LUKA
NGEI BU: LU DANG:
(Luke)
Sara: Luka lhid" to" da" ngeibu: lu dang: moo Aseing Yesu ri Israela byumyu" yi khyo" we' Mougmyid xangsu: byu yi dangain" mo, da" khyoid yu Aseing khyo" we' toin" shed to".
Sho" jhen: mo, ri ngeibu: ngei lho lu dang: kho" kyo" loo" wa shid re" we' Mangso da" gyeungshang: Venyi: gi Aseing Yesu ri khyen: nyheung to" da" khyoo: ri toin" shid to".
He: jhoem: dang: moo sho" jhen: myoung: doug shau" mo, da" khyoo: aja ja: ri xoin" thu" to" lho: lhid" to" da" khyoo: joem myoo" sho' ri shau" myang. Xangshid" du moo Aseing Yesu gi mougmyid moo gyoo" lo lho: xangsu: byu gung re" void yu da" khyoo: kho" kyo" jangmoo we' Jhoem: dang: lo" thang: du moo gi Mougkhung: tho' khyoo: Aseing Yesu doem do, lo" khyoo: toin" shid jangmoo we' gye gau yi ngei pyo: khyoo: ri thoin" pang byid: nyid. Aseing Khristu Mougkhung: tho' khyoo: do, lo" thang: ri Khristain sasana gyi: sheung: myo tham: lo da" khyoo: ri lagyoo: mougsoug" moo we' he: da" mougsoug" moo we' xo' lhid" thoin" shed to".
Vhoo: khyoo: toin" shid to" da- akhyoo" jhung: shoem zeing eig loem yo' adu zoo: (6) loem moo bo da" moug: lagyoo: yi khoin" da" lid jhoem" thui: yo' Zoonu" Yesu ri yang zung" mo, lo ju" noku da" khyoo: zoonu" Yesu gi Noku" yhoem: moo" moo ju" yhe: da" khyoo:- Ge da" Samari byu da" khyoo:- dangtu' yo' byug lo" da" zooshang: dangtu'- khyoo: aja: ja: myoo" sho' he: da" jhoem: dang: moo date: myang. He: da" Luka mougsoug" bain sho' moo Akyu" mho' da" khyoo:- gyeungshang: Venyi: da" khyoo:- Aseing Yesu moozoo" zei: da" jangmoo- myiyi: zoo: yi bo vang zei: voin vu, da" khyoo:- yau: noo yooboo ri phoo Mangsoo yo" khyoid pyam byid: da" khyoo: joem ri yhau: gyen: khyo" to" lho: lhid" to" da" jhoem: mungdang: joem nghoid nyid.
1
1 myonhoo: bug thu' yoeb bang nghoid da" Thophilu we"- Nyhang" loem khau: loem" jeing" da" khyoo: moo" mo apoem: ayang: nghoid da" khyoo: joem ri lhid" too" mo, myoo" sho' bo nyid boem bye:.
2 Houg: yoomo hau: da" khyoo: joem ri myojid" myang da" sagsi yi nghoid wigi Aseing Yesu da" khyoo: lu dang: gi ri kho" kyo" da" byu yi kho" to" ziyo' dakhyoo" ti" Jhoem: mougsoug" sara: yi gi koid: lhid" xoem" to" da" khyoo: nghoid.
3 Ngoo nghoid loug we' hau: da" khyoo: joem dangain" ri bue" shed" lo da" ayo, mo goolhoo' za: cang myang yen" su: nghoid ziyo' dakhyoo" ti".
4 Khyang: khyang: yo" nghab wa da" shid re" akhyoo" jang da" jhoem: pug dapug yo" bue" ri gi wa ein: myid soin. Aseing shau" gyo: da" khyoo: joem ri joeb sho' Aseing ri si' nhang: noug: yoomo he: da" jhoem: pug ri lhid" kaid da" zi nghoid.
5 Yuda khokham Herod da" pyaid moo Zakhari ga: da" khainjung agyi dayug nyid. Nyang: gi Abia ga: da" khainjung phung: moo boo su: nghoid. Nya: yhoem: seing: myhi' gi Elisabed ga: zi nghoid. Elisabed we khainjung akung: ako' mo nghoid.
6 Nya: eig yug goin"- Mangso da" shidkhoin" moo deing: byeung" su: eig yug nghoid. Mangso da" mungdang: bain sho' yo' Mangsoo pyeing: to" da" dang: dakhoin" we' ashoid loo: cang byeung" su: tang: nghoid.
7 Nghoid loug we' Elisabed gi zoo: ayo" bougdung: nghoid da. Nya: eig yug goin" su- pyaid gye gyi: bye: ago".
8 Danyid" nyid" ri Zakhari gi nyangnu" phung: moo moo" eung: wigi Mangso da" shidkhoin" moo Noku Yhoem: Moo" moo khainjung da" moo" yhe: zei: nyid uri
9 Khainjung da" thung" yo' dakhyoo" ti" me" eung: loo yoomo Noku" da" yhoem: moo" khoug: moo gyeungshang: da" yab moo vang lo" lho: nam pyo: da" shoem: lo" nghe nham xoin" to" nyid.
10 Houg: su" myi: nghi xoin" to" nyid da" uri re" bo noku da" byu myoo" sho' mo, gi nghe: shoid moo Akyu" mho' nyid boem.
11 Hau: da" uri Mangso da" moug: lagyoo: gi Zakhari da" shidkhoin" moo thu' lo wigi nam pyo: da" shoem nghe xoin" to' byid: da" phoin: lo, yo shoid moo re" yab jo.
12 Zakhari gi moug: lagyoo: ri myang lang" nheigloem: moo dain' gyoug nain" nyid.
13 Nghoid loug we' moug: lagyoo: gi Zakhari we" agyug Mangsoo gi Nang mho' da" Mangso thui: ri tam" gyoo: byid: bye:. Re" myhi' zeing Elisabed gi yuggi zoo: agyid asoo: yo" khu: loo wam bye:. Hau: zooshang: ri Yohan ein: myeing myheung byid: wa zi nghoid.
14 Nang gi gye" gau yi ngeipyoo: wa Hau: zooshang: khu: loo yoomo byu myoo" sho' mo, we gau yi ngeipyoo: goo" wa nghoid.
15 Nyang: gi Mangso da" shidkhoin" moo gyi: sheung: su: nghoid wa. Nyang: gi zabyid yhid: yo' yed coid ja: yhid: ri shug wa su: anghoid.
16 Israela Amyu" myoo" sho' mo, ri nya: da" Mangso jhang khyoo: yo" doem shu" loo" wa su: nghoid.
17 Aseing Meshia da" shid khyoo: gei yhi: su: nghoid lho: Lapi: Elia yo' dakhyoo" ti" yoem: vhoo" phung: yoeb gyi: wa su: nghoid. Nyang: gi nya: pho ri nya: zoo: yi yo' doem veing" goo" nhang: wa zi nghoid. Mangsoo ri gyi koid nyid mo, ri deingmain" da" phajhi" ri doem yoo" nhang: wa nghoid. Aseing shid re- jen" jen" nghoid wa shid re" Aseing da" byumyu" yi ri nyheung soin byid: wa nghoid ga: Zakhari ri tid.
18 Zakhari gi hid: su" bui" wa zigi khasu" se' bui" wa ngoo we' mangzoo: danghoid lo:. Nga" myhi' zeing we' pyaid gyi: bye: ga: moug: lagyoo: ri dang: phougtu.
19 Moug: lagyoo: gi ngoo gi Mangso da" shid moo yab jo da" Gabriela nghoid nyid Nang ri he: da" lu dang: gi re" tid kyoo" wa shid re" Mangsoo gi ngoo ri nhang: kaid zi nghoid.
20 Tam" gyoo: we' Nang gi nga" dang: ri aloem" jeing" yoomo he: da" moo" bue" lo da" bidnyid ju" sho' dang: ayo" tid loo: za: nhoid jed loo" zi nghoid ga: tid.
21 Byu yigi Zakhari ri lang" nyid boem- Zakhari Noku Yhoem: Moo" khoug: moo lo" myang" nyid byug ziri mau" nyid boem.
22 Zakhari gi Noku Yhoem: Moo" khoug: mo thu' lo da" uri dang: ayo" tid loo: yoomo Mangso yhoem: moo" khoug: moo yoeb myang" thui: gyoo: kho" da" khyoo: ri nyangnu" shau" boin: lo boem. Zakhari gi dang: ayo" tid yoomo lo, tu kyeing" te: tu lho: za: danyid lo.
23 Hau: thang: ri nya: da" moo" bain lang" gi yhoem: khyoo: lo.
24 Ayo, akhyeing: dajhi myang" loo" lang" Nya: myhi' zeing Elisabed gi gung lid: loo yoomo lhammoo" wim khyab goin" yhoem: khoug: moo za: daloung" jo, lo.
25 Elisabed gi akhid" ngoo ri Mangsoo gi jeju" byid: bye:. Ngoo ri subi" juang" yi doin: khyo da" khyoo: ri Aseing wigi byug loo" nhang: bye: ga: tid nyid.
26 Elisabed gung lid: zi lhammoo" khyug khyab myang" lo" da" uri moug: lagyoo: Gabriela ri Galile mung" Nazared voogung mo zoomyi: dayug jhang khyoo: nhang: kaid.
27 Hau: da" zoomyi: zoo: gi David khokham mo xo' gyoo" lo da" Yoseb ga: da" yuggi zoo: yo" lo, xo' wa shid re" dang: myid: too" su: nghoid. Hau: myiyi: zoo: da" myeing gi Mari ga: zi nghoid.
28 Moug: lagyoo: gi nya: jhang moo re" lho: goo" ki" lid: da" jeju" shau" kham: zo: da" myiyi: nu" we"- nang gi ngeipyoo: yug yoo bye: ga: tid.
29 Hau: dang: ri Mari shoug" gyoo: lang" nheigloem: amyen akhyoid wim lo wigi He: da" Mungdang: gi khasu" nghoid wa la"? ga: myid: mau" nyid.
30 Moug: lagyoo: gi Mari we" agyug- Nang gi Mangso da" shidkhoin" moo myonhoo: bug thu' sheing" jhu" bye:.
31 Nang gi gung lid: lo lho: Yuggi zoo: da" agyid asoo: ri yo" khu: loo wa Hau: yuggi zoo: ri Yesu ein: myeing myheung byid: ca.
32 Hau: zooshang: gi gyi: sheung: loo wa Myhang: thang da" Mangso nya: zoo: ga: myheing shau" myheing wa. Aseing Mangsoo gi Nya: phoo David da" khokham khoo" nyang: ri byid: wa zi nghoid.
33 Nyang: gi Yaku da" byumyu" ri being: abyid: loo" vhoeb khang" wa. Nyang: zhoung: da" khokham khoo" mo kha: nham we' gyoo" loo: wa zi anghoid ga: Mari ri tid.
34 Ngoo gi gyeungshang: da" zoomyi: danghoid' shi" ri khasu" wigi gung lid: lho: yuggi zoo: se' khu: loo wa lha"? ga: moug: lagyoo: ri myid.
35 Moug: lagyoo: gi ?gyeungshang: Venyi: gi Re" tho' moo juri" wa. Myhang: thang da" Mangso yoem: vhoo" gi nang ri shoem" goem byid: wa. Houg: yoomo nang khu: loo wa yuggi zoo: ri myhang: thang da" Mangsoo nya: zoo: ga: myheing byid: boem wa.
36 Re" bidnoem myhi' nghoid da" Elisabed we' mang: loo" yid ri she- yuggi zoo: agyid asoo: ri gung lid: ci: da. Bougdung: myhi' daga: nyid su: gi gung lid: zi lhammoo" khyug khyab nghoid bye:.
37 Mangsoo ayo" koid: da" moo" daja: we' aboo" ga: re" tid kyo".
38 Mari gi ngoo Aseing da" deizoo: nghoid. Aseing tid kyo" ziyo' dakhyoo" ti" ngoo moo bue" loo baja" o"- ga: moug: lagyoo: ri doem tid. Houg: lang" moug: lagyoo: gi Mari jhang mo doem thu' lo.
39 Kha: myhang amyang" ri Mari gi byen soin lho: boem moug: moo jo, da" Yuda voo davoo khyoo: myab myab do, lo.
40 Nyang: gi Zakhari da" yhoem: moo vang lo" lho: Elisabed ri lo, zei: lo" zei. Mari lo meing' da" thui: ri shau" gyo: da" Elisabed ung: khoug: mo zoonu" gi gau thu' jhu" nyid.
41 Elisabed gi gyeungshang: Venyi: yo" byeung" zoore.
42 Nang gi myiyi: dangain" tho' moo Mangso da" mainkaid jeju" je shau" kham: zo: su: nghoid bye:. Nang khu: loo wa da" yuggi zoo: we' ngi: lhoo' su: nghoid ga: thui: moo" yo" lhoem tid.
43 Nga" yhoem: seing: da" nya: myhi' gi ciwim wigi nga" jhang moo to' ju" lo lha". Ciwim wigi hid: yhi' da" jeju" ngoo shau" kham: zo: lha"? ga: tid.
44 Nang yo" doem go" da" dang: thui: ri ngoo shoug" gyoo: lang" nga" ung: khoug: mo zoonu" gi pyo: gau thu jhu" nyid bye:.
45 Mangsoo byid: da" yoeb bang yo' dakhyoo" ti" bui" wa"- ga: nang gi loem" jeing" yoomo ngi: lhoo' bye" ga: thui: zeing yo" nyho: tid.
46 Mari gi
Nga" da" nheigloem: gi Mangso myonhoo: phung" yoeb ri coung" nghei nau da.
47 Khyoid yu Aseing Mangsoo koid: to" moozoo" yoomo nga" Venyi: gi gau yi ngei pyo: nyid.
48 Aseing gi nya: da" dei zooshang: da" nge thang yooboo ri we' khyoid pyam byid: bye:.
Akhid" mo doem ju" loo wa da" myid: yam: zoo: xeig ju" sho' ngoo ri gi ngi: lhoo' su: ga: boem wa: bye:.
49 Khasu" wim ga: ri yoem: bo Aseing gi nga" shid re" mau" pho" moo" ri zei: byid: yoomo nghoid bye:.
Aseing da" myeing khyang" gi myhang: thang gyeungshang: nyid baja.
50 Aseing ri phau" myang: gyoug voem da" byu dangain" ri
Byu ngoug xi: yam: nya: nheigkhyeig da" nheigloem: dabo nyid baja.
51 Nya: yoem: bo da" lo, yoem yo' nheigloem: gyi: nghoidboin: mo ri
abyoo asain" lhu: sain" pyam byid: wa.
52 khokham zeing ri nya: khoo" mo tu: khyo kaid wa
nyhoem thang jo, mo, rigi tu: to' kaid wa.
53 Zoo yoid gyid shed mo, ri ngham" da" zoo: noem gam zho".
54 Yoo" mo, di mo, ri lo, koem: nhang: kaid.
55 Nyang: ri nheigkhyeig shoomyen: da" khyoo: ri
ci: shoug wa shid re Abraham yo' Abraham da" akung: ako' yi ri
khanham we' myid boin: nyid? ga:.
56 Hau: thang: ri Mari gi
Elisabed jhang moo lhammoo" soem" khyab koo: nyid kho" lho:
nya: yhoem: khyoo: doem gyoo" loo" bye:.
57 Elisabed gi bidnyid lhoo khyab byeung" lo da" uri yuggi zoo: ri khu: loo bye:.
58 Hid: su" nyang: ri Mangsoo gi gye" mau" pho" jeju" koid: byid: da" khyoo: ri shoug" gyoo: lang" yhoem: kyoo" cang" yo,- bidnoem seing" cang" yi zheung: shoug" gyoo: lang" nyangnu" gi nyang: yo' dage" gau yi ngei pyo: nyid boem.
59 Hau: thang: ri shed' nyid" ein: da" bidnyid moo nyangnu" gi yuggi zoo: yi da" a thang: yham" kho: da" pui" khyoo: re" ago". Nyang: ri Zakhari ga: nya: pho da" myeing nyang: myheing nau ago".
60 Nghoid loug we' zooshang: da" nya: myhi' gi hau: da" myeung ri amyheing goo"- Yohan ein: damyheing ge'? ga: tid thu' lo.
61 Co kho: bang: gi ?Re" akung: ako' moo Yohan ga: zigi dayug we' abo yu" shi"- ga: Elisabed ri doem tid boem.
62 Hau: thang: ri nya: phoo vho: da" khyo" myheing wa shid re" lo, tu' tu' lho: doem myed: boem.
63 Zakhari gi lug yho' dakhyab ri mho' yu lho: zoonu" da" myeing gi Yohan nghoid ga: lhid" shug.
64 Hau: uri houg: bang: dangain" mo gi mau" boem ago". Hau: uri Zakhari gi dalheung: dam- dang: doem yo" tid lo wigi Mangso da" jeju" ri coung" ngei byid.
65 Yhoem: kyoo" cang" yi gi gye" gyoug nyid boem- hid: su" bue" lo da" moo" gi Yuda mung" goin" jang" moo fu" ju" loo" bye:.
66 Shoug" gyoo: mo, dangain" gi He: zooshang: gi ci: te" su: nghoid wa lha"? ga: tid go" nyid boem. Mangso da" yoem: bo lo, gi hau: zooshang: tho' moo zung" lhug nyid.
67 Houg: lang" nya: phoo Zakhari gi gyeungshang: da" Venyi: yo" byeung" lho: Lapi: dang: khyo" tid zigi
68 Israela da" Mangsoo ri coung" nghei nyid ge'
Aseing gi nya: byumyu" jhang moo gyoo" lo lho: nyangnu" ri loid byoin nang bye:.
69 Shid phyang" re- gyeungshang: gyeungshang: da" lapi: yi mo wigi tid to" ziyo' dakhyoo" ti"
70 Aseing gi ngoonu" ri gyivoo yi da" lo, mo we' ngoonu" ri ngheing" mo, da" lo, mo we' khyoid yu wa da" shid re"
71 Aseing Mangso da" deizoo:- David da" akung: mo, yoem: bo da" Aseing ri thu' loo nhang: bye:.
72 Ngoonu" da" phoug" phyid" yi da" tho' moo nheigkhyeig wa ziyo'
Dang: theing ri myid boin: wa shid re" tid too" bye:.
73-74 Ngoonu" gi Mangso da" shidkhoin" moo da" pyaid goin" deingmain" gyeungshang: nyid wa shid re"
ngoonu" ri gyivoo yi da" lo, mo khyoid yu lho:
Aseing Mangso: da" moozoo" ri agyug avoem loo za: voin vu, nhang: wa ga:
ngoonu" da" nya: phoo Abraham ri dang: theing" too" bye:.
75 Houg: su" nghoid yoomo ngoonu" dangain mo, gi
nya: shidkhoin" moo gyeungshang: deingmain" nyid ca".
76 O"- Nga" zoo: we"- myhang: thang Mangso da" lapi: ga: myheing boem wa.
Nang gi Mangso da" khyoo: ri jen" jen" soin to" lho: gam shid" shi: su: nghoid wigi
77 Aseing Mangso da" byu phung: ri yooboo khyoid pyam byid: lho:
khyoid yu da" khyoo: ri kho" kyoo" wa zi nghoid.
78 Ngoonu" da" Mangsoo: gi nheigkhyeig shoomyen: da" nheigloem: yo" byeung" joeb su: nghoid.
Aseing khyoid khyu: yu da" jeju" ri Mougkhung: tho' mo wigi bid moo" khyab yhangti" ngoonu" tho' moo doug bang gyoo" loo bye:.
79 Shid: zoug: da" bid shoem: yoeb moo zhoung: jo mo, da" tho' moo doug bang loo wa nghoid.
Hau: tho' agoo"- Ngoonu" da" myenjham" khyoo: moo shu" vhu" she: loo wa zi nghoid.
80 Zoonu" gi gyi: sheung: lo lho: se' da" myid nheigloem: we yang" lo. Nyang: gi Israela Amyu" yi da" shid moo bang bang moo" azei: loo" shi" ri kyoem: shang" khoug: moo da" nyid nyid.