16
(Mat.28:1-8;Luk.24:1-10; Yoh.20:1-10)
1 Yuda Dougno: Bidnyid lid loo" lang"-Magadala Mari- Yaku nya: myhi' Mari yo' Solome gi Yesu da" mang moo joid byid: wa shid re" shoem: nam pyo: da" xu: qei yu ago".
2 Nyangnu" gi Dougno: bidnyid" nabsoin: no' bidxain" so' moo loeb khyoo: yhe: lo" ago".
3 Nyangnu" gi khyoo: laid, moo- ngoonu" ri loeb khyung: nhoid mo lug loem: hang" se' tu: khyoo byid: wa lha"? ga: nyang: cang" nyang: tid go" yhe: lo".
4 Nyangnu" yhe: yu" kaid boem ri lug zeing gi gye" gyi: zi nghoid.
5 Nyangnu" gi loeb khyung: khoug khyoo: vang yhi: yo' mibyi: phyu: void ci: da" zoolu: dayug lo, yo shoid moo zhoung: jo, ziri yhe: myang boem wigi nyangnu" gi gye" dain byug boem bye:.
6 Houg: lang" nyang: gi yangnu" ri ?Adain amoug" goo"- nanu" gi pyang zeing moo said pyam bye: da" Yesu ri sho: nyid ago" nyang: gi dei to' lo" byug bye: nyang: hid: moo anyid loo: nyang: ri lheung: to" joyoo: moo we' yhe: yu" ge'.
7 Nghoid loug nanu" loo" ge. Petru yo' nya: cangzoo: yi ri ?Nyang: gi Galile mung" moo nanu" da" shid khyoo: yhe: loo" lang" wa ga: nyang: nanu" ri tid too" bye: ziyo' dakhyoo" houg: moo nanu" nyang: yo' yhe: shau" goo" wa ga: ein: lo" tid kyoo" ge'? ga: tid kaid.
8 Nyangnu" gi loeb khoug mo thu' lo lho: tang" phang: lo" ago". Khasu" wim ga: ri nyangnu" gi gye dain nain" lo" boem bye:- nyangnu" gi gyoug boem yoomo hang" ri ci" we' atid kyoo" nghoid boem ago".
(Mat.28: Yoh.20:11-18;)
9 Akhid" Labain nyid" nab kyoo' no' mo Yesu dei to' lo" thang: ri- nyang: wigi yu nyhed, du: ri khaid thu' pyam byid: da" Magadala Mari ri xangshid" nya: gung nyid shug da.
10 Magadala Mari gi thu' yhe: lho: shid phyang" ngau Yesu yo' nyid yu bye bang: ri lo" tid kyo". Nyangnu" gi kougshu: ziyo' ngau nyid boem ago" da.
11 Nghoid loug we' nyangnu" gi Yesu dei nyid ziri Mari gi Yesu ri myang bye: ga: zi nyangnu" shau" gyo ri aloem" boem nghoid ago".
(Luk.24:13-35)
12 Hau: thang: ri Yesu gi- sooyo, voogung khyoo: yhe: lo" nyid go" da" cangzoo: eig yug ri gootu: yoeb bang khyo" nya: gung ri nyid shug.
13 Houg: lang" nya: eig yug gi doem tau" phang: lo" lho: gootu: cangzoo: yi ri we' hau: khyoo: lo" tid kyo" ago". Nghoid loug we nyangnu" gi hau: khyoo: ri aloem" nghoid ago".
(Mat.18:16-20, Luk.24:36-49, Yoh.20:19-23,Lgy.1:60-68)
14 Hau: thang: ri Yesu gi cangzoo: daxe: dayug kyeing" voem: zo: nyid boem uri nya: gung ri nyid shug. Yesu gi nyang: shid: jangmo doem dei to'' lo thang: ri nyang: ri shau" myang mo, dang: ri cangzoo: yi aloem boem yoomo nyangnu" loemkhau: myid abo ziyo' nheigloem: thain: nyid khyoo: ri gyi koid.
15 Houg: lang" Yesu gi nyangnu" ri nanu" mougmyid goin" goem: sho' yhe: lo" wigi myu" cang: joeb sho' mo, ri hau: ngeibu: lu dang: kho" khyoo" ge'.
16 Loem" Jeing" lho:- babtisma kham: su: hang" nghoid loug we' khyoid yu zi shau" goo" wa nghoid loug aloem" jeing" su: gi hang" we' tarha" dang: phyed zi shug goo" wa.
17 Loem" jeing" mo, gi he: da alhoo: again joem ri yo" koid wa. Nga" myeung khyang" khyo" wigi yu joem ri khaid thu' pyam boem wa nghoid. Hau: lho: gooki" lid da" dang: joem ri tid loo goo" wa.
18 Nyangnu" gi lhangmyu joem ri myheug zei: nghoid loug we- shid: lo" ja: myoo: no, dug, yeung, daja: ja: shug loug we' ci: aca" goo" wa hau: lho: noo phyoo" shau" mo, tho' moo nyangnu" lo, ki" byid: lang" noo phyoo" shau" mo, we' ge shang: lo" boem wa"- ga: tid kyo".
(Luk.24:50-53; Lgy.1:9-11)
19 Aseing Yesu gi hougsu" ga: cangzoo: yi ri bain tid lang" nyang: gi mougkhung: khyoo: to' yu zi shau" lho: Mangso lo, yo shoid moo zhoung: jo, bye:.
20 Houg: lang" cangzoo: yi gi thu' yhe: lo" lho:- joyoo khyi khang" moo" moo ngeibu: Ludang cang kho" kyo" lo". Aseing gi nyangnu" yo' dage" moo" zei: yen" wigi- mau" pho" alhoo: again toin" shid khyo" hau: mungdang: ri geingteing, jo, nhang.
(9. Myiyi: yi gi Petru yo' nya: byencang" yi jhang yhe: lho: nyangnu" ri tid da" dang: joem dangain" ri leung" khyo" wigi nyangnu" ri yhe: tid kyo" ago". 10. Hau: thang: ri Yesu nyang: nya: cangzoo: yiri apyaid ato: khyoid yu da" gyeungshang: zi nghoid nyid da" ludang: ri bidthu shoid mo zi bidvang shoid moo ju" sho' yhe: kho" kyoo" wa shid re" nhang: kaid.