4
1 Nanu" moo ciwim myeing" myo: nyid go nheig yo: byo, go" khyoo: gi khayo, thu' lo ein: jhoo: go" Nanu" da" gungshoo" myo, no, loug, gyi: vhoo: bo- zain goo" said go" nyid da" nheigloem: mo thug lo nyid zi anghoid goo" la".
2 Nanu" gi nanu" nyang: myid vho: khyoo: ri ayoo" yoomo byu ri said pyam wa zilang" jen" jen" nghoid nyid boem ago". Nyang: tu: nya: da" myoo" sho' jain" sho' vhoo: boo loug, gyi: nyid ziri ayo" yu yoomo myeing myo: lho: gyi, bui" go" nyid. Nanu" vhoo: bo nyid da" zi joem ri ayo" yu da" khyoo: gi Mangso jhang moo amho' ayoid, yoomo nghoid nyid.
3 Nanu" gi mho' nghoid loug we' ashau" yu nghoid ago"- Khasu" wim gari nanu" da" myid soin: khyoo: agi nghoid ago"- nanu" gi nyang: tu: nya: da" gungdu: pyoo: wa da" khyoo: za: damho, nyid ago".
4 Dang: azung" mo, nanu" gi mougmyid yo' bidnoem koid nyid mo, nanu" gi Mangsoo ri gyi koid shoo" koid nyid mo, nghoid ziri nanu" nyang: si' shi" go" la". Mougmyid ri bidnoem koid noug su: gi Mangso da" gyivoo danghoid nyid.
5 Jhoem: mungdang: moo Ngoonu" da" akhoug: moo Mangsoo kaid byid: to" da" Venyi: gi- gye" thain: da" vho: ngei nheigloem: yo' byeung" jo, ga: wigi tid to" da" zigi agoin: danghoid ein: amyid nyid goo".
6 Nghoid loug we' ngoonu" gi Mangsoo byid: to" da" jeju" azeing' ri je" wigi yoem: moo" bo nyid boem. Mangsoo gi nghoidboin: nyid mo, ri lang: khyo pyam lho: nyhoem: khyo nyid mo, ri jeju" byid: nyid ga: jhoem: mungdang: moo bo nyid ziyo' dakhyoo" ti" nghoid.
7 Houg: su: nghoid yoomo Mangsoo: khasu" vho" ri hougsu" cang loo" ge'. Satan ri lhoem: theing shang"- zain: oung: nyid ge'. Hougsu" nghoid lang" nyang: gi nanu" jhang mo phang: loo" wa nghoid.
8 Mangso jhang yu: tain" ri" ge'. Houg: lang" Mangsoo we' nanu" jhang khyoo: yu: tain" loo wa yooboo yoo" bang: we" nanu" da" lo, ri cid" pyam ge' nheigloem: eig koo' boo mo, we"- nanu" da" nheigloem: ri cid" shang: pyam ge.
9 Myed kug myed shu: lho: ngoug myeing" shoo" thui: to" nyid ge'- nanu" da" gau yi khyoo: gi kug myeing" shoo" thui: yo' thid' go" lho: nanu" da" gau yi khyoo: gi nheigkoug nheigshu: khyoo: yo' thid' go" nyid ge.
10 Nanu" gi nanu" nya: da" gungdu: ri Aseing: da" shidkhoin" moo khyo' nyhoem: nyid ge'. Houg: lang" nyang: gi nanu" ri coung" nghei tu: to' kaid wa zi nghoid nyid.
11 Mangnhung" yi we"- nanu" gi nyang cang" nyang:- aloem" aloem, dang: tid juang" yi go" nyid boem nghoid loug we' ca: joeb" dang: kho' go" nyid uri nghoid loug we' hau: tarha" ri aloem" aloem,- juang" yi dang: kho' go" khyo" dalo" eung: nyid. Hau: tarha" ri dang: phyed nghoid rigi nanu" gi hau: tarha" ri cang nyid mo, anghoid loo: za: tarha" ri dang: kho' mo, za: danghoid nyid.
12 Mangsoo dayug kyeing" za: tarha" ri byid: to" lho: tarha" dang: yo" kho' su: nghoid. Mangsoo dayug kyeing" za: kangso ri yo" byid: lho: yo" phyo' shoin pyam nyid. Nang gi khayhang: te" su: nghoid lho: nanya: myid khyo" cang lho: dang: phyed nyid la".
13 Akhid nyid anghoid lang" gi nab yo nyid" voogung daloem: khyoo: ngoonu" yhe: lho: dazain koo: nyid shang- hau: voo moo phaga: koid wigi ngei myoo" sho' sho: boem shang ga: wigi nanu" tid go" nyid boem. Nghoid loug we' ngoo tid ziri tam" gyo: yu" ge.
14 Nanu" moo nab, yo nyid" cibui" wa ziri asi- byu yi da" apyaid gi ci: za: te: nghoid lha". Houg: gi ce: noem za: te: nghoid nyid lha". Houg: gi daso' za: te: thu' re" lho: doem bei: lo" byug da" myikhoug" so yo' date: du nyid.
15 Mangsoo myid vho: nghoid rigi ngoonu" gi kangso dei nyid lho: he: da" moo" ri we' thei: da" moo" ri we' yo" zei: wa ein: za: nanu" dage tid ago".
16 Akhid" nanu" koem gi nheigloem: gyi: lho: phau: khuang se' nyid ago"- hougsu" phau: khuang da" khyoo: bain sho' gi shoid da" khyoo: nghoid.
17 Hougsu" nghoid yoomo ge da" moozoo" ri ngoonu" se' to" lho: azei: loo" su: gi yooboo dab nyid.