23
1 Nya: byumyu" yiri phyo' shoin' pyam wigi khaid sain" pyam da" vhoebkhang" da" bang: adang moo Aseing da" dang: phyed zigi khayhi' gyoug pho" zi nghoid la".
2 He: zigi nya: byumyu" yiri yu" goin coung: byid: da" vhoebkhang" bang: yo' sen: wigi Israela Aseing Mangsoo tid to" zi nghoid da:. Hau: zigi ?Nanu" gi nga" byumyu" yiri agoin' coung: byid: nghoid ago". Nanu" gi nyangnu" ri abyoo asain" koid pyam wigi khaid lham' pyam da:. Akhid" ngoo gi nanu" koid lo da" akhyeing" da" lo, moo" shid re" yooboo dam byid: loo wa.
3 Ngoo gi nyangnu" ri ngoo wigi nyhid: sain" to" da" mungdain: joem moo deing da" nga" byu yiri zheing" yu lho: nyangnu" yhoem: moug: khyoo: doem shu" tau" loo byid: wa. Nyangnu" gi zooshang: myoo" sho' yo" wigi myo: je: loo goo" wa.
4 Nyangnu" ri goin coung: byid: wa shid re" vhoebkhang" bang: ri ngoo moo" foin: too" wa. Nga" byumyu" yigi gyoug zi dain zi khanham we' ashoug" loo goo" wa. Ngoo nyangnu" ri yooboo dam adoem byid: loo wa. Ngoo Aseing tid too" bye:? ga: tid da:.
5 Aseing tid zigi ?David da" amyed ashen mo deingmain" da" byu dayug ri khokham khyo" khyen: yu wa ayo, ju" lo nyid bye:. Hau: khokham gi phajhi" boo boo za: vhoeb wigi mungdain: goin" moo jo ziyo' tarha" deing byeung" zi koid loo wa.
6 Nyang: khokham bue" loo lang" Yuda byumyu" yigi goem loem zi shoug" goo" wa. Israela byumyu" yigi ngei pyoo: yug yoo tung" shoug" nyid loo goo" wa. Nyang: gi ?Ngoonu" khyoid yu Aseing? ga: myheing byid: zi shau" boem goo" wa.
7 Aseing gi ?Byumyu" yigi Israela byu yiri Egutu mung" mo shu" thu loo su: kangso' dei da" Mangsoo khyo" ngoo ri jham' atang: loo goo" wa da" ayo, gi ju" lo nyid da:.
8 Hau: gungthid nyangnu" gi Israela byumyu" yiri mougzhung: shoid mungdain: yo' ngo wigi nyangnu" ri nyhid: sain" to" da" mungdain: gootu: dangain" mo shu" thu loo su: kangso' dei da" Mangsoo khyo" ngoo ri jham' tang: loo goo" wa. Houg: lang" nyangnu" gi nyangnu" mungdain: moo yo" nyid loo goo" wa? ga: tid da:.
9 Nga" nheigloem: gi gyoeb moin" zi shoug" bye:.
Houg: lho: ngoo gi ko' ko' nain" byug bye:.
Aseing da" gang mo
Nya: gyeung" shang: da" mungdang: yoomo
Ngoo gi yhid: yed yug yhang: ti"
Zabyid yhid: sung shug ci: su: yhang: ti" nghoid.
10 Mungdain: gi Mangsoo ri jhug azug da" byu yi byeung" jo, da:.
Nyangnu" akhyeing" da" khyo" kangso' dei wigi nyangnu" yoem: so' ri anghoid da" khyo" ci: ago".
Aseing da" nheing" khoin" yoomo mougmyid gi koug ngau wigi
dain" yoo joem gi kyug byug da:.
11 Aseing tid zigi
?Lapi: yi yo' khainjung yigi Mangsoo aboo nghoid ago".
Nyangnu" Noku Yhoem: Moo" moo nyang: akhyeing" zi koid nyid ziri ngoo myang bye:.
12 Nyangnu" so" da" khyoomoo" gi jhoid wigi moug: coid jo, da:.
Ngoo gi nyangnu" ri khyid: vhu" zang" thung" wigi leung nhang: wa.
Ngoo gi nyangnu" ri yau: khe" kyi" khyeug zi bui" nhang: wa.
Nyangnu" yooboo dam kham: zoo: wa ayo, gi ju" re" nyid bye:.
Ngoo Aseing tid too" bye:.
13 Samari da" Lapi: yi yooboo ri ngoo shau" myang bye:.
Nyangnu" gi Bala myeing ri lang: lho: dang: tid wigi
Nga" byumyu" yiri khyoodam: shu" dam: pyam abye:.
14 Nghoid loug we' Yerusalem mo Lapi: yi je lang" xo: boem ziri ngoo shau" myang bye:.
Nyangnu" gi myi: shoid lang shoid wigi mhau' dang: tid ago".
Byumyu" yiri shoid da" moo" koid wa shid re" pang" thoug byid: ago".
Houg: lho: hang" we' akhyeing" da" moo" koid ziri atheing: pyam nghoid ago".
Nyangnu" dangain" gi nga" shid re" Sodom yo' Gomora byu yi yhi' age boem nghoid da:.
15 Houg: yoomo Yerusalem mo Lapi: yi yo' sen: wigi ngoo myhang: thang Aseing tid da" dang: nghoid da:.
Ngoo gi nyangnu" zoo: wa kho" da" agam ri byid: wigi
Shug wa myoono, nyangnu" ri byid: wa.
Ciwim gari nyangnu" gi mungdain: goin" ri Mangsoo abo da" lo, moo" byo, jo, nhang: yoomo nghoid ago"? ga: tid.
16 Myhang: thang Aseing Yerusalem byu yiri ?Lapi: yi tid da" dang: ri atam" gyoo: goo". Nyangnu" gi nanu" ri ajo da" myid byu khyoo: ri za: pyeing byid: wa. Nyangnu" gi nyangnu" shau" myid ziri nanu" ri tid lho: ngoo tid to" ziri atid nghoid ago".
17 Ngoo tid to" da" dang: ri atam" gyoo: loo: he: pyam da" byu yiri nyangnu" dangain" nyid gi yab ge loo goo" wa ga: nyangnu" xo' tid ago". Nyangnu" gi nheigloem: thain: bang: yugkhang" moo" ri yau: khe" kyi" khyeug zigi nyangnu" ri khanham we' ayo" ju" zang" wa? ga: tid ago".
18 Ngoo gi ?He: Lapi: yi mo dayug we' Aseing zau" to" da" myid yu" khyoo: ri khanham we' ase' nghoid ago". Nyangnu" mo kha: yug we' nya: mungdang: ri agyo: yu"- ase' gyo: yu"- nyang: tid ziri atam" gyo: yu"- goolhoo' za: agyo: yu" nghoid da:.
19 Nyang: nheig yo: zigi uglid thain: da" lid nghoid wigi akhyeing" bang: da" vhuloem tho' khyo" hau' lid: loo" goo" wa.
20 Houg: lho: nyang: koid wa ga: soin' to" da" moo" ja: khang" moo" ri nyang: abain koid koid gi atheing: wa. Ju" loo wa ayo, moo nya: byumyu" yigi he: ziri sho' sho' za: se' gyo: loo: goo" wa? ein: tid bye:.
21 Aseing tid zigi ?Ngoo gi he: lapi: yiri anhang: kaid nghoid loug we' nyangnu" thu yhe: lo" ago". Ngoo gi nyangnu" ri ce: mungdang: we' abyid:. Nghoid loug we' nyangnu" gi nga" myeing mo dang: ji nyid boem ashi".
22 Ngoo zau" to" da" myid soin: khyoo: ri nyangnu" se' gyo: nghoid ri nyangnu" gi nga" mungdang: ri nga" byumyu" yiri yo" tid fu" lho: nyangnu" akhyeing" da" kangso' dei khyoo: ri yo' nyangnu" koid da" akhyeing" moo" zoo" joem ri nyangnu" yo" to" pyam nhang: goo" wa nghoid da:.
23 Ngoo gi khyi' khang" moo" moo nyid da" Mangsoo nghoid lho: dajo, yoo moo za: nyid da" su: anghoid.
24 Hang" we' ngoo amyang da" joyoo moo ayo" gau" nyid. Ngoo gi mougkhung: yo' myidjang khyi' khang" moo" moo nyid su: nghoid ziri nanu" asi' goo" rhe".
25 Nga" da" myeing mo mhoug dang: tid lho: nga" mungdang: ri nyangnu" yhoebmo, moo ngo wigi nyangnu" ri byid: da: ga: tid boem da" hau: Lapi: yi dang: ri ngoo se' da:.
26 Hau: Lapi: yigi nyangnu" myid soin: thu yu da" mhau' dang: khoin" wigi nga" byumyu" yiri khamyhang ju" sho' shu" vhang: nyid shi" goo" wa la".
27 Nyangnu" phoug" phyid" yigi ngoo ri to" myhid pyam wigi Bala shoid khyoo: phug lo" byug boem bye: yhang: ti" nyangnu" tid da" yhoebmo, joem yo' nga" byumyu" yi ngoo ri to" myid pyam loo goo" wa ga: nyangnu" jho: ago".
28 Yhoebmo, mo, da" lapi: gi yhoebmo, za: danghoid ein: tid fu" ca" da:. Nghoid loug we' nga" mungdang: ri shau" gyo: yu da" Lapi: gi nga" mungdang: ri jhug zug tung" tid fu" eung: da:. Sungsoo: yo' tu' yu" ri khoofoo: gi ce: akyu" bo la".
29 Nga" mungdang: gi myi: yo' du wigi lug moo" boem ri ajab jab baid mhoin' pyam da" baid du yo' du da:.
30 Nyang: cang" nyang: da" dang: ri yu wigi hau: joem ri nga" mungdang: nghoid khyo" tid fu" da" bang: ri ngoo thougtheung bye:.
31 Nyangnu" nya: dang: ri ji wigi hau: joem gi ngoo mo ju" re" da" dang: nghoid ga: tid fu" boem da" lapi: yiri we' ngoo thougtheung bye:.
32 Ngoo Aseing tid da" dang: ri tam" gyoo: ge'. Mhau' fain" dang: byeung" jo, da" nyangnu" yhoebmo, joem ri tid boem da" lapi: yiri ngoo thougtheung da:. Nyangnu" gi hau: joem ri tid wigi nyangnu" mhau' fain" da" dang: yo' phau: tid da" dang: wigi nga" byumyu" yiri khyoo: vhang: shu" vhang: da:. Ngoo gi nyangnu" ri anhang: kaid. Yhi: wa shid re" we' nyangnu" ri amyeing" abyid: wigi nyangnu" gi byumyu" yiri dajhi' we' ayo" pang" byid: nghoid ago". Ngoo Aseing tid too" bye:? ga: tid.
33 Aseing gi ngoo ri ?Yeremia we" nga" byumyu" yi mo dayug- anghoid lang" lapi: dayug- khainjung dayug gi nang ri ?Aseing mungdang: gi ci: nghoid la"? ga: myid lang" nang gi nyang: ri ?Nang gi Aseing shid re" yoovoin nghoid da:. Nyang: gi nang ri yu pyam wa? ein: tid wa zi nghoid.
34 Nga" byumyu" mo dayug yug- lapi: dayug yug- khainjung dayug yug gi ?Aseing da" yoovoin? ga: da" dang: ri ci: su: nyid nghoid ri ngoo gi nyang: ri yo' nya: yhoemkhung: ri yooboo dam byid: wa.
35 Hau: gungthid yugkhang" moo" gi nya: byencang" yiri yo' nya: bidnoem yiri ?Aseing gi ce: dang: phyed: byid: too" bye: la". Aseing citid bye: la"? ein: myid: eung: da:.
36 Houg: yoomo nyangnu" gi ?Aseing da" yoovoin? ga: da" dang: khoin" ri khanham we' aci: loo: goo" wa. Ciwim gari dayug yug ci: nghoid rigi nga" mungdang: gi gyeing" nyang: nya: shid re" yoovoin lid: ngoo bui" nhang: wa. Byumyu" yigi myhang: thang Aseing- kangso' dei Mangsoo- nyangnu" Mangso da" dang: joem ri adu goo" sho' koid pyam abye: go".
37 Yeremia we" lapi: yiri ?Aseing nanu" ri ce: dang: phyed: byid: too" bye: la". Aseing citid bye: la? ein: myid: we'.
38 Nyangnu" nga" amyeing" ri atam" gyoo"- acang yhi: wigi ?Aseing da" yoovoin? ga: da" dang: ri ci: boem nghoid ri
39 ngo wigi nyangnu" ri yo' nyangnu" phoug" phyid" yiri byid: to" da" voomoo" ri yo' nyangnu" rigi" gi nyang: koid: yu wigi nyangnu" ri ngoo mo vi: sho' she: pyam wa.
40 Ngoo gi nyangnu" ri apyaid atoo: moo sho' phu" ziyo' khanham we' atho' to" myhid wa da" ngi: yoem" khyoo: bue" nhang: wa.