10
1 Aseing gi Moshe ri
2 ?Byumyu" yiri khe: zheing" wa jang" moo we' dab ri phyo' wa jang moo we' ci: wa shid re" ngei laboo" eig loem: koid wa.
3 Hau laboo" eig loem: goin" ri thui: sheing: sho' moid kaid lang" byu phung: zeing gi nga" shidkhoin" Zoem" khoem" duang: yam lheing khab moo: re" zeing: foem: wa zi nghoid.
4 Nghoid loug laboo" daloem: za: moid lang" byukung: byuko' yi da" vhujhung: yi za: lheing khab re" zeing: foem: nyid wa zi nghoid.
5 Thui: leung" leung" za: damoid uri bidthu shoid mo akung: ako' yi thu yhe: loo" wa zi nghoid.
6 Thui: leung" leung" za eig lheing: ein: lheing: doem moid lang" mougpyi: shoid mo akung: ako' yi thu' yhe: loo" wa zi nghoid. Houg: yoomo thui: leung" gi dab phyo' yoeb wa shid re" nghoid.
7 Nghoid loug we' byu phung: ri khe: yu wa shid re" gi thui: sheing: moid wa zi nghoid.
8 Laboo" ri khainjung yi nghoid da" Arun da" nya: yuggi zoo: yi moid wa zi nghoid.
Vhoo: mo tarha" gi ju" loo wa da" ayo, dangain" moo: cang ca" da" tarha" nghoid.
9 Nanu" ri meing: re" zain: da" gyivoo yiri doem phug zain: wigi nanu" nyang: gung ri goem loem yu wa shid re" nanu" meing: moo meing: zain: uri gyipui" asoo" khyo" hau: laboo" joem ri moid wa zi nghoid. Ngoo nanu" Aseing Mangsoo gi nanu" ri pang" thoug byid: wigi nanu" da" gyivoo joem lo, mo nanu" ri khyoid yu byid: wa zi nghoid.
10 Ngei pyo: da" ayo, nghoid da" lhammoo" xain" pui" yo' nanu" da" gootu: Noku thung" pui" joem moo: nanu" da" nghe' ngei" xoin" yo' zoem" khoug: xoin" shugbyid: uri hau: laboo" ri nanu" moid wa zi nghoid. Hau: thang: nanu" ri ngoo pang" thoug yu wa. Ngoo gi nanu" da" Aseing Mangsoo nghoid.
11 Byumyu" yi Egutu mung" mo thu lo thang: eig zain lhammoo" eig khyab eig xi: nyid" ein: nyid" ri Aseing shidkhoin" Zoem" atho' mo jhoemmoug" to' lo" wigi
12 Israela byumyu" yigi Sina dain" pyoid yoo mo nyangnu" gyung: khyoo: ri doem xo' yhe: lo" ago". Jhoemmoug" gi Paran dain" pyoid yoo moo lo" theing: da:.
13 Nyangnu" gi Moshe khyo" wigi Aseing amyeing" byid: da" joyoo khyoo: to' yhe: lo" ago".
14 Nyangnu" to' yhe: lo" khang" moo" nyheing soin to" ziyo' dakhyoo" ti" amyeing" gi daja: za: nghoid da:. Yuda byumyu" yi wigi shu" da" dab dungkhoin: yang: mo mo, gi daphung: thang: daphung: Aminadab nya: yuggi zoo: vhujhung: phoo Noshon yo' dage" xang: shi" so" shid" yhe: lo" boem bye:.
15 Ishakha byumyu" yi da" vhujhung: phoo gi Zua da" nya: zoo: Nethanela nghoid da:.
16 Zebulun byumyu" yi da" vhujhung: phoo gi Helon da" nya: yuggi zoo: Eliaba nghoid da:.
17 Hau: thang: Zoem" ri phyo' yoeb yu lho: hau: ziri vu, bang: nghoid da" Gershon byumyu" kung: yo' Merari byumyu" kung: yi to' loo" goo" wa zi nghoid.
18 Hau: thang: Ruben byumyu" wigi shu" da" dab dungkhoin: yang: mo mo, gi daphung: thang: daphung: Shedura da" nya: yuggi zoo: vhujhung: phoo Elizura yo' to' yhe: lo" ago".
19 Simun akung: yi da" vhujhung: phoo gi Zurishadai da" nya: yuggi zoo: Shelumila nghoid da:.
20 Gad akung: yi da" vhujhung: phoo gi Duela da" nya: yuggi zoo: Eliasab nghoid da:.
21 Hau: thang: Kohad akung: mo Levi byu yigi gyeung" shang: da" ziyoo joem ri vu, wigi to' yhe: lo" ago". Shid' mo dab khyoo: nyangnu" doem ju" lang" Zoem" ri doem zhug to" ago".
22 Hau: thang: Ephrim byumyu" yi wigi shu" da" dab dungkhoin: yang: mo mo, gi daphung: thang: daphung: Amihuda da" nya: yuggi zoo: vhujhung: phoo Elishama yo' dage" to' yhe: lo" ago".
23 Manashe akung: yi da" vhujhung: phoo gi Pedazura da" nya: yuggi zoo: Gamalela nghoid da:.
24 Benyamin akung: yi da" vhujhung: phoo gi Gideoni da" nya: yuggi zoo: Abidan nghoid da:.
25 Lo" thang moo: dab dangain" bang: da" nungthang moo: goem loem byid: mo, khyo" moo" voin boem da" Dan akung: yi shu" da" dab dungkhoin: yang: mo mo, gi daphung: thang: daphung: Amishadai da" nya: yuggi zoo: vhujhung: phoo Ahiza yo' dage" to' yhe: lo" ago".
26 Ashe akung: yi da" vhujhung: phoo gi Okhran da" nya: yuggi zoo: Pagila nghoid da:.
27 Naphtali akung: yi da" vhujhung: phoo gi Enan nya: yuggi zoo: Ahira nghoid da:.
28 Houg: lho: he: zigi Israela byumyu" yi dab ri phyo' yoeb wigi daphung: thang: daphung: to' yhe: loo" khang" moo" cang yhi: wa da" khyoo: joem nghoid da:.
29 Moshe gi Midian byu Yethru da" nya: yuggi zoo: nya: khau: Hoba ri ?Ngoonu" gi Aseing wigi ngoonu" ri byid: wa ga: tid to" da" joyoo khyoo: loo" wa zi nghoid bye:. Nyang: gi Israela byumyu" yiri nyid gi yab gi nhang: wa ga: dangsoo" byid: to" da:. Houg: yoomo ngoonu" yo' cang we' ngoonu" da" jonu" joem ri nang ri gam byid: wa? ga: tid.
30 Hoba gi ?Acang wa. Nga" co' phyed moug: khyoo: doem tau" loo" wa? ga: phug tid.
31 Moshe gi ?Jeju" mo ngoonu" ri atoo" khoo' lhe"- nang gi dain" pyoid yoo moo ngoonu" yo" theing: wa da" joyoo ri nang se' ziyo' nang ngoonu" ri khyoo: yo" shid wa.
32 Nang ngoonu" yo' dage" cang nghoid rigi Aseing wigi ngoonu" ri byid: da" mainkaid jeju" dangain" nang ri yo" gam byid: wa zi nghoid? ga: tid.
33 Byumyu" yigi gyeung" shang: da" Sina Boem mo thu lo" wigi nyangnu" gi soem" nyid" so" yhe: lo" ago". Nyangnu" theing: wa da" joyoo ri myang wa shid re" Aseing da" Dang: Theing Kuid: ri khanham we' nyangnu" shid vhu" moo: yhe: lo" ca" da:.
34 Dab khang" moo" nyangnu" to' yhe: lo" uri Aseing da" jhoemmoug" gi nyid" ri nyangnu" atho' moo: nghoeb byid: da:.
35 Dang: Theing Kuid: thu shid" loo" khang" moo" Moshe gi Aseing we" to' we' re" gyivoo ri khaid sain" pyam lho: nang ri ngheing" da" mo, ri bei: loo" nhang: we' ein: tid wa zi nghoid.
36 Hau: Dang: Theing Kuid: theing: khang" moo" nyang: gi Aseing we" khyeing" khyo: myo: da" Israela ikoin deungkhu: yi jhang khyoo: doem tau" loo we' ein: tid wa zi nghoid.