1 Nga" da" mangnhung" yi we"- Sara koid mo, nanu" gi tarha" dang: phyed da" khyoo: byu gooji tho' moo je" shau" wa ziri se' nyid ge. Houg: yoomo nanu" yug khang" moo" sara ade: koid nau nyid goo". 2 Ngoonu" dangain" mo, gi atheing: loo: shoid vhang" loo" se' nyid. Kha: uri we' ci: tid cang aboo: su: gi joeb byeung" su: nghoid- Houg: yhang: te" su: gi Nya: gungdu: dangain" ri yo" vhoeb khang" ung: su: nghoid nyid. 3 Ngoonu" gi myang: nhoid moo lung" thung" kaid byid: lho: ngoonu" da" amyeung" ri cang nhang- ngoonu" vho: khyoo: yo' loo" nhang. 4 Gye" gyi: da" gyid sangphoo zeing ri we' uglid moo" hau, lo da" uri lang" nyhab, cam" nu" zo: wigi khang" lo" lho: sangphoo' khang" su: vho: jang" khyoo: yo" khang" lheung: lo" ziri myid yu" shang. 5 Yhoo: we' houg: yo" dakhyoo" ti" nghoid- hau: zigi gunggoin" jang" moo nge thang da" ako zoo: te: nghoid loug we'

gye" yo" phau: khuang nyid. Houg: yo' dakhyoo: ti" dajhi' kyeung" da" myi: we' houg: yhi' gyi: da" siyoo zeing ri yo" nge" pyam ziri myid yu" ge. 6 Yhoo: we' myi: yo' du nyid wigi shoid vhang: da" khyoo: yo' byeung" jo- hau: zigi gungdu: mo ako' daloem: za: te: nghoid loug we' ngoonu" da" gung goin" moo yooboo yo" dab loo nhang: nyid. Hau: yhoo: gi ngoonu" da" gung goin: ziri aco' ajhoid koid pyam wigi moovoo moug: mo myi: yo' nyang:- ngoonu" da" kangso gyung: khyoo: dangain" ri yo" nge" joem: loo" nhang: pyam. 7 Byu xangsu: yi gi kyang: da" gougnyhoug nghoid da" myeing khuid" zeig ni- ngho' joem yo' do: yu: yen" se' ja: yo' wimdo, joem ri yo" mhe' yu zi nghoid wigi houg: bang: gi me" lo boem bye:. 8 Nghoid loug we nyang nya: da" yhoo: rigi hang" we' mi" sho' alhoung yo" mhe' yu boem nghoid ago". Hau" yhoo: gi akhyeing" ashoeb ziyo' shid: nhang: se' myoo no, dug yo' byeung" jo, wigi ayo" zei: ci: loo: sho' akhyeing" ashoeb zi nghoid nyid. 9 Ngoonu" gi phoo Mangso myeung ri coung" ngei nyid da" jang" moo yhoo: ri ci: boem, Mangso da" aved alhoo: yo' dakhyoo" ti" phain" so: to" da" byu Xangsu: yi ri nheing" jang" moo we' hau: yhoo: ri ci nyid. 10 Nhoid dakhyab, za: mo coung' nghei thui: ge thu' loo nhung: lha". Nga" mangnhung" yi we" hid: su" gi age koid. 11 Gyid bug dakhyung: mo za: gyid coug: gyid khoo" ge yau thu loo wa la". 12 La foem gam moo zhainloin: shi" yo" zei: ri wa la". Zabyid nei moo la foem shi" yo" zei: ri" wa la". Houg: yo' dakhyoo" ti" xoo" gyid bug, gi gyid gi ayo" bue" loo.

13 Nanu" da" akhoug: moo se' yeug, da" phajhi" boo su: dayug yug nyid nghoid rigi hau:yug gi nyang: se' da" phajhi" boo su: gi nyang: se' da" phajhi" khyoo: ri zei so' da" moozoo" khyo" we' khyo' nyhoem: khyoo: khyo" we' ge da" moozoo" ri zei: so' khyo" we' sagsi kham nyid baja". 14 Nghoid loug we' gyeing" nyang: ga: rigi nanu" da" nheigloem: khoug: moo no" zo nheigloem:- nheig yo: da" nheigloem: yo' nya: akyu" za: shoo: nau ziyo' nghoidboin: phau: khuang khyoo: yo' za: byeung" jo, nghoid rigi hau: deingmain" da" khyoo: ri shoid vhang: khyo" koid nyid zi nghoid. 15 Houg: yhang: te" da" phajhi" gi tho' khyo" gyoo" lo da" phajhi" anghoid- mougmyid tho' mo Venyi: yo' sen: da" yu join satan da" phajhi" danghoid. 16 Khasu" wim gari no" zo da" nheigloem:- nyang: nya: da" akyu" ri za: te: shoo: nau, da" joyoo moo gi amyen, akhyoid myeing" myoo: yhoo: she: khyoo: ri we' akhyeing" ashoeb da" moozoo" aja: ja: ri we' bue" thu loo nhang: nyid. 17 Nghoid loug we' tho' khyo" ju" gyoo" lo da" phajhi" juyhi koem gi xangshid" re young" gyeung"- hau: thang: moo myenjham" ngei pyo: khyoo:- nu" nham' khyoo: young" du, nyeung veung" khyoo: ri bue" thu loo nhang:- hau: tho' moo gootu: nheig khyeug khyoo: yo' joeb byeung" wigi ge thang moozoo" ein: da" aboo" bo" lho: ashi" zei: loo nhang: se' nyid. Hau: zigi myonhoo: ase' khyen:- nghoidboin: da" khyoo: aboo- akug ase' void. 18 Myen jham" khyoo: vhoo: mo'- myenjham" tung" sho" to" da" amyoug: ashi" mo zei: thu' lo da" ashi" gi ge lho' da" khyoo: za: nghoid nyid.