3
Jhug Azug da" Israela
1 Aseing tid zigi ?Yuggi dayug gi nya: da" yhoem: seing: myhi' ri kang" pyam wigi hau: myiyi: gi gootu: yuggi dayug da" yhoem: seing: myhi' bue" lo" nghoid ri nyang: we' adoem ge yu loo wa. He: moo" zoo" gi mougmyid ri bain sho' ayung" alho' bui" nhang: loo wa. Nghoid loug Israela we"- nang gi zooyam phoo myoo" sho' yug yo" lid: lo abye:. Houg: lho: akhid" nang gi nga" jhang doem tau" phang: loo nau da:.
2 Boug gung khang" moo" khyoo: yu" kaid we' nang gi shava myhi' yhang: ti" akoid lid: lo da" joyoo daloem: jo, ashi" rhe". Arab byu dayug gi dain" pyoid yoo moo gau" lhoem: nyid yhang: ti" nang gi fu" moo" khyoo: yam cang wigi zooyam phoo joem ri lang" nyid da:. Nang gi re" shava myhi' moo" wigi hau: mougmyid ri ayung" alho' koid pyam abye:.
3 Hau: gang mo moug: gyid ri toem' pyam wigi xung" ri moug: zoo" agyoo" loo:. Nang gi shava myhi' yo' du wigi sho' ga: zi asi nghoid da:.
4 ?Houg: lho: akhid" nang ngoo ri ?Nang gi nga" phoo nghoid wigi ngoo zooshang: yo, mo ngoo ri nang jheddab lo abye:.
5 Nang gi khanham we' nheig yo: nyid wa zi anghoid. Nang gi ngoo ri apyaid atoo: moo nheig yoo: wa anghoid.? ga: tid da:. Israela we" he: zigi nang tid zi nghoid da- nghoid loug we' nang gi akhyeing" ashoeb ziri yo" koid yhi' koid da:.
6 Yoshia khokham bue" nyid uri Aseing ngoo ri ?Hau: jhug azug da" myiyi: Israela cikoid ziri nang shau" myang bye: rhe". Nyang: gi nga" jang" mo phug lo" wigi myhang: da" bouggung khang" moo" dang moo yo' nyau young" da" seiggam yoeb khang" moo" moo nyang: gi shava myhi' yhang: ti" koid da:.
7 Nyang: gi he: gu: dangain" ri bain koid thang: nga" jhang gyeing" nyang: tau" phang: loo wa ein: ngoo myid jho:. Nghoid loug we' nyang: gi alheing: tau" loo. Houg: lho: nya: da" jhug azug da" bi: nhung" Yuda gi hau: gu: dangain" ri shau" myang da:.
8 Nyang: gi hougsu" ngoo mo phug lo" wigi shava myhi' bue" byug da" gang mo Israela ri ngoo kang" pyam wigi phang: nhang: pyam bye: ziri we' Yuda shau" myang da:. Nghoid loug we' Israela da" jhug azug da" bi: nhung" Yuda gi agyug nghoid da:. Nyang: we' shava myhi' bue" re" wigi
9 nyang: gi dajhi' we' asho' nghoid da:. Nyang: gi hau: mougmyid ri ayung" alho' koid pyam wigi lugzeing yo' seiggam joem ri no' da" khyo" myi: shoid lang shoid da:.
10 He: gu: dangain" bain thang: ri Israela da" jhug azug da" bi: nhung" Yuda gi nga" jhang doem lheing: tau" loo goin koid mhoug wigi gyeing" ga: ri hougsu" anghoid. Ngoo Aseing tid bye:.
11 Hau: thang: Aseing gi ngoo ri Israela gi nyang: mo lheing: phug loo" nghoid loug nyang: gi jhug azug da" Yuda tho' je ge shi" khyoo: ri ci: shug da:.
12 Nyang: gi ngoo ri Israela jhang yhe: wigi hid su" ga: tid nhang: da:. ?Jhug azug da" Israela we"- nga" jhang doem tau" loo we'. Ngoo gi nheig khyeug myid bo wigi nheig ayoo: wa. Ngoo gi nang ri apyaid atoo: moo nheig yo: nyid wa anghoid.
13 Nang yooboo yoo" bye: ein: ziyo' re" Aseing Mangsoo ri nang thougtheung gyi koid bye: ein: ziri za: kham: yu we'. Nyoug yung" da" seiggam yoeb khang" moo" moo tungbau yu phara" joem ri re" jheddab myid byid: pyam bye: ein: ziyo' nang gi nga" amyeing" dang: joem ri atam" gyoo: ein: ziri yooboo yhen: yu we'. Ngoo Aseing tid too" bye:.
14 Jhug azug da" byumyu" yi we"- doem tau" loo ge'. Nanu" ri ngoo seing: zi nghoid. Ngoo gi nanu" ri voogung khang" moo" mo dayug yug- byumyu" kung: khang" moo" mo eig yug yug ri Ziun boem khyoo: doem shu" tau" yu wa.
15 Ngoo ri tam" gyo: cang nyid da" vhoebkhang" bang: ri nanu" shid re" ngoo byid: wa. Nyangnu" gi nanu" ri phajhi" yo' Lasi lajhang: khyo" vhoeb loo goo" wa.
16 Hau: thang: nanu" gi hau: mougmyid moo myo: je: ri" lang" byumyu" yigi nga" Dang: Theing Kuid: da" khyoo: ri alhung tid loo goo" wa. Nyangnu" gi hau: khyoo: ri amyid loo: goo" wa aboin: loo goo" wa. Nyangnu" gi hau: ziri lang" aci: ca" loo goo" wa. Nyangnu" gi gootu: daloem: we' akoid loo goo? wa.
17 Hau: ayo, ju" loo lang" Yerusalem ri ?Aseing da" zhungtang? ga: myheing loo goo" wa. Houglho byumyu" yigi hau: joyoo moo ngoo ri noku wa zeing: foem: loo goo" wa. Nyangnu" gi nyangnu" da" nheigloem: thain: ziyo' akhyeing" da" nheigloem: wigi tid da" khyoo: ri kha nham' we' acang koid loo goo" wa.
18 Israela gi Yuda yo' xo' tei" wigi nya: eig yug gi mougzhung: shoid mungdain: mo pyoung" nyhid: to" jang" mo dage" phang: lo lho: nanu" da" phoug" phyid" yiri apyaid atoo: mo jonu" khyo" ngoo byid: to" da" mougmyid khyoo: tau" phang: loo goo" wa? ga: tid.
19 Aseing tid zigi
?Israela we"- ngoo gi nang ri nga" zooshang: khyo" khab yu nau da:.
Houg: lho: nang ri nyid pyoo: tung" da" mougmyid-
moug: gyab goin" mo young" thang da" mougmyid ri byid: nau da:..
Ngoo gi nang wigi ngoo ri phoo we" ga: yoid wigi
ngoo mo khanham we' aphug loo" wa ziri vho: da:.
20 Nghoid loug we' nang gi jhug azug da" myi' zeing yhang: ti"
Ngoo ri nang jhug azug nghoid da:.
21 Boug gung tho' joem mo lu: fu: thui: dathui: shoug" gyoo: bye:.
Hau: zigi Israela byumyu" yi yooboo shoid da" kangso' dei gyung: khyoo: moo nyid wigi
Nyangnu" Aseing Mangsoo ri to" myhid pyam boem yoomo
ngau wigi mho' yoid boem da" thui: nghoid da:.
22 Aseing mo lheing: phug loo" bang: nanu" dangain" doem tau" loo we'.
Nyang: gi nanu" noo byang" byid: lho: jhug zug nhang: loo wa.
Nanu" tid zigi ?Nghoid bye:. Nyang: gi ngoonu" da" Mangsoo nghoid yoomo ngoonu" gi Aseing jhang loo" wa.
23 Ngoonu" gi bouggung joem mo ngoonu" no' da" tungbau noku thung" khyo" wigi ce: pang" thoug ziwe' ashau" yu. Ngoonu" Aseing Mangsoo mo za: Israela shid re" pang" thoug zi shoug" yu da:.
24 Nghoid loug we' asho' ashid: da" yu phara" Bala ri no' zigi ngoonu" da" coidbaid kyung- yang kyung yo' nu: kyung joem yuggi zoo:- myiyi: zoo: yi soem" thang loo" nhang: wigi goonham" yo' mo ngoonu" da" phoug" phyid" yi moo" zei: wigi shoug" to" zi ja: khang" moo" soem" pyam bye:.
25 Ngoonu" gi sho' zi' yo' leung jo, wigi ngi yoem" zigi ngoonu" ri" nghoeb boem" pyam ge da:. Ngoonu" Aseing Mangsoo ri khanham we' yooboo shoid lid lo boem bye:. Ngoonu" gi nya: da" amyeing" dang: joem ri khanham we' alhung cang nyid goo" nhung? ga: tid ago".