4
1 Lapi: phung: moo bo da" cougmoo" myhi' dayug gi Elisha jhang yhe: wigi ?Nheigboo pho we"- nga" yhoem: seing: phoo shid: bye:. Nang se' ziyo' dakhyo" nyang: gi Mangsoo ri gyoug phoug" da" su: nghoid. Akhid" nya: da" jhen: seing: byu dayug gi nga" yhoem: seing: pho da" jhen: shid re" nga" yuggi zoo: eig yug ri join khyo" shu" yu pyam wa ju" re" da? ga: tid da:.
2 Nyang: gi ?Re" shid re" ngoo cikoid byid: ca" wa la". Nang yhoem: moo ciyo" lha". Ngoo ri tid kyoo" la? ga: myid: da:.
Cougmoo" myhi' gi ?Zhainloin: xu: jhuang: ngi da jhuang: mo lid gootu: ciwe' ayoo"? ga: tid da:.
3 Elisha gi nyang: ri ?Re" yhoem: kyoo" cang" yi jhang yhe: lho: nang yo" bue" myhoo' jhuang: akoem: ri yhe: ngho" loo we'.
4 Hau: thang: nang yo' re" yuggi zo: tang: gi yhoem: khyoo: vang lo" lho: khoem" myhid" pyam wigi jhuang: joem moo xu: foid kaid ge'- byeung" lang" ayam moo too" ge'? ga: tid da:.
5 Houg: yoomo myiyi: myhi' gi nya: yuggi zoo: tang: yo' dage" yhoem: khoug: khyoo: vang lo" lho: khoem" myhid" pyam wigi zhainloin: xu: jhuang: nu" zoo: ri yu lho: nya: yuggi zo: tang: yu lo da" jhuang: joem moo xu: foid kaid bye:.
6 Nya: miyi jhuang: dangain" ri bain kaid lang" nyang: gi ?Jhung: jo, shi" rhe"? ga: myid: da:. Nya: yuggi zoo: dayug gi ?Hau: loem: lo" thang nghoid bye:? ga: phug tid. Houg: lang" zhainloin: xu: yau zi theing: lo" byug da:.
7 Nyang: gi Lapi: Elisha jhang yhe: da:. Hau: Lapi: phoo gi nyang: ri ?Zhainloin: xu: joem ri oung" lho: re" jhen: dangain" ri xab pyam we'. Nang yo' re" yuggi zoo: tang: shid re" kangso' dei wa shid re" gi" sho' deing jo, wa? ga: tid da:.
8 Danyid" bidnyid" ri Elisha gi Shunem khyoo: yhe: da:. Houg moo: yoo" zoo: yoo" shug da" myiyi: myhi' dayug nyid. Nyang: gi Elisha ri voem: damyoo: khi: zho" da:. Hau: bidnyid mo nyang: Shunem khyoo: yhi: khang" moo" Elisha gi hau: myiyi: myhi' yhoem: moo voem: zo: da:.
9 Myiyi: myhi' gi nya: yhoem: seing: phoo ri ?Hid: khyoo: atheing: theing: lhung re" da" byu he: yug gi gyeung" shang: da" byu dayug nghoid ziri ngoo se'.
10 Khung: dang moo yab ngi dayab koid wigi yhoeb cuang- zoobui"- zhungtang - myibung: joem ri soin' byid: shang. Nyang: ngoonu" jhang lam" ri" khang" moo" houg: moo nyang: yo" theing: nyid wa nghoid da? ga: tid da:.
11 Danyid" ri Elisha gi Shunem khyoo: tau" lo" wigi lo" noo: wa shid re" nya: yab khyoo: do, lo" da:.
12 Nyang: gi nya: dei zoo: Gehazi ri hau: myiyi: myhi' ri yhe: khi: nhang: kaid. Nyang: ju" loo lang"
13 Elisha gi Gehazi ri ?Nyang: nga" eig yug ca" ziri pang" thoug byid: zi dangain" shid re" ngoo nyang: ri ciyo" koid byid: wa ein: ziri nyang: ri myid: yu" we'. Nyang: ngoo ri khokham pho jhang anghoid lang" gyizoug: pho jhang ngoo ri dang: yhe: ji byid: nhang: nau lug? ga: tid da:.
Myiyi: myhi' gi ?Ngoo gi hid moo: nga" byumyu" yi dangain" yo' nyid nyid wa ziri vho:? ga: tid.
14 Elisha gi Gehazi ri ?Houg ri ngoo nya: shid re" ciyo" koid byid: wa lha"? ga: myid: da:.
Nyang: gi ?Nyang: gi yuggi zoo: ayoo" nghoid da:. Nya: yhoem: seing: phoo gi mang: zoo: nghoid bye:? ga: tid da:.
15 Elisha gi ?Nyang: ri hid: khyoo: khe: ri" we'? ga: amyeing" byid: da:. Hau: myiyi: myhi' gi ju" vang re" lho: khoem" duang: moo: yab jo, da:.
16 Houg: lang" Elisha gi nyang: ri ?Sang: nheig he: yo, moo: re" lo, yo' yuggi zoo: vu, ci: wa? ga: tid da:.
Nyang: gi ?O" nheigboo phoo we"- jeju" mo ngoo ri amhoug. Nang gi Mangso byu nghoid da? ga: tid.
17 Nghoid loug we' Elisha tid to" ziyo' dakhyo" thang: zain hau: ayo, koo: moo: nyang: gi yuggi zoo: dayug khu: da:.
18 Zain nyid dajhi' myang" thang: shivoo: yham" yo, nab soin: danab ri yuggi zoo: gi shivoo: yham" bang: yo' dage" yoo moo nyid nyid da" nya: phoo jhang yhe: shoug" wa yhe: lo" da:.
19 Nyang: gi nya: phoo ri nyeigdain tung" ?Nga" vhuloem no- nga" vhuloem no- ga: kyi: ngau da:.?
Nya: phoo gi dei zoo: ri ?Hau: yuggi zoo: ri nya: myhi' jhang vu, loo" we'? ga: tid da:.
20 Dei zoo: gi yuggi zoo: ri nya: myhi' jhang vu, lo" da:. Nya: myhi' gi nyang: ri bid gung tu: sho' nya: shid khoin' moo vu, ci: da:. Hau: uri shid: lo" byug da:.
21 Nyang: gi yuggi zoo: ri Elisha da" yab khyoo: vu, do, lo" lho: yhoeb cuang dang moo lo" lheing: to" wigi khoem" myhid" pyam da:.
22 Hau: thang: nyang: gi nya: yhoem: seing: phoo ri khe: yu lho: nyang: ri ?Dei zoo: dayug ri hid: khyoo: loo zei: yo' nhang: kaid byid: la,. Ngoo Lapi: Elisha jhang yhi: ca" da:. Ge bui" yhi' myab wigi doem tau" loo wa? ga: tid da:.
23 Nya: yhoem: seing: phoo gi ?Nang ciwim yoomo akhid" nyid" yhi: ca" wa lha". Labain nyid" we' anghoid. Lhammoo" xain" pui" we' anghoid? ga: myid: da:.
Nyang: gi ?Ci: aca"? ga: tu" da:.
24 Hau: thang: nyang: gi loo zei: dang moo do, zhung: wigi dei zoo: phoo ri ?Loo zei: ri yo" myab yhi' myab sho' koin" we'. Ngoo atid tid gi ayoem" nhang:? ga: amyeing" byid: da:.
25 Hougsu" nyang: to' lo" wigi Elisha nyid da" Khamela boem khyoo: yhe: lo" da:.
Elisha gi nyang: re" lo ziri vi: mo myang wigi nya: dei zoo: Gehazi ri ?Yu" we' Shunem mo myiyi: myhi' re" lo da:.
26 Nya: jhang myab yhe: lho: nyang: yo' dage" nya: yhoem: seing: phoo- nya: zoo: gi yang" nyid boem la ein: ziri yhe: yu" we'? ga: tid.
Nyang: gi Gehazi ri ?Dangain" ge nyid? ga: lhoem: tid.
27 Nghoid loug we' nyang: Elisha jhang ju" vang ri" lang" nya: shidkhoin" moo goeb pid lho: Elisha khyid: moo zei: da:. Gehazi gi nyang: ri doin goin pyam wa soin' da:. Nghoid loug we' Elisha gi ?Nyid nyid baja"- nyang: nheigloem: gye" nge nyid ziri nang amyang rhe". Aseing gi ngoo ri hau: ziyo' sen: zi ci: we' atid too" nghoid da? ga: tid da:.
28 Myiyi: myhi' gi nyang: ri ?Nheigboo phoo we". Ngoo nang ri yuggi zoo: mho' yu" lha". Nga" myid byu khyoo: joem ri nang ayo" pyeing byid: wa ein: ngoo nang ri tid anghoid rhe"? ga: myid: da:.
29 Elisha gi Gehazi jhang khyoo: shu: wigi ?Myab myab koid we' nga" lhamdung: ri yu ci: wigi yhe: loo" we'. Nang shau" go" da" byu yo' doem goo" wa atheing: nyid. Nang ri dayug yug dang: lhoem: tid ri doem phug tid wa ayo, abyid:. Yhoem: khyoo: dain: za: yhe: lho: nga" lhamdung: ri yuggi nu" adang moo yhe: ke" too" we'? ga: tid da:.
30 Myiyi: myhi' gi Elisha ri ?Ngoo nang mo athu loo" wa ein: da" khyoo: ri ngoo jhug zug da" kangso' Aseing yo' nang ri ngoo jham' tang: da? ga: tid da:. Houg: lang" nya: eig yug dage" za: doem tau" lo" ago".
31 Gehazi gi shid vhu" khyoo: yhe: lho: Elisha da" lhamdung: ri zooshang: adang moo yhe: ke" too" nghoid loug we' ce: thui: we' kangso' bo lo da" avoid ci: we' aboo nghoid da:. Houg: yoomo nyang: gi Elisha jhang thu lo" wigi ?yuggi nu" aso" ri" nghoid da? ga: tid da:.
32 Elisha ju" lang" yuggi nu" gi yhoeb cuang dang moo shid: leung jo, ziri myang da:.
33 Nyang: gi khoem" myhid" pyam lho: Aseing ri akyu" mho' da:.
34 Hau: thang: nyang: gi yuggi nu" adang moo goeb lho: nya: nhoid- myojid"- lo, ri yuggi nu" da" nhoid- myojid"- lo, adang moo to" da:. Nyang: hau: yuggi nu" dang moo goeb jo, da" uri yuggi nu" da" gung gi loem lo da:.
35 Elisha to' re" lho: yab khoug: moo so" lheing yen" da:. Hau: thang: doem lo" wigi yuggi nu" adang moo doem lo" goeb nghoeb kaid da:. Yuggi nu" gi nyhed lheing: jhed: lho: nya: myojid" phang re" da:.
36 Elisha gi Gehazi ri khe: yu lho: yuggi nu" nya: myhi' ri lo" khi: loo wa shid re" nyang: ri tid kaid da:. Myiyi: myhi' ju" vang loo lang" Elisha gi nyang: ri ?Re" yuggi nu" hid: the'? ga: lhoem: tid da:.
37 Nyang: gi Elisha da" khyid: yang: moo nya: myonhoo: myidgung moo tain" sho' goeb khyo' da:. Hau: thang: nyang: gi nya: yuggi zoo: ri shu" yu wigi thu lo" da:.
38 Dalheing: ri mungdain: goin" moo phang" khoug gyo" uri Elisha gi Gilgala khyoo: tau" lo" da:. Nyang: gi Lapi: daphung: ri jhoug" shid' nyid uri nyang: gi nya: dei zoo: ri myikhyoem' dang moo oug" zeing dakhyab xug lho: houg bang: shid re" xoin" yeing jhau' byid: wa tid da:.
39 Nyangnu" mo dayug gi dain" pa: khyoo: nghang" pho shoo: yhe: lo" da:. Nyang: gi nei lam" dagam yhe: myang wigi nyang: yo" vu, nhoo' ashi" ri phyo' vu, da:. Nyang: houg joem ri vu, lo wigi houg joem gi ci: nghoid zi ase' ziyo' ajab jab yham" lho: zooxoin" oug" moo: kaid da:.
40 Hau: zooxoin" yeing ri byu joem zoo: wa khu" byid: da:. Nghoid loug we' nyangnu" zo: kaid yo' dage" Elisha ri ?He: zi myino nghoid? ga: tid kyo" lho: azoo: goo" nghoid da:.
41 Elisha gi zoo: noem dajhi' ri mho' lho: oug" khoug: khyoo: pyam zei kaid da:. Houg: lho: nyangnu" ri ?Xoin" yeing doem khu" byid: ge'? ga: tid da:.
42 Gootu: dalheing: gi byu dayug gi Bala Shalisha mo hau: zain da" yoono, seig yo' koid da" zooyho' eig xi: loem: yo' gug seig dajhi' Elisha jhang khyoo: voin re" byid: da:. Elisha gi hau: joem ri Lapi: phung: bang: ri byid: zhoo" wa shid re" nya: dei zoo: phoo ri tid.
43 Nghoid loug we' nyang: gi ?Byu dashoo: yug shid re" he: zi tham: wa ein: nang jho: rhe"? ga: tid da:.
Elisha gi ?Hau: ziri nyangnu" ri byid: zhoo" we'. Ciwim gari nyangnu" zo: lho: dayham" lang" we' deing shi" wa ga: Aseing tid da? ga: phug tid da:.
44 Houg: yoomo dei zoo: gi nyangnu" ri zoo: noem gam byid: lho: Aseing tid ziyo' dakhyo" nyangnu" dangain" bang: zo: wigi dayham" deing ashi".