1 Levi yhoemkhung: mo vhujhung: yigi khainjung Eleaza- Nun da" nya: yuggi zoo: Yoshu yo' Israela byumyu" kung: dangain mo yhoemkhung: yi da" vhujhung: yi jang" khyoo: yhe: ago". 2 Nyangnu" gi Khanan mung" Shilo voomoo" moo: houg: bang: ri ?Aseing gi Moshe nhoid khyo" ngoonu" nyid wa shid re" voomoo" yo' hau: lheing khoem moo: ngoonu" yhoem: gougnyhoug joem shid re" mhain" nu" yoo jangpa: yo' dage" byid: wa ga: amyeing" byid: to" da? ga: tid boem. 3 Houg: yoomo Israela byumyu" yigi Aseing amyeing" ri cang wigi Levi byumyu" yiri voomoo" dayham" yo' mhain" nu" yoo jangpa: joem ri nyangnu" mougmyid joem mo kho' byid: da:.

4 Levi byumyu" yhoemkhung: bang: mo Kohad kung: ri voomoo" joem xang: shi" kho' gam byid: da:. Khainjung Arun da" amyed ashen yi yhoemkhung: ri Yuda- Simun yo' Benyamin byumyu" yi da" mougmyid mo daxe: soem" voo kho' gam byid: da:. 5 Kohad kung: mo deing da" mo, rigi Ephrim- Dan yo' bidvang shoid mo Manashe byumyu" yi mougmyid joem mo daxi: voo kho' gam byid: ago".

6 Gershon kung: rigi Ishakha- Ashera- Napthali yo' bidthu shoid mo Manashe byumyu" yi mougmyid joem mo daxe: soem" voo kho' gam byid: ago".

7 Merari kung: mo yhoemkhung: yiri gi Ruben- Gad yo' Zebulun byumyu" yi mougmyid mo voomoo" daxe: eig voo kho' gam byid" ago".

8 Israela byumyu" yigi Aseing wigi Moshe nhoid khyo" amyeing" byid: to" ziyo' dakhyo" me" lab lho: he: voomoo" joem yo' nyangnu" da" mhain" nu" yoo jangpa: joem ri Levi byumyu" yiri kho' gam byid: ago".

9 Hid joem gi Yuda yo' Simun byumyu" yi da" mougmyid joem mo voomoo" joem da" myeing nghoid. 10 Hid: joem gi Levi mo gyoo" lo da" Arun da" amyed ashen yi nghoid da" Kohad kung: yiri byid: to" da" mougmyid joem nghoid. Nyangnu" ri xang: shi" gamboem kho' gam byid: da:. 11 Nyangnu" ri Arba voomoo" ri byid: da:. (Arba gi Anag da" nya: phoo nghoid). Yuda boem moug: moo jo, wigi akhid" Hebron ga: myheing da" voomoo" yo' hau: lheing khoem moo jo, da" mhain" nu" yoo jang: pa: we' dage" byid: ago". 12 Nghoid loug we' voomoo" mo dain" joem voogung joem ri Yephune da" nya: yuggi zoo: Khaleb gi nya: mougmyid jonu" khyo" byid: too" gu nghoid bye:.

13 Hebron (phang: goug" voomoo" joem mo davoo) yo' houg: tho' agoo" vhoo: mo voomoo" joem gi khainjung Arun da" amyed ashen yiri kho' gam byid: zi nghoid. Houg: joem gi Libna- 14 Yatira- Esthemoa- 15 Holon- Debira 16 Ain- Yuta- Bed Sheme yo' hau: joem da" mhain" nu" yoo jang: pa yo' dage" Yuda yo' Simun byumyu" yi da" voomoo" joem mo voomoo" gau voo bo da:. 17 Benyamin mougmyid mo nyangnu" ri voomoo" myid: voo byid: da:. Hau: joem gi Gibeon- Geba- 18 Anathod- Alamon voomoo" joem yo' houg: mo mhain" nu" yoo jangpa: joem ri we' bo da:. 19 Mhain" nu" yoo jang: pa: yo' dage" voomoo" dangain" daxe: soem" voo ri Arun da" amyed ashen yi nghoid da" khainjung yiri byid: ago".

20 Levi byumyu" Kohad kung: mo gootu: yhoemkhung: yigi Ephrim mougmyid mo voomoo" dayham" ri kho' gam byid: ago". 21 Nyangnu" ri voomoo" myid: voo byid: ago". Hau: joem gi Ephrim boem moug: mo Shekhem yo' mhain" nu" yoo jang: pa: (phang goug" voomoo" joem mo davoo nghoid da)- Gezera- 22 Kibzim- Bed Horon yo' houg: mo mhain" nu" yoo jang: pa joem nghoid da:. 23 Dan mougmyid mo nyangnu" ri myid: voo byid: da:. Hau: joem gi Elateke- Gibethon- 24 Aiyalon- Gathrimon yo' houg: mo mhain" nu" yoo jang: pa: joem nghoid da:. 25 Bidvang shoid mo Manashe byumyu" yi da" mougmyid mo nyangnu" ri eig voo byid: da:. Hau: eig voo gi Tanag- Gathrimon yo' houg: mo mhain" nu" yoo jang: pa: joem nghoid ago". 26 He: Kohad kung: mo yhoemkhung: bang: gi dangain" ri voomoo" daxi: yo' hougmo mhain" nu" yoo jang: pa: joem ri shau" yu ago". 27 Levi byumyu" gootu: daphung: nghoid da" Gershon kung: yigi bidthu shoid mo Manashe byumyu" yi mougmyid mo voomoo" eig loem ri shau" yu boem ago". Hau: eig voo gi Bashan mung" mo Golan (Phang goug" wa voomoo" joem mo davoo nghoid da) Beesthera yo' houg: mo mhain" nu" yoo jang: pa: joem nghoid da:. 28 Ishakha byumyu" yi mougmyid mo voomoo" myid: voo ri nyangnu" shau" yu ago". Hau: joem gi Kishon- Daberad- 29 Yarmud- Enganim yo' hau: joem mo mhain" nu" yoo jang: pa: joem nghoid ago". 30 Ashera byumyu" yi mougmyid mo voomoo" myid: voo: ri nyangnu" shau" yu ago". Hau: joem gi Mishala- Abdon- 31 Helakad- Rehob yo' houg: mo mhain" nu" yoo jang: pa: joem nghoid ago". 32 Napthali byumyu" yi mougmyid mo voomoo" soem" voo ri nyangnu" shau" yu ago". Hau: joem gi Galile mung" mo Kedesha yo' hougmo mhain" nu" yoo jang: pa: (Phang goug" wa voomoo" joem mo davoo nghoid)- Hamod Dora- Kartan yo' houg: mo: mhain" nu" yoo jang: pa: joem nghoid ago". 33 Gershon kung: mo yhoemkhung: yigi dangain" ri voomoo" daxe: soem" voo yo' hau: joem mo mhain" nu" yoo jang: pa: joem ri shau" yu boem ago".

34 Levi byumyu" yi mo deing da" kung: bang: nghoid da Merari kung: bang: gi Zebulun byumyu" yi da" mougmyid mo voomoo" myid: voo ri nyangnu" shau" yu boem ago". Hau: joem gi Yokneam- Karta 35 Dimna- Nahala yo' houg: mo mhain" nu" yoo jang: pa: joem nghoid ago". 36 Ruben byumyu" yi mougmyid mo voomoo" myid: voo ri nyangnu" shau" yu boem ago". Hau: joem gi Bezera- Yahaza 37 Kedemod- Mephad yo' houg: mo mhain" nu" yoo jang: pa: joem nghoid ago". 38 Gad byumyu" yi mougmyid mo voomoo" myid: voo ri we' nyangnu" shau" yu da:. Hau: joem gi Gilead mung" mo Ramod yo' houg: mhain" nu" yoo jang: pa: (Phang goug" wa voomoo" joem mo davoo nghoid da)- Mahanaim- 39 Heshbon- Yazera yo' houg: mo mhain" nu" yoo jang: pa: joem nghoid da:. 40 Hougsu" Merari kung: mo bang: ri voomoo" dangain" ri daxe: eig voo kho' gam byid: da:. 41-42 Israela byumyu" yi seing: da" mougmyid mo voomoo" myid: xe: shed voo yo' houg mo mhain" nu" yoo jang: pa: joem ri Levi byumyu" yiri byid: ago".

43 Houg: lho: Aseing gi byid: wa ga: nyangnu" phoug" phyid yiri geing: teing da" dangsoo" byid: too" byid: da" mougmyid dangain" Israela byumyu" yiri byid: da:. Nyangnu" hau ziri shau" seing: yu boem lang" houg moo de: nyid boem ago". 44 Nyangnu" phoug" phyid" yiri dangsoo" byid: to" ziyo' dakhyo" Aseing gi mungdain: goin" ri yug yo khyoo: nyangnu" ri byid: bye:. Nyangnu" da" gyivoo yi dangain" mo dayug we' gyi ayo" khaid goo" nghoid ago". Ciwim gari Aseing gi Israela byumyu" yiri nyangnu" gyivoo yi dangain" mo dang moo oung: nhang: da:. 45 Aseing gi Israela byumyu" yiri nyang: byid: to" da" dangsoo" joem mo ja: khang" moo" ri zei: pyeing byid: da:.