1 Aseing tid zigi ?Nga" byumyu" yi akyu" mho' dang: ri tu" byid: wa jen" jen" nghoid. Nghoid loug we' nyangnu" akyu" amho' nghoid ago". Nyangnu" ngoo ri yo" myang wa zi ngoo jen" jen" nghoid. Nghoid loug we' nyangnu" shoo: wa lang" asoin' goo" nghoid da:. ?Ngoo hid: moo nyid nanu" ri pang" thoug byid: wa?ein: ngoo dang: phyed byid: wa shid re" 2 Shoid da" moo" ri nheigloem: thain: thain: koid lo wigi nyangnu" nyang: vho: jang" khyoo: yhe: lo" boem da" nga" byumyu" yiri ngoo gi khanham we' shu" tau" yu wa jen" jen" nghoid lid: loo bye:. 3 Nyangnu" ase' sho' loo: ngoo ri nheig yoo: nhang: nyid ago". Nyangnu" gi gyeung" shang: da" khyam: moo tarha" tungbau yu phara" xoin" ti" ngei" byid: wigi tarha" tungbau phoin: joem tho' moo shoem: nam pyo: ja: nghe' byid: boem. 4 Shid: bye: bang: da" soobyoo joem ri dang: myid: yhe: myid: wa shid re" nyangnu" myen" ri lug oug yo' loeb khyoo: yhe: boem. Nyangnu" gi vu, shoo" zo: wigi tarha" tungbau yu phara" ri ngei" byid: da" shoo" poo" yeing ri shug ago". 5 Hau: thang: nyangnu" gi gootu: bang: ri ?Ngoonu" yo' vi: vi: nyid we'. Ngoonu" gi gye" gyeung" shang: wigi nanu" age tain"? ga: tid boem. Ngoo gi hougsu" te" da" byumyu" yiri ayo" zeing: kham. Nyangnu" ri thougtheung da" nga" nheig joem: yo: zigi khanham we' ashid: da" myi: yo' du da:.

6 ?Nyangnu" da" yooboo dam ri ngoo myid phyed too" gu nghoid bye:. Nyangnu" ri dang: phyed ziri lhid" too" bye:. Nyangnu" koid lo ziri ngoo ayu" lhei" pyam' wa. Nyangnu" yooboo joem yo' nyangnu" phoug" phyid" yi da" yooboo joem shid re" ngoo nyangnu" ri aphoug" byid: wa. 7 Nyangnu" gi bouggung mo tungbau yu phara" no' yhoem: joem moo shoem: nam pyo: ja: nghe' ngei" byid: lho: ngoo ri akhyeing" da" dang: tid ago". Hougsu" yoomo lid lo da" ayo, mo nyangnu" lo, moo" joem shid re" moin: yi" da" yooboo dam nyangnu" ri ngoo byid: wa? ga: tid da:.

8 Aseing tid zigi ?Ge da" zabyid thung: ri aze" shoin' pyam' - hau: gungthid hau: ze wigi nyangnu" zabyid yhid: koid ago". Nga" byu yi dangain" ri we' ngoo aphyo' shoin' pyam' wa. Ngoo ri dei byid: da" bang: ri ngoo khyoid yu wa. 9 Yuda akung: ako'' moo bo da" Israela byumyu" yiri ngoo mainkaid byid: wa. Nyangnu" da" amyed ashen' yigi nga" boem joem ri seing: loo goo" wa. Ngoo ri dei byid: bang: ngoo khyen: yu to" da" byu yigi houg: moo nyid loo wa. 10 Nyangnu" ngoo ri noku loo goo" wa. Houglho: nyangnu" yang joem yo' nu: joem ri bidvang shoid moo Sharon dain" yoo yo' bidthu shoid Yau: khi" lang: khung" moo jo, da" dain" yoo khyoo: shu" yhe: lo" boem wa.

11 ?Nghoid loug we' nga" da" gyeung" shang: bouggung Ziun: ri cishu: anhang: bang:- ngoo ri she: pyam' to" lho: zhafa: yo' vhu" pi: lo, kyo' gi nhang: da" Gad yo' Meni yu phara" ri no' bang: nanu" yo' hau: zigi adu wa. 12 Hau: zigi mi: shid: shid: wa nanu" da" vhu" pi: lo, kyo' nghoid wa. Ciwim gari ngoo nanu" ri khe: uri nanu" atu"- ngoo dang: tid uri nanu" atam" gyoo: yoomo nghoid. Nanu" gi nga" tid dang: agyoo: wa yo' akhyeing" zi koid wa shid re" khyen: yu ago". 13 Houg: yoomo ngoo ri noku wigi tid dang: gyo: da" mo, gi agoin agoo" shau" zoo: shau" shug loo goo" wa. Nghoid loug we' nanu" gi zooyoid gyid shid loo goo" wa. Nyangnu" ngei pyo: loo goo" wa. Nghoid loug we' nanu" gi ngi: yoem" goo" wa. 14 Nyangnu" gi nyid pyo: wigi jikhoin" khoin" loo goo" wa. Nghoid loug we' nanu" gi nheigloem: thang wigi ngau loo goo" wa. 15 Khyen: yu to" da" nga" byumyu" yigi nanu" da" myeing ri nheing" khoin" khyo" ci: boem wa. Ngoo myhang: thang Aseing gi nang ri said pyam' wa. Nghoid loug we' ngoo tid dang: ri gyoo: bang: rigi myeing seig byid: wa. 16 Main kaid jeju" mho' da" mungdain: mo byu dayug yug ri jhug zug da" Mangso wigi mainkaid byid: wa ziri we' mho' loo goo" wa. Jham' tang: su: hang" nghoid loug we' jhug zug da" Mangso myeing ri lang: wigi jham' tang: loo wa. Lid: lo da" ayo, mo yau: khe" kyi" khyeug gi bei: byug wigi to" myid pyam' boem wa? ga: tid da:.

17 Aseing tid zigi ?Ngoo gi mougmyid seig yo' mougkhung: seig joem ri phain" so: lid: lo da" ayo, moo bue" da" khyoo: joem dangain" gi bain sho' to" myhid pyam' zi shoug" wa. 18 Ngoo phain" so: to" jang mo apyaid atoo: gau yi ngei pyo: nyid ge'. Ngoo phain" to" da" Yerusalem aseig gi ngei pyo: zi yo' byeung" jo, wa. Houg lho: nya: byumyu" yi we' ngei pyo: loo goo" wa. 19  Yerusalem yo' nya: byumyu" yi yoomo ngoo nyang: we' ngei pyo: khyoo: byeung" jo, wa. Hougmoo ngau ga: zi ajo, wa. Pang" thug mho' ga: zi ajo, wa. 20 Zoonu" yigi nu" ngha' uri ashid: loo wa. Byu dangain" bang: gi nyangnu" da" kangso' byeung" sho' yo" nyid loo goo" wa. Dashoo: zain boo bang: ri apyaid ngi shi" ga: jho: loo goo" wa. Apyaid aju" shi" ri shid: zigi ngo wigi nyangnu" ri yooboo dam byid: da" asoo" nghoid loo wa. 21-22 Byu yigi yhoem: joem koid lho: houg: moo nyid goo" wa. Hau: joem moo gootu: hang" anyid goo" wa. Nyangnu" gi zabyid khyam: joem ri sho" wigi zabyid yhid: shug pyo: nyid lo boem wa. Hau: joem ri subi" gootu: yo" shug boem wa zi anghoid. Seiggam yhang: ti" nga" byumyu" yigi kang: sheing: sho' yo" nyid loo goo" wa. Nyangnu" zei: da" moo" zoo" jid zoo" aphoug" ri nyangnu" byeung" sho' shau" kham: zoo: goo" wa. 23 Nyangnu" zei: da" moo" gi oung: doid loo wa. Nyangnu" zooshang: yigi kyi" khyeug yau: khi" zi athung" shau" goo" wa. Ngoo gi nyangnu" yo' nyangnu" da" amyed ashen' yiri ju" loo wa ayo, moo mainkaid byid: wa. 24 Nyangnu" akyu" abain mho' shi" rilang" nyangnu" da" akyu" mho' dang: ri ngoo tam" gyoo: mainkaid byid: wa bye:. 25 Zeig ni joem yo' yang nu" joem dage" voem: shoo: zoo: loo wa. Nu: joem yhang: ti" khangkhyi joem gi khoofoo: zo: loo goo" wa. Lhangmyu joem ri agyug noo" loo: wa. Lhangmyu joem da" zoo: noem gi myidzhoo" nghoid wa. Nga" da" gyeung" shang: da" boem gung Ziun: moo gyoug pho" dam tab khyoo: yo' akhyeing" ashoeb khyoo: ci: we' ajo, loo wa? ga: tid da:.