3
1 Yuda khokham Yehoshaphad vhoeb zi daxe: shed zain ein: zain moo Ahab da" yuggi zoo: Yoram gi Israela khokham bue" lo da:. Nyang: gi Samari moo daxe: eig zain vhoeb nyid da:.
2 Nyang: gi Mangsoo ri yooboo shoid thougtheung da:. Nghoid loug we' nyang: gi nya: phoo yo' nya: myhi' Yezebela yhi' aca" nghoid da:. Nyang: gi Bala ri no' wa nya: phoo koid to" da" yu soolhoo: joem ri lang: phoin' lheing: pyam da:.
3 Nghoid loug we' nya: shid vhu" mo Nebad da" yuggi zoo: khokham Yeroboam yo' dakhyo" Israela byu yiri yooboo shoid jang" khyoo: shu" yhe: wigi atheing: pyam nghoid da:.
4 Moba khokham Mesha gi yang khu: yug nghoid da:. Houg: lho: Israela khokham ri jhungshug khyo" zain khang" moo" yang nu" 100,000 du: yo' yang 100,000 du: mo yang moug" joem ri byid: da:.
5 Nghoid loug we' Israela khokham Ahab shid: lang" Mesha gi Israela byu yiri thougtheung gyi koid da:.
6 Dalheing: dam khokham Yoram gi Samari mo thu wigi nya: gyidab dangain" ri zheing" yu da:.
7 Nyang: gi Yuda khokham Yehoshaphad ri ?Moba khokham gi ngoo ri gyi koid thougtheung da:. Nyang: ri gyi khaid wa jang" moo nang bo wa la"? ga: dang: foin: kaid da:.
Khokham Yehoshaphad gi ?Ngoo bo boo wa ngoo gi nang vho: khyo" nghoid wa. Nga" byu yi yo' nga" myang: joem we' nang vho: khyo" nghoid wa.
8 Ngoonu" khashoid khyoo: gyi zain: wa la"? ga: tid.
Yoram gi ?Edom dain" pyoid yoo khyoo: lid: phyed lo" da" khyoosheing: khyoo: yhi: wa zi nghoid? ga: phug tid da:.
9 Houg: yoomo khokham Yoram gi Yuda yo' Edom khokham bang: to' yhe: lo" ago". Nyhed nyid" so" yhe: thang: ri nyangnu" gyid thang byug wigi byu yi shid re" we' yoovoin voin da" gougnyhoug joem shid re" we' ci: ashug loo: goo" nghoid da:.
10 Khokham Yoram gi ?Ngoonu" gi bain bye:. Aseing gi ngoonu" soem" yug ri Moba khokham lo, khoug: moo: kaid byid: bye: nhung:? ga: tid da:.
11 Khokham Yehoshaphad gi ?Aseing ri nyang: khyo" dang: yo" myid: wa Lapi: dayug khyalang" nyid anghoid rhe"? ga: myid: da:.
Khokham Yoram da" gyizoug: gi ?Shaphad da" yuggi zoo: Elisha hid: moo: nyid da:. Nyang: gi Elia ri pang" thoug yug nghoid? ga: phug tid da:.
12 Khokham Yehoshaphad gi ?Nyang: gi deingmain" da" Lapi: nghoid? ga: tid. Houg: yoomo khokham soem" yug gi Elisha jhang yhe: ago".
13 Elisha gi Israela khokham ri ?Ngoo gi nang ri ciwim yoomo pang" wa la". Re" phoo yo' re" myhi' eig tang: dang: lhung myid: da" hau: Lapi: yi jhang dang: yhe: myid: we'? ga: tid da:.
Yoram gi ?Anghoid ngoonu" khokham soem" yug ri Moba khokham lo, khyoo: kaid byid: yug gi Aseing nghoid da? ga: phug tid da:.
14 Elisha gi ?Ngoo gi re" bidnoem Yuda khokham Yehoshaphad ri aphoug" myang: nghoid rigi ngoo dei byid: nyid da" kangso' Aseing myeing ri lang: wigi nang yo' ngoo ci: asen: wa ein: ngoo jham' tang: zi nghoid.
15 Akhid" ngoo ri teing baid, su: khi: byid: we'? ga: tid.
Teing baid su: gi nya: teing ri baid nyid uri Aseing da" yoem: so' gi Elisha dang moo ju" re" da:.
16 Houg: lho: nyang: gi ?Aseing hid: su" ga: tid ?He: gyid kain" jo, da" gyid zoo: lang moo gyid khyoo" joem cang du: we'.
17 Nanu" moug: vo ziyo' lid moid ziri amyang nghoid rilang" he: gyid zoo: lang gi gyid byeung" loo wa. Houg: lho: nanu" we' nanu" da" gougnyhoug yo' nanu" da" yoovoin voin da" gougnyhoug joem agoin agoo" gyid shoug" shug ri" goo" wa?? ga: tid da:.
18 Elisha gi xo' lho: ?Nghoid loug we' Aseing shid re" he: zigi gye" lei da" moo" nghoid da:. Nyang: gi nanu" ri Moba byu yi atho' moo oung: doid nhang: wa.
19 Nanu" gi nyangnu" da" yung" da" gyidab voomoo" joem dangain" ri oung: pyam wa. Nanu" gi nyangnu" da" shigam joem ri thug lheing: pyam lho: nyangnu" da" gyid bug dangain" ri toem' pyam wa. Nyangnu" da" moug: nu" myid nu" da" yoo dain" dangain" ri lug boem joem yo' boem" pyam ri" goo" wa? ga: tid.
20 Thang: nyid" nab soin:- nab soin: xoin" to' byid: da" ayo, moo gyid gi Edom shoid khyo" yau lo wigi myidjang ri yau nghoeb pyam da:.
21 Moba byumyu" yi hau: khokham soem" yug nyangnu" ri gyi re" zain: wa ju" loo bye: da" khyoo: ri shoug" gyoo: lang" apyaid gyi: thang jang" mo zi nge thang da" yuggi yi mo gyi jonu" yo" ci: bang: dangain" ri khe: zheing" yu lho: mougkyoo" moo nyid nyid boem ago".
22 Hau: thang: nyid" nab soin: ri nyangnu" to' re" boem ri bid gi gyid tho' moo zho: nyid wigi suid" yhang: ti" bue" jo, da:.
23 Nyangnu" gi ?Suid" nghoid o". Gyi voo soem" yug da" gyidab joem gi nyang: cang" nyang: zain: go" lho: said go" zi nghoid abye:. Nyangnu" dab joem khyoo: yhe: lho: lanyhoeb yhe: yu shang? ga: tid ago".
24 Nghoid loug we' nyangnu" dab khyoo: ju" yhi: lang" Israela byumyu" khaid thu kaid ago". Israela byumyu" yigi cang khaid lho: Moba byu yiri said pyam ago".
25 Houg: lho: nyangnu" voomoo" joem ri phyo' shoin' pyam ago". Nyangnu" gi hau: moug: nu" myidnu" da" yoothung" dain" khyoo: lid: lo" nyid boem uri Israela yugkhang" moo" gi hau: yoothung" joem dangain" moo lug boem byeung" sho' du" zei ago". Nyangnu" gi gyid thung" joem ri we' jhid pyam wigi shigam ri we' thug lheing: pyam ago". Lo" thang moo voomoo" Kira Heresa za: dadeing lo: da:. Lug lhei" pyi' lhei" bang: gi hau: ziri vang: to" wigi khaid zain: ago".
26 Moba khokham gi gyipui" soem" bye: ziri boin: lang" nyang: gi shamcoin" ci: da" sarhi' nyhed shoo: yug ri nyang: yo' dage" shu" yu wigi gyivoo yi phung: gung khyo" Suri khokham jhang phang: loid yhi: wa soin' da:. Nghoid loug we' nyang: soem" byug da:.
27 Houg: yoomo nyang: gi nya: gung khoo: moo: khokham xo' koid wa yug nya: zooshid" yuggi zoo: ri vang khyam: dang moo xoin" to' byid da:. Israela byu yigi gyoug dain pyam ago". Houg: yoomo nyangnu" gi hau: voogung mo zoid phang: lho: nyangnu" nya: mung" khyoo: tau" lo" ago".