9
(Mat 10:5-15, Mar 6:7-13)
1 Yesu gi cangzoo: yi daxe: eig yug ri khe: zheung" yu lho: yu joem ri yo" khaid thu' pyam wa da" yoemso yo' noo phyoo" joem ri yo" ge loo" nhang: wa da" yoemso yo' amyeung" akhang" ri byid.
2 Hau: thang: ri nyang: gi nyangnu" ri tid zigi Mangso mungdain da" akhyoo" ri yhe: kho" kyoo" wa ziyo' noo phyoo" shau" mo, ri yhe: gi byid: wa shid re" nhang: kaid boem bye:.
3 Yesu nyangnu" ri tid zigi nanu" gi hau: gyung" khyoo: mo shid re" ci" we' avoin, goo"- lham: dung: we' aci: goo"- thung: i" moo zoo: noem ngei sheing: we' akaid voin goo"- byimi we' ajhain" avoin goo".
4 Nanu" ri being" lhoem: tau yu da" kha: yhoem: moo nghoid loug we' nanu" gi hau: voogung mo doem thu' lo' da" ayo, ju" sho' hau: yhoem: moo za: danyid nyid ge.
5 Nanu" ri being" alheom: tau yu boem nghoid rigi hau: voogung mo doem thu' lo' wigi nanu" da" khyid: voo: mo pheilhoug: ri ko" khyo too" khoo lho: nyangnu" ri zid" nhang: khoo' ge.
6 Houg: lang" cangzoo: yi gi thu' yhe:lo" lho: voogung dangain" jang" moo joeb, sho' so" yen" boem wigi ludang: gi ri cang kho" kyo" ziyo' khyi khang" moo" mo mo, ri noo phyoo" ge loo" nhang: yen: ago".
Mat 14:1-12, Mar, 6:14-29)
7 Galile mung" zoug: phoo' Herod gi houg: su" bue" nyid da" khyoo: dangain" ziri shoug" gyoo: lang" nyang: gi myid gye" myo: loo bye:. Khasu" wim ga: ri byu phung: yi dayham" gi babtisma byid: da" Yohan doem dei loo bye: ga: tid nyid ago".
8 Hau: lho: gootu: dayham" bang: gi Elia po: thu' loo bye: ga: dayham" gi goolheung: mo lapi: yi dayug yug doem dei lo zi nghoid- ga: tid go" nyid boem.
9 Houg: lang" Herod gi Yohan vhuloem ri ngoo phyed" pyam byid: bye: zi nghoid- ngoo ludang: shau" gyo: nyid da" he: yug gi hang" nghoid wa lha: ga: tid wigi nyang: gi Yesu ri shau" myang wa shid re" yoem: gye" kaid nyid.
(Mat 14:13-21, Mar 6:30-44, Yoh 6:1-14)
10 Lagyoo: yi gi doem tau" lo wigi nyangnu" zei: da" moozoo" dangain" Yesu ri tid kyo" zigi. Houg: lang" Yesu gi nyangnu" ri shu" lho: Bedsaida ga: da" voogung khyoo: yhe: lo" boem.
11 Byu phung joem, gi: hau: khyoo": ri zheung: shau" gyo: lang" Nyangnu" gi Yesu da" thang: zheung: cang yhe: lo" ago". Nyang: gi nyangnu" ri lhoem: tau: yu lho: Mangso mungdain khyoo: tid kyo" ziyo' noo phyoo" bo mo, ri ge loo" nhang.
12 Bidvang lo" nyid lang" cangzoo: yi daxe: eig yug gi nya: jhang moo re" lo wigi byu phung: yi ri voogung khyoo: yoozang' joem khyoo: lo" wigi yhoeb' joyoo sho: wa ziyo' zoo: noem lo" sho: boem, wa shid re" nhang: kaid we' Khasu" wim gari he: joyoo gi byu hang" we' a nyid joyoo nghoid- ga: tid ago".
13 Nghoid loug we' Yesu gi nanu" nyang: nyangnu" ri zoo: noem daja: ja: byid: zhoo" ge'? ga: nyangnu" ri tid. Nyangnu" doem phoug tid zigi ngoonu" yo" zoo: noem gi zooyho' wim: loem: yo' wimdo, eig du: za: date: nghoid. Nang gi ngoonu" ri he:byu phung: yi dangain" mo, shid re" zoo: noem yhe: qei, nhang: nau, la"? ga: myid: boem.
14 (Houg: moo nyid mo, gi yug gi yi za: wim: khyeing" koo: bo da) Yesu nya: cangzoo: yi ri ?Daphung moo wim xi: yug koo: koo: koid lho: wigi aphung: phung: zhoung: jo, nhang: ge"? ga: tid.
15 Cangzoo: yigi hougsu" bain koid thang: ri
16 Yesu gi hau: zooyho' wim loem: yo' wimdo, eig du: ri yu lho: mougkhung: khyoo: nghang' yu" wigi Mangsoo jeju" bain coung" byid: lang" zooyho' yo' ngoo: ri phe' yu lho: byu phung: yi ri gam, byid: boem wa shid re cangzoo: yi ri byid: kaid.
17 Nyangnu" dangain" mo, gyi" sho' shug" zo: boem bye:. Cangzoo: yi gi zo: teing da" ajab amoin" daxe: eig gyoin byeung" sho' doem cang koid: zheung" yu ashi" go".
Mat 16:13-19, Mar, 8:27-29)
18 Danyid" ri Yesu gi nyang: kyeing" za: akyu" mho' nyid uri cangzoo: yi gi nya: jhang moo re" ago Yesu nyangnu" ri ?Byu phung: yi gi ngoo ri hang" nghoid ga: tid go" nyid boem ago? ga: lhoem: myid.
19 Nyangnu" phoug tu" boem zigi dayham" gi nang ri babtisma byid: su: Yohan nghoid ga: nyangnu" phoug tid nyid ago"- dayham" gi goonham, mo, lapi: dayug yug doem dei lo zi nghoid ga: tid nyid ago"- ga: tid nyid boem.
20 Houg: lang" Yesu gi nyangnu" ri nanu" gi ngoo ri hang" nghoid ein: myid nyid go" ga: myid: Petru phoug tu" zigi nang gi nang Elia nghoid ga:-Mangso Meshia nghoid ga: tid.
(Mat 16:20-28, Mar 8:30-9:1)
21 Houg: lang" Yesu gi he: khyoo: hang" ri we' atid kyoo" wa shid mo jhug za: amyeung" byid: bye:.
22 Nyang yang: nu" rigi- byu da" nya: zoo: gi kyikhyeug, khyoo: myo" sho' shau" zoo: wa zi nghoid. Yuda Ludaid vhujhung: yi Khainjung zeing yi yo' tarha" sara: yi wigi ngeug pyam zi shau" lho: said pyam goo" wa zi nghoid- nghoid loug we' soem" nyid" thang: ri doem dei to' loo wa zi nghoid- ga: tid kyo".
23 Houg: su" wim nyang: gi- nyangnu" dangain" mo, ri nga" thang: moo cang noug su: hang" nghoid loug we' nyang: nya: gung ri ngeug pyam ca:. Hau: lho: nya: pyang" zeing ri nyid" khang" moo' vu, ci: lho: nga" thang: moo cang ca.
24 Khasu" wim ga: ri nyang: nya: da" kangso ri khyoid yu noug su: gi hang" nghoid loug we' kangso' soem" loo" wa nghoid loug we' ngoo yoomo kangso soem" loo" su: koem' gi khyoid yu zi shau" wa nghoid.
25 Byu dayug gi he: mougmyid goin" ziri yo" seung: ci: nghoid loug we' Nyang: nya: da" kangso soem" lo" rigi ce: noem akyu" se' boo wa lha". Ce" akyu" we' aboo nghoid da.
26 Houg: lang" ngoo yo' nga" da" mungdang: ri sho' su: rigi byu nya: zoo: gi Nya: phung" yoeb, yo' nya: pho da" [phung" yoeb, bang yo' gyeungshang: moug: lagyoo: yi da" phung" yoeb, bang yo' ju" ri" lang" byu nya: zoo: we' nyang: ri sho' pyam wa zi nghoid.
27 Nanu" ri ngoo deing" deing tid ba- he: khyi moo nyid mo, mo dayham" Mangso mungdain ri amyang myang gi ashid: shigoo" wa.
(Mat 17:1-8, Mar 9:2-8)
28 Houg: bang: ri bain tid thang: ri labain daloem: kyoo: lang" Yesu gi Petru- Yohan Yaku ri shu" lho: wigi akyu" mho' wa shid re" boug gung daloem: khyoo: do, yhe: lo" ago".
29 Nyang: akyu" mho' nyid uri nya: myonhoo: gi thid loo khare" wigi nya: byimi joem gi yeing: yeing: lo,- moin: moin: phyu loo" khare".
30 Hau: jangmo nyeigdain tung" byu eig yug gi Yesu yo' dang: tid go" nyid. Hau: eig yug gi Moshe yo' Elia nghoid ago".
31 Nya: eig yug gi mougkhung: phung" yoeb, yo' thu jhu, lo wigi Yesu gi atoung" myang" ri Yerusalem voomoo" moo shid: kham: khyo" wigi Mangsoo myid vho: khyoo: ri joeb, byeung" loo" nhang: wa ziyo' sen: lho: wigi Yesu yo' zheung: doem go" nyid go".
32 Petru yo' nya: byencang" yi gi yhoeb pyo: nyid ago nghoid loug we' nyangnu" boin: so" re" boem, rigi Yesu phung" bang yo' nyang: yo' yab, jo, da" byu eig yug ri myang ago".
33 Hau:eig yug gi Yesu jhang mo phang: lo" nyid uri Petru gi Yesu ri Aseing we" ngoonu" he: khyi moo nyid ge da- Re" shid mo zoem" daloem:- Moshe shid mo zoem" daloem- Elia mo zoem" daloem: zoem" soem" loem: koid wa"- ga: tid kaid da. (Nyang: ci: tid shid kaid zi ri nyang: gyeing nyang: asi)
34 Nyang dang: da tid nyid shi" uri joem" moug" dathei" thu' lo wigi nyangnu" ri lo shoem" nghoeb, pyam- houg: lang" nyangnu" gi gyoug dain" nyid boem ago".
35 Jhoem: thei" khoug: mo thui: daloem: gi ?He: yug gi nga" rizoo: nghoid- Nyang: ngoo khyen: to" zi nghoid- nya: jhoug" myeing" ri tam" gyoo: ge'? ga: da" thui: daloem: myeung thu lo.
36 Hau: da" thui: thang loo" lang" houg: moo gi Yesu za: danyid lo. Cangzoo: yi gi nyangnu" shau" myang da" khyoo: dangain" hau: ayo, gyoo: moo hang" ri we' atid kyoo" loo- sam" zoo: danyid nyid ago".
Mat, 17:14-18, Mar, 9:14-27
37 Thang: nyid" ri Yesu yo' cangzoo: yi soem" yug gi boug gung tho' mo doem tau" gyoo" lo ago, byu phung: phung" moo" gi Yesu ri re" tau: yu boem ago".
38 Byu dayug gi mo, phung: gung mo nyho: thu' lo wigi"- sara: we" nga" zooti" zoo: ri yu" byid: wa shid re" ngoo nang' ri mho' ga: tid.
39 Hau: yu gi nyang: ri vang yoomo nyeig dain' tung" nyho: lho: lang" thoung: joeb, leung lo" wigi nhoid mo nyoeb, du" athei" thei" thu' nyid da- gye" noo sho' ayoug: akhi" lho: lhoung, phang: thu' lo" da.
40 Hau: yu ri kaid, thu' pyam byid: wa shid re" ngoo gi re" da" cangzoo: yi ri mho' nghoid loug we' nyangnu" gi ayo" khaid thu byid: nghoid ago".
41 Yesu gi ?loem" jeing" emyed abo ziyo' shoid vhang: da" byu yi we"- ngoo gi nanu" yo' khamyhang ju" sho' nyid wa lha"? ga: tid. Hau: thang: ri Yesu gi ?re" zoo: ri hid: khyoo: shu" ri we' ga: tid.
42 Hau: yug gi nu" ju" re" lo da" uri yu gi nyang: ri myidjang moo theung lheung: kaid lho: lang: thain: nain" nyid nhang: Yesu gi akhyeung" da" yu ri amyeung" byid: kaid lho yug gi nu" ri ge loo nhang. Houg: lang" nya: phoo ri doem ab byid: kaid.
43 Mung" byu phung: yi dangain" mo, gi Mangsoo da" phung" Yoeb, ri mau" hang" to" boem ago".
Mat, 17:22-23, Mar, 9:30-32
Byu phung: yi gi Yesu zei: loo bye: da" moozoo" aja: ja: ziri damoug" go" nyid boem shi" uri
44 Yesu gi nya: cangzoo: yi ri byu nya: zoo: gi sube" lo, khoug: moo ab, byid: pyam shau" wa nghoid- he: dang: ri nanu" ato" myhid loo: xoem" too" ge' ga: tid.
45 Nghoid loug we' cangzoo: yi gi he: dang: gi ce: noem ri tid nyid da" khyoo: ri ase' gyoo: shi" nghoid ago". Hau: dang: ri nyangnu" ase' gyoo: goo" baja" ga: zau" too" byid: da Cangzoo: yi gi hau: khyoo: yo' sen: lho: nyang: ri avoem" myid: nghoid ago".
Mat. 18:1-5, Mar 9:33-37
46 Cang: zoo: yi gi nyangnu" mo, gyi: thang yug gi hang" nghoid wa lha"? ga: coem, tid ngeug go" thu' lo boem.
47 Yesu gi nyangnu" da" ung: khoug: moo ce: noem bo nyid zigi si' byid: nyid yoomo nyang: gi zooshang: dayug ri khe:yu lho: nya: nam moo yab, jo, nhang: wigi
48 Nyangnu" ri tid zigi nga" myeing mo, he: zooshang: yi ri kham: yu mo, hang" nghoid loug we' ngoo ri ri nhang: kaid yug ri kham: yu su: nghoid bye khasu" wim gari nanu" mo nge thang su: gi gyi: thang su: nghoid bye: ga" tid.
Mar 9:38-40
49 Houg: lang" Yohan gi Aseing we" re" da" myeing khyo" wigi yu joem ri khaid' thu pyam nyid da" byu dayug ri ngoonu" shau" myang boem bye:- nghoid loug we' nyang: gi ngoonu" da" phung: mo byu anghoid yoomo wigi ngoonu" nyang: ri toem pyam bye:? ga: tid.
50 Nyang: gi gootu: cangzoo: yi ri Yesu tid zigi nyang: ri atoem goo" ciwim ga: ri nanu" ri athug theung su: hang" we' nanu" shoid mo, su: nghoid.
51 Yesu mougkhung: khyoo: do, loo" wa da" ayo, jhang loo lang" nyang: gi myid kho: ci: lho: Yerusalem voomoo" khyoo: yhe: lo" nyid.
52 Nyang: gi nya: shid' vhu" khyoo: lagyoo: yi ri nhang: kaid lho: nyang: nu: gi Yesu shid' mo ca" khyoo: nyheung' soin' byid: wa shid re" Samari voogung daloem: khyoo: vang yhe: lo" ago".
53 Nghoid loug we' Yesu gi Yerusalem voomoo" khyoo: dayhe: lo" nyid ziri se' boem yoomo voogung bang: gi nyang: ri akham: yu nghoid ago".
54 Cangzoo: Yaku yo' Yohan tang: gi he: khyoo: ri myang lang" nyang: tang: gi Aseing we" nyangnu" ri nghe said pyam wa shid re" nga" eig yug gi mougkhung: mo myi: ri khe: khyo yu wa: nang aveing" la"? ga: tid ago".
55 Yesu gi lheung: lo lho- nyang: tang: ri gyi koid da.
56 Hau: thang: ri Yesu yo' nya: cangzoo: yigi goo" voo khyoo: thu' so" lo" ago".
Mat. 8:19-22
57 Nyangnu" gi khyoolaid' moo so" lo" nyid boem uri byu dayug gi nang khakhyoo: yhi: khakhyoo: ngoo we' bo cang wa? ga: Yesu ri tid.
58 Yesu nyang: ri ?zeig ni joem gi khyung: yo" ago"- ngho' zoo: joem we' soid jo, ago"- nghoid loug we" byu nya: zoo: koem' gi vhu" shid" khoug: jang: khyalhang" we' ayoo"? ga: tid.
59 Nyang: gootu: dayug ri doem tid zigi ?Nga" thang: moo cang we'? ga: tid. Nghoid loug we' hau: yug gi ?sara we" nga pho mang shi" lo" shung: khoo' wa akhang" byid: we'? ga: tid.
60 Yesu gi ?Byushid: yigi nyangnu" da" byushid: nyang: cang" myhoeb, shung: goo" baja"- nang gi Mangso mungdain khyoo: ri yhe: kho" kyoo" byid: we'? ga: tid.
61 Gootu: dayug gi ?sara we" ngoo we' re" thang: cang wa Nghoid loug we' nga" yhoem: byu yiri shi" lo" vhu" too" khoo wa akhang" byid: we'? ga: tid.
62 Yesu nyang: ri tid zigi ?khoin, zhug moo zei: ci: lho: thang: khyoo: lheung: yu" su: hang" nghoid loug we' Mangso mungdain shid re" ce" akyu" we' boo zi anghoid? ga: tid. .