28
(Mar 16:1-10: Luk 24:1-12: Yoh 20:1-10)
1 Dougno: Bidnyid lid: lo" lho: Labain nyid" nab kyoo myo, yoeb yoeb myang lo da" uri Magadala Mari yo' gootu: Mari eig yug gi loeb koem" yhe: ago".
2 Nyeigdain tung" hau: joyoo moo myid leig leig lo:- Mangso da" moug: lagyoo: gi mougkhung: mo gyoo" lo wigi lugloem: ri tu: phoug pyam lho: hau: da" lugloem: tho' moo zhoung: jo.
3 Nya: da" aved asam" gi lhab su" myeig nyid wigi nya: da" byimi gi gyu: su" bo" bang lho: nyang: thu' re".
4 Zung" nyid da" gyizoo: yi gi atho' tid loo: gyug dain nain" wigi shid: mo yhangti" bue" lo" boem.
5 Hau: moug: lagyoo: gi myiyi: eig yug ri ?Agyug goo"- pyang" zeing moo baid jen said pyam bye da" Yesu ri re" eig yug sho: nyid zi ngoo se.
6 Nyang: gi hid: moo: anyid loo:- nyang: tid ziyo' dakhyoo ti" dei to' loo bye:. Re" yu" ge' nyang: ri kaid to" joyoo ri yu" yu" ge.
7 Nya: cangzoo: yi jhang khyoo myab myab lo" tid kyoo" ge. Nyang: gi shid: jangmo dei loo bye:. Nanu" da" shid moo Galile mung" khyoo: yhe: loo" bye nanu" Aseing yo" houg: moo doem myang goo" wa. Ngoo nanu" ri tid da" dang: ri ato" myhid goo"? ga: pyeing: kaid.
8 Myiyi: eig yug we gyug dain nghoid loug we' gye" gau yi ngei pyo: ziyo' loeb mo wigi nya: cangzoo: yiri hau: ludang: lo" tid kyoo" wa ga: hain: hain: zheung: gei lo".
9 Hau: da" uri Yesu gi nya: eig yug jhang moo phyed za: ju" lo lho: Re" eig yug ngei pyo: nyid goo" baja" ga: tid. Hau: myiyi: eig yug gi Yesu jhang tain" yhe: lho: khyid moo zei: ci: wigi nyang: ri noku ago".
10 Yesu gi Agyug goo" ga: nya: eig yug ri tid lo" lho: nga" mangnhung" yiri Galile mung" khyoo: ri" wa shid re" tid ge kyoo" ge' nyangnu" gi hau: mung" moo ngoo ri shau" myang goo" wa ga: tid.
11 Myiyi: eig yug doem tau lo" da" uri gyizoo: yi dayham" gi voomoo" khyoo zheung: vang lo" lho: Khainjung agyi yi ri bue" lo da" khyoo: bain sho' lo" tid kyo" boem.
12 Khainjung agyi yi yo' Yuda vhujhung: yi gi zheung: foem: sham go" lho: gyizoo: yi ri ngei myoo" sho' byid: wa shid re" khyoo: sho: nyid boem.
13 Hau: thang: gyizoo: yi ri hid: su" tid ge. Myen" ngoonu" yhoeb' jo nung ri nya: cangzoo: yi gi nya: mang ri re" khau" yu pyam bye: ein: tid ge" ga: tid boem.
14 Gyeing" gyeing" nyang: he: da: ludang: ri zoug: phoo shau" gyoo lang gi nanu" da" tho' moo moo" amyi" wa shid re" nanu" ce: yooboo aboo ein: nyang: nyang: se' gyoo: ri ngoonu" so' tid byid: wa he: khyoo: yo' sen: lho: nanu" ci: aci' ca".
15 Zung" bang: gi ngei ri yu ci: lho: nyangnu" tid kaid ziyo' dakhyoo ti" lo" koid boem. Nyangnu" tid da" lu dang: gi akhanyid" ju" sho' Yuda byumyu" yi moo fu" jo, bye:.
(Mar 16:14-18: Luk 24:36-47: Yoh 20:19-23: Lgy 1:6-8)
16 Nya: cangzoo: daxe: da yug bang: gi Yesu pyeing: kaid ziyo' dakhyoo" ti" Galile mung" mo boem khyoo: do, yhe: lo" boem.
17 Nyangnu" gi nyang: ri doem shau" myang boem da" uri nyang ri nyangnu" noku boem nghoid loug we' houg: bang: mo da" yham" gi aloem" loem" yang:- danghoid' boem ago".
18 Aseing Yesu gi cangzoo: yi jhang moo tain re" lho: mougkhung: tho' yo' myidjang dang moo jo, da" amyeung" akhang" dangain" gi ngoo ri byid: too" bye:.
19 Houg: su" nghoid yoomo Nanu" thu' lo" wigi khyi khang" moo" mo byumyu" bain sho' mo ri nga" cangzoo: bue" loo nhang: ge. Nyangnu" ri nya: phoo nya: zoo: gyeungshang: Venyi: da" myeing khyang" mo babtisma ri kham: byid: lho:
20 Nanu" ri ngoo tid to" da" amyeung" mungdang: dangain"- Nyangnu" yo" cang pyeing wa da" shid re" nyangnu" ri jhau" byid: ge'. Ngoo gi he: da" mougmyid pyaid thang sho' nanu" yo" dage" khanham we danyid nyid wa" ga: tid kaid.