11
1 Byumyu" yigi nyangnu" da" yau: khi" yo' sen: wigi Aseing ri khyang" shed shid" lo da:. Nyangnu" da" hau: dang: ri Aseing shoug" gyoo: lang" nyang: nheig yo: wigi byumyu" yi adang moo: myi: nhang: kaid byid: da:. Hau: myi: gi nyangnu" phung: moo: nge" wigi dab dathang: byo, yoin" byug bye:.
2 Byumyu" yigi pang" thoug wa shid re" Moshe ri mho' yoid nyid ago". Nyang: Mangso jang" moo akyu" mho' wigi myi: gi shid: loo" khari" bye:.
3 Houg: yoomo hau: joyoo ri Tabera ga: myheing to". Ciwim ga ri hau: joyoo moo: Aseing myi: gi nyangnu" phung: khoug: moo: ngi" yoomo nghoid.
4 Hougmoo: tungbau byu yigi Israela byu yi yo' dage" gyung: bo so" nyid. Nyangnu" gi shoo" gye" mhain: mo, nghoid. Israela byumyu" yi lang" nyangnu" nyang: myeing" myo: lo boem zigi ?Ngoonu" shoo" dajhi' khyalang" shoug" zoo: yhoo: o".
5 Ngoonu" gi Egutu mung" moo: ce: aphau" abyid: ca" lho: ngoonu" zoo: nau da" wimdo, dangain" ziri lhung zo boem bye:. Ngoonu" lhung zo: da" tung: khoo"- lashau:- fu" moo"- fu" ni- fu" soin: joem ri myid boin: da:.
6 Nghoid loug we' ngoonu" yoem: gi thang byug bye:. Zoo: wa zi we' ciwe' ajo,. Nyid" khang" moo" manna mo jain" wigi gootu: zoo: wa ciwe' ajo,? ga: boem ago".
7 Ref 11:7,8: Thu 16:31. (Manna gi myo, shi" nge ja: yo' du wigi phyu: phyu: boo" boo" wim da" avoid dab da:.
8-9 Hau: zigi dab moo: damyen goin" goin" nghain: yo' dage" gyo" da:. Thang: nab kyoo' byumyu" yigi hau: ziri cang koid: zheing" yen" lho: hau: ziri gyeug lho: anghoid lang" aphei" koid yu wigi hau: thang: hau: ziri jhau' lho: zooyho' koid yu da:. Hau: zooyho' gi zhainloin: xu: yo' koid to" da" zooyho' yo' dakhyoo" ti" nghoid da:.)
10 Moshe gi byumyu" yi dangain" mo, nyangnu" Zoem" khoem" duang: joem moo: yab foem: nyid lho: myeing" myo: nyid boem ziri shau" gyo: da:. Aseing nyangnu" ri nheig yoo: yoomo Moshe nheigloem: thang nyid da:.
11 Nyang: gi Aseing ri ?Nang gi ciwim yoomo ngoo yo' a ngei pyo: la". Nang ngoo ri ciwim yoomo ngei pyo: khyoo: abyid: la". He: byumyu" yi dangain" ri shu" wa shid re" ciwim yoomo nang ngoo ri yoovoin byid: to" la".
12 Ngoo gi nyangnu" ri aphain" so: too"- nyangnu" ri akhu: too". Nyangnu" phoug" phyid" yiri nang dangsoo" byid: to" da" mung" khyoo: yhe: da" gyung khyoo: dangain" moo zoonu" shu" yug yo' dakhyo" koid wigi nyangnu" ri zoonu" ri yhang: ti" nga" lo, moo vu, wa nang ngoo ri ciwim tid eung: la".
13 Ngoo gi he: byumyu" yi dangain" shid re" shoo" tham: sho' kha: mo yoo" wa la". Nyangnu" myeing" myo: wigi ngoo ri shoo" mho' nyid ago".
14 Ngoo nyang: kyeing" he: byumyu" yi dangain" ri yoovoin ayo" yu nghoid da:. Hau: zigi nga" shid re" yoovoin gye" lid: da:.
15 Nang ngoo ri hid: su" koid wa nghoid rigi ngoo ri nheig khyeug wigi said pyam we'. Houg: lang" ngoo gi nang byid: da" yau: khe" kyi" khyeug khyoo: ri azeing: kham: ca" loo: wa? ga: tid.
16 Aseing gi Moshe ri ?Byumyu" yi da" vhu" shi: bang: khyo" koid nyid ein: yo" boin: soo" bang: nghoid da" yuggi nyhed xi: ri zheing" yu wigi nyangnu" ri nga" shidkhoin" Zoem" khyoo: shu" re" lho: hau: jang" moo nyangnu" ri re" ayam moo yab jo, wa shid re" tid we'.
17 Ngoo gyoo" re" wigi hau: joyoo moo: nang yo' dang: tid goo" wa. Nang ri ngoo byid: to" da" Venyi: dayham" ri yu wigi nyangnu" ri byid: wa. Houg: lang" nyangnu" gi he: byumyu" yiri shu" da" yoovoin ri nyangnu" yo" bo voin loo goo" wa. Houg: lang" nang gi hau: yoovoin ri dayug kyeing" avoin vu, ca" loo: wa zi nghoid.
18 Akhid" byu yiri nab yo nyid" shid re" nyang: nya: gung ri younglho' too" ge'. Nanu" shoo" shoug" zoo: goo" wa. Aseing gi nanu" myeing" myo: wigi nanu" zo: yu" da" shoo" ri nanu" zoo: nau ga ziyo' Egutu mung" moo je" shoug" zo: ga: tid thui: ri shau" gyo: abye:. Akhid" Aseing gi nanu" ri shoo" byid: wa ziyo' nanu" hau: shoo" ri shoug" zoo: goo" wa nghoid.
19 Nanu" gi hau: shoo" ri danyid" eig nyid" wim: nyid" daxi: nyid" eig xi: nyid" za: zoo: wa zi anghoid.
20 Nanu" shoo" gyoem: shoem: nam sho' nanu" hau: ziri ngheing" sho' lhammoo" dakhyab goin" zoo: wa zi nghoid. Hid su" bue" zigi he: nanu" phung: moo nyid da" Aseing ri nanu" he: pyam boem ziyo' Egutu mung" mo khanham we' thu' loo wa aeung: zi nghoid ga: Aseing ri myeing" myoo: goo" yoomo nghoid? ga: tid.
21 Moshe gi Aseing ri ?Hid moo: ngoo shu" vhu" nyid da" byu gi 600,000 nghoid. Nang gi nyangnu" ri lhammoo" dakhyab zoo: wa shoo" gi" sho' byid: wa ein: tid rhe".
22 Nyangnu" ri nheugshid: nhang: wa sho' nu: yo' yang joem ri said wigi gi" wa la". Panglai: mo wimdo, dangain" gi nyangnu" shid re" gi" goo" wa la"? ga: tid da:.
23 Aseing gi ?Nga" yoem: so' moo tu ke' to" zi boo wa la". Nang gi amyang" ri ngoo tid to" dang: bue" ri" wa abue" ri" wa ein: ziri myang wa zi nghoid? ga: tid da:.
24 Houg: yoomo Moshe gi thu yhe: lo" wigi Aseing tid da" dang: joem ri byumyu" yiri yhe: tid kyo" da:. Nyang: gi vhu" shi: wa bang: nyhed xi: yug ri khe: zheing" yu wigi nyangnu" ri Zoem" lheing khab moo nyhid: to" da:.
25 Hau: thang: Aseing gi jhoemmoug" mo gyoo" re" wigi nyang: ri dang: re" tid da:. Nyang: gi Moshe ri byid: to" da" Venyi: dayham" ri yu lho: hau: ziri vhu" shi: wa bang: nyhed xi: yug ri byid: bye:. Venyi: nyangnu" adang moo: ju" ri" lang" nyangnu" gi lapi: yo' dayhang: ti" nyho: ago". Nghoid loug amyang" nghoid da:.
26 Vhu" shi: nyhed xi: yug mo eig yug nghoid da" Eldad yo' Medad tang: gi dab moo: nyid nyid ziyo' nya: tang: gi Zoem" khyoo: ayhe: goo" nghoid da:. Hau: dab khoug: moo: Venyi: gyoo" re" wigi nyangnu" we' Lapi: joem yhang: ti" nyho: boem bye:.
27 Zooyam zoo: gi Moshe jang" khyoo: tang" yhe: lho: Eldad yo' Medad eig tang: bue" nyid khyoo: ri yhe: tid kyo" da:.
28 Hau: thang: nyang: zooyam pyaid mo Moshe ri pang" thoug yug nghoid lo da" Num da" nya: yuggi zoo: Yoshu gi thui: zeing yo' Moshe ri ?Nheigboo phoo we" nyangnu" ri toem pyam we'? ga: tid.
29 Moshe phug lho: ?Nga" shid re" nang myid ci' byid: rhe". Aseing gi nya: da" Venyi: ri nya: byumyu" yi dangain" ri kaid byid: wigi nyangnu" dangain" ri lapi: yhang: ti" nyhoo: nhang: wa ziri ngoo vho: ngei nyid? ga: tid.
30 Hau: thang: Moshe yo' Israela byumyu" yi da" vhu" shi: wa bang: nyhed xi: gi dab khyoo: doem tau" loo" bye:.
31 Aseing gi nyeigdain tung" panglai: mo ngho' tu' bo hau' ci: lo da" lid ri nhang: kaid da:. Hau: joem gi myidjang mo soem" pi: myang: jang" khyo" dang: lo da:. Hau: joem gi dab moo: lo lho: shoid khang" moo" khyoo: danyid" so" gyung: khyoo: yhi moo: lo no: nyid ago".
32 Houg: yoomo hau: nyid" danyid" goin"- damyen: goin" hau: thang: nyid" danyid" goin" byumyu" yigi ngho' tu' cang myheig nyid ago". Hang" we' wim: xi: tang mo aneing: loo: za: myheig zheing" yu ago". Nyangnu" gi dab lheing khab hau: ngho' tu' shoo" joem ri lhab' kyug boem ago".
33 Nyangnu" shid re" shoo" zoo: wa zi gye" jo, shi" uri Aseing gi byumyu" yiri nheig yo wigi nyangnu" phung: khoug: khyoo: lang: yoem" nhang: kaid da:.
34 Hau: joyoo ri Kibrod Hatava ga: myheing ago" (mhain: mo, da" loeb boug). Ciwim gari: hau: joyoo moo: shoo" shu: mhain: da" byumyu" yiri myhoeb too" yoomo nghoid.
35 Byumyu" yigi hau: joyoo mo zi Hazerod khyoo: thoid yhe: wigi hougmoo: nyangnu" dab yhe: koid nyid boem ago".