1-2 Hau: thang: Aseing gi Israela byumyu" yiri tid kyoo" wa shid re" Yoshu ri ?Nanu" ri tid kyoo" wa shid re" Moshe ri ngoo amyeing" byid: da" phang: khoug: wa voomoo" joem ri khyen: we'. 3 Byu dayug gi pa: yhi: anghoid looza: byu dayug yug ri zang" said pyam rigi nyang: houg: khyoo: yhe: wigi latoo: phug wa sho: yen" su: da" lo, mo phang: loid: wa zi nghoid. 4 Nyang: gi hau: voomoo" joem mo daloem: loem: khyoo: phang: yhe: wigi voomoo" khoem" duang: mo dang: phyed joyoo khyoo: yhe: lho: bue" loo bye: da" khyoo: ri vhujhung: yiri yhe: tid kyoo" wa zi nghoid da:. Houg: lang" nyangnu" gi nyang: ri voomoo" khoug: khyoo: vang nhang: wigi nyang: houg: moo yo" nyid wa shid re" nyang: ri joyoo byid: wa. 5 Latoo: phug wa yug houg: khyoo: nya: jhang cang re" nghoid rigi hau: voobyu yigi nyang: ri hau: yug lo, khyoo: age ab pyam nghoid da:. Nyangnu" gi nyang: ri goem loem byid: ca" da:. Ciwim gari hau: yug gi pa: yhi: koid wigi we' nheig yo: wigi we' said pyam zi anghoid. 6 Nyang: gi hau: voomoo" moo: shava phung: shidkhoin" moo: tarha" dang: phyed da" ayo, ju" sho' we' hau: ayo, ri khainjung koid nyid da" su: shid: da" ayo, ju" sho' we' yo" nyid nyid da:. Hau: thang: byu hau: yug gi nyang: phang: re" da" nya: voogung khyoo: yo" doem tau" lo" da? ga: tid.

7 Houg: yoomo nyangnu" gi Yodan gyid lang bidvang shoid Napthali boem moug: Galile mo Kedesha- Ephrim boem moug: mo Shekhem yo' Yuda boem moug: mo Hebron voo joem ri gootu: khyen: to" ago". 8 Yodan gyid lang bidthu shoid- Yerikho bidthu shoid bougdoem jang: pa dain" pyoid yoo moo Ruben byumyu" yi da" mougmyid mo Bezera- Gad byumyu" yi da" mougmyid Gilead mo Ramod- Manashe da" mougmyid Bashan mung" mo Golan voomoo" joem ri khyen: yu ago". 9 He: voomoo" joem gi Israela byumyu" yi dangain" yo' nyangnu" akhoug: moo: nyid da" tungbau byu hang" shid re" we' phang: goug" wa voomoo" khyo" khyen: to" zi nghoid da:. Byu dayug yug ri pa: yhi: anghoid looza: zang" said da" yugkhang" moo" ri latoo phug wa sho: yen" su: da" lo, mo goem loem yu wa shid re" houg moo shau" nyid wa zi nghoid. Nyang: ri shi" shava phung: shidkhoin" moo: tarha" dang: aphyed yu" looza: age said pyam nghoid da:.