhoebkhang" wigi
3 Nyang: gi he: Lapi: dang: ri pi: bye:.
?Beora da" nya: yuggi zoo: Balam da" mungdang:
gyeing: gyeing: za: yo" myang yug da" mungdang: joem.
4 Nyang: gi Mangsoo tid da" dang: ri yo" shau" gyo: yug nghoid.
Ngoo yu" mo, nyid uri yoem: bo thang da" Mangsoo wigi
ci: shug byid: da" avoid daja: ri myang.
5 Israela byumyu" yi da" Zoem" gi yung" da:.
6 Hau: joem gi zhainloin: gam yug jen jo, yhang: ti"
anghoid lang" gyid gyung: yam mo shi" khyam: ti"
Aseing wigi sho" to" da" seig xu: gam ti"
anghoid lang" gyid yam mo shamu gam joem ti" nghoid nyid.
7 Nyangnu" gi moug: gyid agoin ago" yo" ri" goo" wa
nyangnu" da" myau: shi" joem we' gyid gyi: gyi: yo" da" yoothung" joem moo sho" too" goo" wa.
Nyangnu" da" khokham gi Agag tho' je gyi: sheung: loo wa.
Houg: lho: nyang: wigi vhoebkhang" zigi moug: vi: khyoo: lam je: loo" wa.
8 Mangsoo gi nyangnu" ri Egutu mo shu" lo da:.
Nyang: gi nyangnu" shid re" nulam" yhang: ti" gyi koid byid: da:.
Nyangnu" gi nyangnu" da" gyivoo yiri phyo' zo: pyam da:.
Nyangnu" shooyoug: joem ri khyau" pyam lho: nyangnu" da" myoo: khaid joem ri khyau" mhoin pyam ago"
9 Byumyu" gi yoem: so' bo da" khangkhyi yo' du da:.
Hau: khangkhyi yhoeb jo, ri hang" we' avoem" yhe: nhau" nghoid da:.
Israela ri mainkaid byid: su: hang" we' mainkaid byid: zi shoug" wa.
Israela ri nheing" byid: su: hang" we' nheing" zi shoug" wa? ga: pi: bye:.
10 Balag gi nheig yo: ziyo' lo, zhoeb zhoeb ci: lho: Balam ri ?Ngoo gi nang ri nga" gyivoo ri nheing" khoin" kaid byid: wa shid re" khe: zi nghoid. Nghoid loug we' akhid" nang gi hau: gungthid nyangnu" ri soem" lheing: mainkaid byid: bye:.
11 Akhid" yhoem: khyoo: phang: loo" we' nang ri ngoo aphoug" jhungshug byid: wa ein: dangsoo" byid: bye:. Nghoid loug we' nang aphoug" jhungshug ashau" yu wa khyo" Aseing wigi nang ri toem' pyam abye:? ga: tid.
12 Balam gi ?Nga" jang" khyoo: nang nhang: kaid da" lagyoo: yiri ngoo tid kyoo" bye:.
13 Re" da" khokham kho" mo ngei yo' sheing: dangain" ziri ngoo ri byid: nghoid loug nga" myid khyo" cang wigi Aseing pyeing: to" da" ciri we' ngoo ayo" ngeug pyam ein: tid bye:. Ngoo gi Aseing tid we' ga: tid to" gu: ri za: datid wa? ga: tid da:.
14 Balam gi Balag ri ?Akhid" ngoo gi nga" byumyu" yi jhang khyoo: doem phang: loo" wa. Nghoid loug we' ngoo aloo" shi" ri hid: thang: ri re" byumyu" yiri Israela bang: wigi khasu" coem' koid pyam wa ga: ziri tid poin" shi" wa? ga: tid.
15 Hau: thang: he: Lapi: dang: ri nyang: tid bye:.
?Beora nya: yuggi zoo: Balam da" mungdang:
gyeing: gyeing: za: yo" myang yug da" mungdang:
16 Nyang: gi Mangsoo tid da" dang: ri yo" shau" gyo: yug nghoid.
Nyang: gi myhang: thang jang" mo re" da" lasi laleug ri shoug" yu su: nghoid.
Ngoo yu" mo, nyid uri yoem: bo thang da" Mangso wigi ci: shug byid: da" avoid da ja: ri myang.
17 Ngoo gi ju" loo wa da" ayo, khyoo: yu" kaid ri
Israela byumyu" yiri myang.
Bang da" kyi: yhang: ti" khokham dayug hau: byumyu" akhoug: mo nyid thu loo wa.
Nyang: gi kyi: yo' dakhyo" Israela mo nyid thu wa.
Nyang: gi Moba vhujhung: yiri khaid zain: loo wa.
Houg: lho: Shed mo byu dangain" ri baid khyo' pyam ri" wa myang.
18 Nyang: gi Edom mo nya: gyivoo joem ri oung: pyam wa.
Houg: lho: nyangnu" moug: ri nya jonu" khyo" seing: pyam wa
hau: uri Israela gi xo' oung: lo boem wa.
19 Israela byumyu" yigi nyangnu" ri nang: pye" pyam wa.
Houg: lho: nyid deing gyoo" bang: ri jhoid shoem" pyam wa? ga: pe.
20 Hau: thang: nya: myo, myang myang jang" moo: Amaleg byumyu" yiri myang wigi he: lapi: dang: ri tid bye:.
?Amaleg gi byumyu" dangain" moo: yoem: je gyi: thang nghoid ago".
Nghoid loug we' lo" thang moo gi apyaid atoo: doem: byug wa?
21 Nyang: myo, myang myang jang" moo Keni byumyu" yiri myang lho: he lapi: dang: ri tid bye:.
?Nanu" nyid da" joyoo gi gau: goem jo, da" lug pyo' mo myhang: da" joyoo moo:
koid to" da" ngho' soid yo' dayhang: ti" gau: goem nyid.
22 Nghoid loug we' nanu" Keni gi Asuri bang: wigi nanu" ri myheig she: lo" uri
phyo' sain" pyam zi shau" boem wa?
23 Balam he: lapi: dang: ri tid.
?Mougzhung: shoid moo zeing: foem: nyid da" byumyu" yigi kha: bang: nghoid lha".
24 Moug: jhen" jhen" bang: gi Kupru mo gyid lhid yo' ju" lo boem wa.
Nyangnu" gi Asuri yo' Eba ri oung: pyam loo goo" wa.
Nghoid loug we' nyangnu" ri apyaid atoo: moo: doem: lo" byug goo" wa?
25 Hau: thang: Balam gi soin' jen" ci: lho: yhoem: khyoo: tau" loo" bye:. Balag we' nya: khyoo: khyoo: loo" khari" bye:.