3
1 Lo" thang moo Yoba shi" dang: ji thu re" wigi nyang: khu: bidnyid ri nheing" da:.
Yoba
2-3 O" Mangsoo we"- Ngoo khu: re" bidnyid ri nheing" koin" zang" we'
Ngoo ri voin shid" da" myen ri nheing" we'
4 Mangsoo we"- hau: bidnyid ri moug: coid bui" nhang: we'
Hau: bidnyid ri khanham we' adoem boin: loo:
Hau: bidnyid mo khanham we' adoem bang nhang: loo.
5 Hau: bidnyid ri moug: doeb nhang: lho: no, seing" kyid: moug: coid nyid nhang: we'.
Hau: bidnyid ri jhoemmoug" thei" wigi nghoeb pyam wigi bid ri shoem: byug nhang: we'.
6 Dazain khoug: moo hau: myen ri byug loo" nhang: wigi
hau: ziri khanham we' adoem nghab nhang: loo:.
7 Hau: myen ri jham" coug: youg- ngei pyo: khyoo: ajo, bui" nhang: la.
8 Hau: bidnyid ri nheing" wa shid re" main dain fa" bang: ri tid we'
houg: bang: gi mainjung: ri se' vhoeb khang: bang: nghoid da:.
9 Boo" myhu: ri abang nhang: loo sho' koid too" we'
Hau: myen ri moug: boo" wa myid byu khyoo: ajo, nhang:
10 Hau: myen ri yau: khi" yo' kougshu: wa shid re"
Ngoo ri khu: thu kaid yoomo hau: myen ri nheing" we'.
11 Ngoo gi nga" myhi' da" ung: khoug: moo nghoid nghoid
ngoo khu: re" uri nyang: nghoid nghoid said pyam ziri vho:
12 Nga" myhi' gi ciwim yoomo ngoo ri nya: poid lug tho' moo vu ci: lug la"
Ngoo ri ciwim yoomo nya: noug" jhug" la"
13 Hau: uri ngoo shid: byug nghoid rigi akhid" ngoo dougno: nyid wigi
14 Goonham' mo khokham khoo" joem ri doem zhug to" da"
Khokham yi yo' mung" vhoeb zoug: yi yhang: ti" yo" yhoeb jo, wa bye:.
15 Hau: thang: ngoo gi nyangnu" nya: yhoem: moo sheing: yo' ngei joem byeung" sho' kaid pyeing too" kho' boem da"
Khokham nu" yi yhang: ti" anghoid lang"
16 Byu shid: khu: re" da" zooshang: yhang: ti" yo" yhoeb jo, wa bye:.
17 Loeb khoug: mo akhyeing" da" bang: gi nyangnu" da" akhyeing" moo" ri theing: pyam wigi
Moo" zei: zoo: bang: gi lo" thang moo dougno: zi shoug" yu ago".
18 Thung: loung" bang: lang" nyho: yoid wigi amyen akhyoid amyeing" byid: jang" mo loid byoin' wigi
Yug yoo myenjham" ziri shoug" kham zo: ago".
19 Myeing gyi: bang: yo' hang" wigi we' asi' bang: yugkhang" moo" gi houg moo ju" nyid ago"
Houg: lho: join yigi lo" thang moo loid byoin ago".
20 Xangsu: byu yiri ciwim yoomo nheig koug nheig ngi xo' dei nyid nhang: la"
Koug shu: nyid bang: ri ciwim yoomo bidbang ri byid: nyid lug la".
21 Nyangnu" gi shid: ziri lang" nyid nghoid loug we' houg: zigi khanham we' aju" loo nghoid da:.
Nyangnu" gi phoug" dab da" jonu" ja: khang" moo" tho' shid: wa ziri je vho: ago".
22 Nyangnu" gi shid: byug wigi myhoeb pyam zi ashau" shoug" gi ngei pyoo: zi ashoug" wa nghoid da:.
23 Mangsoo gi nyangnu" da" ju" loo wa ayo, ri shoung: to" wigi
Nyangnu" ri shoid khang" moo" khyo" nyham" jhab' to" da:.
24 Ngoo gi zoo: shug wa gungthid koug ngau nyid wigi
Nookyeing" kyeing" zi khanham we' atheing: nghoid da:.
25 Ngoo gyoug wigi myid ci' zi ja: khang" moo" gi jo, bue" lo abye:.
26 Ngoo mo yug yo myenjham" zi ashau" dougno: zi ajo,
Houg: lho: nga" yau: khi" gi khanham we' athang agoin loo" nghoid da:.