8
1 Ayo, dajhi' myang" lo" da" uri Yesu gi voogung myoo" sho' lid lo" zoore Mangsoo mungdain' lu dang: gi ri kho" kyo" lho.
2 Lagyoo: daxe: eig yug gi nyang: yo' dage" bo cang yhe: lo". Noo gyi- yu join: gyi mo khyoid yu da" myiyi: yi dayham" we' bo cang lo" boem. Houg: bang: mo yu nyhed' du: phang: thu' lo" da" Magadala ga: da" Mari we' bo lo.
3 Herod khokham da" yhoem: vhoeb khang" da" zoug: moo"- Kutha da" yhoem: seing: myhi'- Yohana- Susanna yo" myiyi: gootu: myoo" sho' mo, gi nyang: nya: joyoo jang: moo Aseing Yesu yo' nya: cangzoo: yi ri ca" moo ca" bo pang" thoug ago".
(Mat 13:1-9: Mar 4:1-9)
4 Voo zoo: voo zeing mo lo da" byu dangain" mo, gi Yesu jhang moo zeing: foem: to" da" uri Yesu dangtu' khyo" tid kyo" zigi
5 Amyoug: sain" su: gi amyoug: sain" wa ga: thu' lo. Sain" kaid uri myoug shi" dayham" gi khyoo: gung moo gyoo" lo"- hau: da" myoug shi" rigi byu yi nang: lid nyid lho: ngho' joem we koid: zo: pyam.
6 Myoug shi" dayham" gi lugthi: tho' moo gyoo" lo. Agam yug re" lho: gyid aboo yoomo nyhau" kyoug shid: pyam.
7 Myoug shi" dayham" gi zukyin: byab moo gyoo" lo. Zugam joem gi myoug gam nu" joem ri foeb said pyam.
8 Myoug shi" dayham" gi myidjang gi moo gyoo" lo" wigi agam yug gyi: lo lho: dashoo: zhang ashi" myoo lo ga: wigi tid kyo".
Hau: thang: ri Yesu gi nookhyab dab mo gi gyo: yu ge" ga: tid.
(Mat 13:10-17: Mar 4:10-12)
9 Nya: cangzoo: yi gi he: dangtu' mo da" dangkang: Yesu ri doem myid: ago".
10 Nyang: doem tid zigi Nanu" gi Mangsoo vhoeb khang" da" khyoo: mo no, thang da" khyoo: joem ri se' abye: go"- gootu: bang: gi yu" nyid lho: amyang- shau" gyo: lho: ase' gyoo: yoomo dangtu' khyo" kho" kyoo" ca" nyid.
(Mat 13:18-23: Mar 4:13-20)
11 He: dangtu' mo, dangkang: gi hid: su" nghoid. Myoug shi" gi Mangso da" mungdang: nghoid.
12 Khyoo: gung moo gyo" da" myoug shi" gi Mungdang: shoug" gyoo: mo, ri tid nau zi nghoid nghoid loug we' yu satan gi houg: bang: khyoid yu zi shau" wa avhoo: yoomo nyangnu" da" nheigloem: khoug: mo mungdang: ri re" yu pyam byid.
13 Lugthi: tho' moo gyoo" lo" da" myoug shi" gi Mungdang: ri shau" gyo: da: uri gau yi ziyo' kham: yu mo, ri tid nau. Nghoid loug we' nyangnu" da" nheigloem: khoug: moo mungdang: agyi: ayo" cen,- dayo, daboin: za: jham" ca: yu" da" yaukhe: kyikhyeig khyoo: doem thoung" shau" lang" hau: yug gi doem fain" phoug: lo.
14 Zukyin: byab moo gyoo" lo" da" myoug shi" gi Mungdang: ri shau" gyo: lho: myid myoo: ungloug da" khyoo:- yoo" zoo: yoo" shug da" khyoo:- gungshoo" nyam khyo: ze wigi nghoeb foeb pyam yoomo mo, da" ashi" ayo" zei:- mo, ri tid nau zi nghoid.
15 Jen" bo da" myidjang gi moo gyoo" lo" da" amyoug: koem gi Mungdang: ri shoug" gyoo: lang" tam" gyoo: nau da" nheigloem: yo' geing: geing: teing teing kham: yu loem" jeing" wigi Ashi" zei: loo sho' koid: da" byu yi ri tid nau da" zi nghoid.
(Mat 4:21-25)
16 Myikug ri tab lho: wigi lain" ceing zhoung" lhoung:- anghoid lang" yhoeb' cuang gyid" moo kaid to" zigi hang" we' akoid yu". Yab moo vang loo mo, myo, myang wa shid re" myikug ke" jang: moo za: dete: lhoung ke" to" boem.
17 Yhoem" to" da" zi dangain" gi thu' myhang loo wa. Nghoeb to" khyoo: dangain" gi diri cen: shau" myang boem wa.
18 Nghoid loug we' houg: yoomo Nanu" ce: ja: khasu" shau" gyo: ci: zigi zid" nyid ge. Khasu" wim gari Yoo" su: ri pug lung: byid: wa. Ayoo" su: jhang mo gi nyang: yo" ga: myid ci: zi dangain" rilang" nya jhang mo yu pyam byid: wa" ga: tid.
(Mat 12:46-50: Mar 3:33-35)
19 Yesu da" nya: myhi' yo' nya: no, gi nyang: jhang moo ri" nghoid loug we' byu phung: yi myo: nyid yoomo nyang: yo" ayo" shau" go" boem.
20 Byu dayug gi ?Re" myhi' yo" re" no, gi Aseing yo" shau" goo" noug yoomo nghe: shid moo re" nyid ago"? ga: Yesu ri tid kyo".
21 Houg: lang" Yesu gi nyangnu" Mangso da" mungdang: ri shau" gyo: lho: cang loo" mo, dangain" gi nga" myhi' yo" nga" no, nghoid, bye ga: tid
(Mat 8:23-27: Mar 4:35-41)
22 Danyid" ri Yesu yo' nya: cangzoo: yi gi gyid thoem" thei: tab khyoo gu: loo" shang ga: sham: go" wigi cangzoo: yi yo" lhid mo gu: go" lo" boem bye:.
23 Houg: su" gu: go" lo" ri Yesu gi yhoeb' pyo: jo, hau: uri nyeigdain tung" uglid moo" hau, lo wigi lhid moo gyid byeung" loo yoomo cangzoo: yi gi gyid moo noeb lo" nyid boem- ziyo' gye" gyug dain mau" nyid boem bye:.
24 Nyangnu" gi Yesu ri nhau" lho: Aseing we"- Aseing we"- ngoonu" shid: boem wim bye myang ga: tid boem.
Yesu gi to' re" lho: lid yo' beingmhoid ri amyeung" khyo' toem pyam houg: lang" uglid yo' beingmhoid gi sam: zoo: tam" loo" bye:.
25 Houg: lang" nyang: gi Nanu" loem" jeing" nheigloem: gi khare"- ga: cangzoo: yi ri myed.
Nghoid loug we' nyangnu" nyang: gi gyoug mau" zoore" ?He: yug gi hang" nghoid lug lha"- lid yo' beingmhoid we' nyang: amyeung" byid: lang" gi tam" gyoo: nhung: lha"? ga: nyang cang nyang- tid boem.
(Mat 8:28-34: Mar 5:1-20)
26 Yesu yo' nya: cangzoo: yi gi Gerase mung" khyoo: gu: lo" ago". Gerase gi Galile mung" gyid thoem" thei: tab moo jo, da" voogung nghoid.
27 Yesu gi gyid yam moo do, lo" ri voomoo" mo,Yu joem vang ci: da" voo byu dayug gi nyang: jhang re" shau. Hau: yug moo yu joem vang ci: zigi gye" myang" bye:. Nyang: gi byimi avoid- yhoem: moo we' anyid nghoid loug we' Loeb boug mo lug ug khoug: moo za: cang nyid yen.
28 Yesu ri myang lang" nyang: gi yoid nyho: ngau lho: nya: shidkhoin" moo nyang: goeb pid wigi myhang: thang da" Mangso nya: zoo: Yesu we"- Nang gi ngoo ri ci: koid: nau lha". Ngoo ri ashen" ayhen shi" lhe"- ga: yo" nyho: yoid kaid.
29 Houg: su" tid da" khyoo: gi Yesu gi yu joem ri hau: yug da" gung mo thu' loo" wa da" shid re" amyeung" khyo kaid yoomo nghoid. Yu joem gi hau: yug moo myoo" sho' lheing vang yu" bye:. Nya: da" khyid: yo" lo, moo jangcoo" yo' tei" to" yu nghoid loug we' nyang: gi jangcoo" ri khang kho: pyam lho: yu joem koin" lo" da" dain" pyoid' yoo khyoo: lhoung gei vang lo.
30 Yesu gi Hau: da" yu ri re" myeing ce: myeing nghoid ga: myid.
Nya: myeing gi Legio nghoid ga: tid. Houg: su" tid da" khyoo: gi hau: yug moo yu joem myoo" sho' vang nyid yoomo tid zi nghoid.
31 Yu joem gi nyangnu" ri no, thang da" duang: khoug: moo akoin" khyo kaid ga: mho' sang: ago".
32 Hau: uri vu, joem moo" dajoem gi bouggung tho' moo boid zoo: go nyid. Yu joem gi hau: vu, joem moo vang wa da" akhang"- Yesu ri mho' mho' sang: nyang: gi nyangnu" ri akhang" byid.
33 Yu joem gi hau: byu jhang mo thu' lo" lho: Vu, joem jhang moo vang lo. Houg: lang" vu, joem moo" dangain" gi dung" bung' tho' mo wigi dalheung: dam gyid thoem" moo byam vang lho: noeb shid: pyam boem.
34 Hid: su" bue" da" khyoo: ri vu, zung" mo, myang lang" phang: lo" boem. Nyangnu" gi voomoo" yo' sooyo voogung khyi khang" moo" moo he: da" ludang ri fu" lo" boem.
35 Byu phung yi gi houg: su" bue" lo da" khyoo: ri yu" wa ga: zeing: re" lo boem ago". Yesu jhang moo ju" boem lang" gi yu joem phang: thu' loo" su: gi Yesu da" khyid: yang moo goonham' yo' dakhyoo" ti" byu gi doem bue" lho: zhoung: jo, ziri zheing: myang lang" yu" gyoug nyid boem.
36 Zheing: myang da" sagsi yi we hau: yug yu gi khasu" khyoo: byu yi ri tid kyo".
37 Hau: da" uri Gerase moug: mo byu dangain" mo gi gye" gyug dain mau" nyid boem yoomo Yesu ri nyangnu" da" moug: mo myab myab doem thu' loo" wa shid re" mho' sang:: nyid ago". Houg: lang" Yesu gi lhid tho' moo do, lo" lho: hau: moug: mo thu' lo.
38 Hau: yu joem phang: thu' loo" su: gi
Yesu ri ngoo nang yo" dage" so" yen" nau" ga: mho' nyid.
39 Nghoid loug Yesu gi
Re" yhoem: khyoo: lo" lho: Mangsoo nang ri khasu" koid: byid: da" khyoo: ri lo" tid fu" yen" we? ga: tid kaid Hau yug: gi voogung khyoo: lo" lho: nyang ri Yesu zei: byid: da" moo" ri lo" tid kyoo" bye:..
(Mat 9:18-26: Mar 5:21-43)
40 Nung" thei: tab' khyoo: Yesu doem tau" lo da" uri byu phung: moo" gi nyang: ri lhoem tau yu boem- khasu wim gari nyangnu" gi nyang ri lang" nyid boem yoo mo nghoid.
41 Hau: da" uri Ya-iru ga: su: gi ju" re" wigi nyang: gi tarha" jung moo vhoeb da" zoug: phoo nghoid. Yesu da" khyid: yang: moo re" goeb pid lho: nya: yhoem: moo ri" wa shid re" nyang: ri mho' tid.
42 Khasu" wim gari daxe: eig zain ju" bye: da" nya: zooti" myiyi: zoo: gi no shid: lo" nyid yoomo nghoid.
Yesu gi nyang: yo' dage" cang lo" da" uri byu myoo" sho' mo, we' nya: da" ayam, aqei: moo bo jhin" jhab' lo boem.
43 Hau: phung: moo myiyi: myhi' dayug gi daxe: eig zain goin"- suid" shoin: da" noo bo ci: su: nghoid. Nyang: moo yo" jo, da" ngei sheing: jonu" bain sho' moocid" ze: yu" bye:. Nghoid loug we' kha" moocid" sara: we' nya: noo ayo" ze: gi byid.
44 Hau: da" myiyi: myhi' gi Yesu da" nung thang moo tab tab cang yhe: lho: Yesu da" byi: mo bain: byoug thang: moo shau" tain" kaid- houg: lang" jang: yau, nyid da" suid" kain" loo" khari" bye:.
45 Aseing Yesu gi ngoo ri zang" su: gi hang" nghoid ga: myid.
Nyangnu" hang" we' azang" tain" ga: hi: go" nyid da" uri Petru gi Aseing we' byu phung: moo" gi nang ri nyhin" nyid.
46 Nghoid loug we' Yesu gi byu dayug yug gi ngoo ri zang" tain" bye:. Nga" da" gung mo yoemso thu' lo" zi ngoo se' ga: doem tid.
47 Hau: da" myiyi: myhi' gi nyang: koid da" moo" po: thu' lo zi si' yoomo gyoug nain" ziyo' shid khyoo: re" lho: Yesu khyid: goeb pid. Hau: thang: Aseing ri Ci: wim wigi zang" da" khyoo: we' nya: da" noo dalheung: dam ge lo" da" khyoo: ri we' byu myoo" sho' mo, da" shidkhoin" moo tid kyo".
48 Yesu gi nga" zoomyi: zoo: we"- re" da" loem" jeing" nheigloem: gi nang ri noo ge loo" nhang: bye:. Myen jham" zoore daloo" re, nyang: ri ga: tid kaid.
49 Houg: su" ga: Aseing tid nyid da" ayo, moo tarha" jung vhoeb da" zoug: phoo yhoem: mo lagyoo: dayug ju" re" Ya-iru ri re" zoomyi: zoo: gi shid: bye:- Sara: ri akhe: nhung yen" loo: ga: re" tid.
50 Hau: da" dang: ri Aseing Yesu shoug" gyoo: lang" Ya-iru ri nang myid amyoo:- nang moo loem" jeing" da" nheigloem: za: date: boo we' Re" zoomyi: zoo: gi doem yang" loo wa zi nghoid ga: tid.
51 Nyang: gi hau: yhoem: moo ju" lang" Petru- Yaku- Yohan yo' myiyi: zo: da" nya: yhid nya: ba" mo, lid lho: gootu: hang" ri we' houg ri we' nyang: yo' dage" avang loo" nhang.
52 Myiyi: zoo: shid: yoomo byu yug khang" moo" gi nyho: ngoug go" nyid Yesu gi angoug goo"- he: zooshang: gi shid: zi anghoid. Nyang: yhoeb' jo, zi za: danghoid' ga: tid.
53 Hau: uri byu yi gi myiyi: zoo: bain shid: bye: zi se' boem yoomo Yesu ri juang" yi nyid boem ago".
54 Nghoid loug we' Yesu gi too we' nga" zoo myi: we" myiyi: zoo: da" lo, moo zei: ci: lho: myiyi: zoo: we" ga: yoid.
55 Myiyi: zoo: gi kangso doem vang lo lho: houg: jang: nyang: to' loo bye:. Yesu gi myiyi: zoo: ri zoo: noem daja: ja: zhoo" ge' ga a myeing" byid:
56 Nya: myhi' phoo gi gye" mau" nyid ago". Nghoid loug we' Yesu gi He: bue" lo khyoo: hang" ri we' atid kyoo" goo" ga: zung" nhang: kaid.