1 Nang gi mougkhung: ri lang: ceig pyam' wigi vhoo: khyoo: ciwim agyoo" lo lha". Boem joem gi nang ri myang wigi gyoug nain" nyid boem goo" wa. 2 Nyangnu" gi lung da" myi: atho' mo zhu: nyid da" gyid yhang: ti" ko' ko' nain" boem goo" wa. Re" gyivoo yiri re" yoem: so' re" ci: shug byid: we'. Re" shidkhoin" moo byumyu" yiri ko' ko' nain" nhang: we'. 3 Nang gi ngoonu" amyid to" da" ja: joem wigi re" kyug tain' da" ayo, jo, loo bye:. Boem joem gi nang ri myang: wigi gyoug nain" boem. 4 Nyang: ri myid pyu' bang: shid re" houg: yhang: ti" moo" joem ri koid su: nang yo' du da" Mangsoo ri hang" we' amyang yu"- ashoug" gyo: yu" nghoid ago". 5 Nang gi jo da" moo" koid jang" moo ngei pyo: khyoo: yo" yu boem da" bang:- nyangnu" ri nang wigi khasu" kangso' dei nhang: nau ziri myid boin: bang: ri lhoem: tau' yu da:. Nang gi ngoonu" ri nheig yoo: bye:. Nghoid loug we' ngoonu" gi xo' lho: yooboo koid lo da:. Nang gye" nheig yoo: nghoid loug we' goonham' gooco' mo ngoonu" gi xo' lho: shoid moo" koid loo bye:. 6 Ngoonu" dangain" gi yooboo yoo" bang: kyeing" bue" lid loo bye:. Ngoonu" ge thang da" avoid lo, moo" joem gi bain sho' aco' ajhoid nghoid da:. Ngoonu" da" yooboo yoomo ngoonu" gi lid wigi hau' tang" lo" da" seig fu' kyug yo' du da:. 7 Akyu" mho' wigi re" jang" mo hang" we' atau" loo. Pang" thug wa shid re" - re" jang moo hang" we' ayhi: nghoid ago". Ngoonu" da" yooboo gang mo nanya: gung nanyang: gau" nyid wigi ngoonu" ri she: pyam' to" abye:.

8 Nghoid loug we' Aseing we"- nang gi ngoonu" da" nya: phoo nghoid da:. Ngoonu" gi myid vhu" nug yo' du wigi nang gi oug" koid su: yo' du da:. Nang ngoonu" ri phain" too" bye:. 9 Houg: yoomo ngoonu" ri nheig atung" yoo:. Ngoonu" yooboo joem ri apyaid atoo: moo axoem" too" byid:. Ngoonu" gi re" byumyu" yi nghoid- ngoonu" ri nheig khyeug byid: la. 10 Re" gyeung" shang: da" voomoo" joem gi dain" pyoid yoo yo' du wigi Yerusalem gi jham" coug: youg byo, yoin" jo, da:. 11 Ngoonu" da" phoug" phyid" yi wigi nang ri coung" byid: da" joyoo - ngoonu" da" gyeung" shang: wigi yung" da" joyoo Noku Yhoem: Moo" gi myi: wigi nghe' pyam' zi shau" abye:. Ngoonu" jheddab da" joyoo joem dangain" gi byo, yoin" jo, abye:. 12 Aseing we"- he: gu: dangain" ri nang ci: akoid loo: nyid nyid wa lha". Nang ci: we' akoid loo: ngoonu" yo" zeing: shang" da" azhang tho' je wigi ngoonu" ri kyi" khyeug yau: khi" kham zoo: nhang: wa rhe".