4
1 Aseing tid zigi ?Israela byumyu" yi we"- nanu" lheing: loo nhau boem nghoid ri nga" jhang lheing: tau" phang: loo we'. Nanu" gi ngoo ri jhug zug wigi ngoo ngheing" da" yu phara" soolhoo: joem ri yu pyam boem nghoid rigi
2 Nanu" gi nga" da" myeing lang: wigi jham' tang: zigi jo boem wa. Houg: lang" byumyu" dangain" bang: gi nyangnu" ri mainkaid byid: wa shid re" ngoo ri tid loo goo" wa. Houg: lho: nyangnu" gi ngoo ri coung" loo goo" wa? ga: tid da:.
3 Aseing gi Yuda yo' Yerusalem voobyu yiri tid zigi ?To" lham' to" da" nanu" da" yoothung" joem ri phug pyam we'. Nanu" da" shivoo myoug: shi" joem ri zu kyen: gam gyoo: cang ashoo" goo".
4 Yuda yo' Yerusalem mo byu yi we"- nanu" da" Aseing ngoo yo' dang: theing to" ziri zoem: ci: ge'. houg: lho: nanu" nya: gung ngoo ri shugbyid: we'. Hougsu" akoid boem lang" nanu" koid da" akhyeing" ashoeb da" moo" joem yoomo nga" da" nheig yo: zigi myi: yhang: ti" nge" loo wa. Hougsu" nge" dab lo wigi hau: ziri hang" wigi we' ayo" said pyam goo" wa? ga: tid da:.
5 Damung" goin" moo laboo" moid kaid ge'
Thui: zeing yo' jang jang za: nyhoo: we'.
Yuda yo' Yerusalem mo byu yiri gyi pyuzung- vang khyam: kyam' to" da" voomoo" joem
Khyoo: tang" phang: wa shid re" tid kyoo" we'.
6 Ziun yhi: khyoo: ri toin" shed we'.
goem loem wa shid re" tang" phang: ge'. Ane" nyid goo".
Aseing gi mougzhung: shoid khyo" byo, yoin" ziyo'
phyo' shoin' pyam khyoo: gyi" sho' zi shu" gyo" loo wa.
7 Byumyu" mungdain: ri phyo' shoin' su: gi
gau" nyid da" joyoo mo thu' lo da" khangkhyi yhang: ti" thu loo bye:.
Nyang: gi Yuda ri phyo' shoin' pyam loo wa.
Yuda voomoo" joem gi byo, yoin" jo, da" joyoo moo she: pyam to" zi shoug" loo goo" wa.
Houg: lho: hau: voomoo" joem moo hang" anyid goo" wa.
8 Houg: yoomo jid moo" byimi void wigi ngoug ge'. koug myeing nyid ge'.
Ciwim gari Aseing da" gyoug pho" nheig yo: zigi Yuda mo alheing: thu lo" byug shi" nghoid da:.
9 Aseing tid zigi ?Hau: bidnyid mo khokham yi yo' moo" voin zoug: yigi voem" da" myid byug byug wigi khainjung yi dain mo, lo" ziyo' Lapi: yigi mau" byug goo" wa? ga: tid.
10 Hau: thang: ngoo gi ?Yoem: moo" bo da" Aseing we"- nang gi Yerusalem mo byu yiri bain sho' mhau pyam bye:. Nang gi yug yo myenjham" khyoo: jo, loo wa ga: tid da:.- Nghoid loug we' shamcoin" dacam" gi nyangnu" da" khyung" kang: moo dajo, jo, da:.
11 Yerusalem mo byu yiri dain pyoid yoomo lid loung gi nyangnu" jhang hau' lo nyid da ga: tid shed da" ayo, ju" loo wa. Hau: zigi phei" ri za: moid hau' pyam da" lid zoo" gi yen yoo" za: moid wa zi anghoid wa.
12 Aseing da" amyeing" khyo" ju" lo da lid gi hau: tho' je thain: da" zi nghoid wa. Hau: zigi nya: byumyu" yiri dang: phyed khyoo: tid fu" da" Aseing nyang: nghoid loo wa.
13 Yu" ge'- gyivoo gi jhoemmoug" joem yhang: ti" lo nyid da:. Nya: da" gyi myang: rheing" joem gi lid shoem' yo' du ago". Houg: lho: nya: da" myang: joem gi zoin bung: joem tho' myab da:. Ngoonu" gi soem" wa bye:. Ngoonu" gi joem: wa bye:.
14 Yerusalem we" nang khyoid yu shoug" wa shid re" re" da" nheigloem: khoug: mo akhyeing" ziri cid" pyam we'. Nang gi khamyhang myang" sho' yooboo moo" ri xo' myid nyid wa la".
15 Dan voomoo" mo yo' Ephrim boem joem mo lu dang: voin da" lagyoo: yigi age da" lu dang: ri tid fu" ago".
16 Nyangnu" gi byumyu" yi yo' Yerusalem ri ve: da" mung" damung" mo gyivoo yi re" nyid boem da" khyoo: ri tid poin" wa shid re" re" lo ago". He: gyivoo joem gi Yuda voomoo" joem ri re" thougtheung nyhoo: goo" wa.
17 Houg: lho: yoothung" dain" daloem: ri lhoug zung" nyid da" byu joem yhang: ti" Yerusalem ri re" lheing khoem lhung too" goo" wa. Ciwim ga: ri nya: voobyu yigi Aseing ri thougtheung gyi koid bye:. Aseing tid too" bye:.
18 Yuda we" nang gi nanyang: nyid da" avoid yo' nang koid da" moo" joem khyo" wigi he: ziri nanya: gung moo tu: voin yu abye:. Re" da" yooboo gi he: yau: khi" ri bui" nhang: bye:. Hau: zigi nang ri nheigloem: moo thau" kyang nhang: bye:.
19 Dam noo- dam noo ri ngoo atho' zeing: kham.
Nga" seing" nyang: we"- Nga" seing" gug gi gye" thung" nyid.
Ngoo gi sam: zoo: ayo" tam" too".
Ngoo gi laboo" joem thui: yo'
meing: zain: jang: mo thui: ri shau" gyo:.
20 Byo, yoin" zi daja: bain daja: cang lo da:.
Da mung" goin" zigi byo, yoin" jo, bye:.
Ngoonu" da" zoem" joem gi nyeigdain tung" phyo' shoin' pyam zi shoug" bye:.
Nyangnu" da" yabkyo' pain" ruang: joem gi amyhoo: myhoo: ceig pyam zi shoug" bye:.
21 Thain: da" gyi khaid meing: zain: pui" ziri khamyhang myang" sho' ngoo shau" myang ca" wigi
Laboo" moid myheing ziri khamyhang myang" sho' shoug" gyoo: ca" wa la".
22 Aseing tid zigi ?Nga" byumyu" yigi nheig agyeing: nghoid ago".
Nyangnu" ngoo ri asi' nghoid da:.
Nyangnu" gi ko" da" zooshang: yi yhang: ti" nghoid boem.
Nyangnu" moo Lasi Lajhang: se' gyo: myid aboo nghoid da:.
Nyangnu" gi akhyeing" da" moo" koid wa gye" jhang: ago".
Nghoid loug we' nyangnu" gi ge zi koid wa abui" adoid nghoid da? ga: tid.
23 Ngoo gi mougmyid gyab khyoo: yu" kaid ri. Hau: zigi jham" coug: youg kyug jo, da:.
Mougkhung: khyoo: yu" kaid ri houg moo bidbang ajo, nghoid da:.
24 Ngoo gi boem joem khyoo: yu" kaid- hau: joem gi lei" nyid da:.
Houg lho: bouggung joem gi thei: shoid he: shoid byam' zhang" nyid da:.
25 Ngoo gi houg moo byu anyid ziri shau" myang.
Ngho' joem lang" dang: phang: byug abye:.
26 Myidxu: ge da" mougmyid gi dain" pyoid yoo bue" byug bye:.
Houg mo voomoo" joem gi Aseing da" gyoug pho" nheig yo: da" gang moo
byo, yoin" jo, abye:.
(
27 Aseing gi mougmyid dagyab goin" ziri jham" coug: youg moug: kyug bui" nhang: wa nghoid loug we' nyang: gi hau: ziri bain sho' aphyo' shoin' pyam wa ga: tid too" bye:.)
28 Moug: myid gi koug ngau loo wa
mougkhung: gi ceig no, loo wa.
Aseing gi tid too" bye:.
Houg: lho: nya: myid ri athid wa.
Nyang: gi myid nheigloem: myid phyed too" bye:.
Houg: lho: adoem tau" loo wa.
29 Myang: jui: bang: thui: yo' lid: ci: bang: thui: ri shoug" gyoo: lang"
yugkhang" moo" gi tang" phang: loo" goo" wa.
Dayham" gi seig moo" yoo khyoo: tang" phang: loo" goo" wa.
Gootu: gu: gi loug pyo' joem dang khyoo: do, lo" boem goo" wa.
Voogung khang" moo" gi akoem: too" kho' zi shoug" wa.
Houg: lho: hang" we' hau: jang" moo adoem nyid loo goo" wa.
30 Yerusalem we"- nang gi joem: lo" abye:.
Nang gi phe" pain" byimi ciwim shoung: void ci: la".
Ciwim yoomo phoug" dab lug ri shoung: void ci: wigi myojid" moo xau" ci: la".
Nang gi nanya: gung ri ci: anghoid da" shid re" yung" sho' shoung: ci: da:.
Re" da" jheddab zooyam phoo joem gi nang ri ngeug he: pyam abye: go".
Houg: lho: nyangnu" gi nang ri said pyam nau ago".
31 Ngoo gi zookhu: noo no nyid da" myiyi: dayug kyi: ngoug ziri shau" gyo:.
Zooshid" ri khu: nyid da" myiyi: dayug kyi: nyho: nyid da" thui: yhang: te" ziri shoug" gyo.
Hau: zigi so' moo" she: nyid da" Yerusalem da" ngoug myheing" thui: nghoid da:.
Nyang: gi nya: lo, ri yhoin" kaid wigi
?Ngoo gi joem: bye:. Nyangnu" gi ngoo ri said pyam wa ga: re" lo nyid bye: go"? ga: tid nyid da:.