5
1 Nga" byencang" phoo yo' nya: zabyid khyam: da" jikhoin"
he: jikhoin" ri ngoo khoin" nyid uri tam" gyoo: we'.
Nga" byencang" phoo gi myid xu: gye" ge da" bouggung atho' moo zabyid khyam: dakhyam: yo" da:.
2 Nyang: gi myidgung ri du: lho: houg mo luggo, joem ri koid: shang: pyam da:.
Houg: lho: ge thang da" zabyid nei ri sho" da:.
Nyang: gi hau: joem ri zung" wa shid re" pyuzung daloem koid da:.
Zabyid shi" nang: wa duang: daloem: du: da:.
Nyang: gi zabyid shi" myheing yo, ri lang" nyid da:.
Nghoid loug we' zabyid shi" khang" moo" gi jhen: da:.
3 Houg: yoomo akhid" nga" byencang" phoo tid zigi ?Yerusalem yo' Yuda mung" moo nyid boem da" mung" byu yi we"- ngoo yo? nga" zabyid khyam: agyoo: moo dang: phyed boem ge'.
4 Hau: khyam: shid re" ngoo daja: ja: akoid loo: to" too" kho' rhe". Houg ri ciwim yoomo ngoo myid lang" nyid da" cau: da" zabyid shi" azei: loo: za: zabyid shi" jhen: joem za: zei: thu lo la".
5 ?Nga" zabyid khyam: ri ngoo hid su" koid wa zi nghoid. Hau: ziri kyam' lheing to" da" khyam: ri yu pyam wa. Hau: ziri goem loem to" da" vang khyam: ri phyo' khyo' pyam wa. Houg: lho: hau: ziri siyoo gougnyhoug joem ri zoo: nhang: lho: nang: pye" pyam nhang: wa.
6 Ngoo gi hau joem ri myo, se: nhe' pyam nhang: pyam wa. Zabyid nei ri acu: shang: wa. Hau: ziri akhoeb nu" byid: wa. Hau: gungthid hau: jang" moo myo, lam" yo' zu: kyin: joem nghoeb nhang: wa. Hau: adang moo moug: voo byid: wa ziri lang" jhoemmoug" ri toem' pyam byid: wa.
7 Israela gi myhang: thang Aseing da" zabyid khyam: nghoid da:.
Yuda byu yigi nyang: sho" to" da" zabyid nei nghoid da:.
Nyangnu" ge da moo" zei: wa ziri nyang: myid lang" da:.
Nghoid loug we' hau: gungthid nyangnu" gi byu said moo" koid ago".
Nyangnu" jo zi koid wa ziri nyang: myid lang" da:.
Nghoid loug we' nyangnu" dam kham zoo: bang: gi tarha" deing byeung" ziri mho'? yoid nyid ago".
8 Nanu" gi joem abye: go". Nanu" yo" too" gu moo lung: wa shid re" yhoem: joem yo' yoothung" joem ri nanu" qei ago". Amyang" ri houg moo gooji hang" we' nyid wa joyoo ajo, wa. Hau: mung" moo nanu" za: nyid lo boem goo" wa.
9 Myhang: thang Aseing tid zi ngoo shau" gyo: zigi ?He: gyi: ziyo' ge da" yhoem: joem dangain" gi akoem: byo, jo, goo" wa.
10 Wim: eka bo da" zabyid khyam: gi zabyid yhid: wim: galain za: thu wa. Amyoug: daxi: tang sho" nghoid ri datang za: date: yoo" goo" wa? ga: zi nghoid.
11 Nanu" gi joem: lo" abye: go". Nanu" gi yhid: shug wa shid re" nab soin: no? mo to' wigi myen" thang: ju" sho' yhid: shug yid wigi akhyeing: ri thang nhang: da:.
12 Nanu" pui" joem moo teing- lo, baid- jhu:- khoolhang joem yo' zabyid yhid: yo" ago"- nghoid loug we Aseing cikoid wa ziri nanu" asi' goo" nghoid ago".
13 Houg: lho: nanu" gi thung: byu yi yhang: ti? myheig shu" lo" zi shau" boem goo" wa. Nanu" da" vhujhung: yigi zoo: yoid lho: shid: wa houg: lho: mung" byu yigi gyid shed lho: shid: loo goo" wa.
14 Moovo moug: gi nyangnu" ri zoo: nau nyid da:. Houg: bang: shid re" nhoid lam sho' fo' ci: da:. Yerusalem mo nheigboo yiri lu: fu: nyid da" mung" byu yi yo' dage" myhau: pyam da:.
15 Yugkhang" moo" sho' phu" wigi nghoid boin: bang: dangain" gi nyhoem: khyo' pyam zi shoug" loo goo" wa.
16 Nghoid loug we' myhang: thang Aseing gi jo da" moo" koid wigi nya: gyi: sheung: ziri ci: shug byid: da:. Nya: byumyu" yiri dang: phyed da" khyo" wigi nya: gyeung" shang: ziri ci: shug byid: da:.
17 Byu yoin" jo, da" voomoo" joem mo yang nu" joem gi mhain" lham" zo: wigi coidbaid nu" joem gi mhain" yoo' se' sho: loo goo" wa.
18 Nanu" gi joem: lo" abye: go". Nanu" gi nanu" nya: yooboo mo ayo? khang khyoid yu nghoid ago".
19 Nanu" gi ngoonu" hau: ziri shau" myang wa sho' nyang: koid wa ga: tid to" da" moo" ri myab myab Aseing ri koid nhang: boem shang. Nyang: soin" to" da" moo" joem ri Israela da gyeung" shang: Mangsoo ri koid nhang: shang. Nya: myid moo cibo ziri ngoonu" yu" boem shang? ga: tid ago".
20 Nanu" gi joem: lo" abye: go". Nanu" gi akhyeing" ziri ge ga: ge ziri akhyeing" ga: tid ago". Nanu" gi myen" ri nyid" koid- nyid" ri myen" koid pyam abye: go" da:. Nanu" gi kho" ziri cau: nhang: wigi cau: ziri khoo" nhang: abye:.
21 Nanu" gi joem: lo" abye: go". Nanu" gi phajhi" bo- gye" nheig bo ga: nanu" myid ago".
22 Nanu" gi joem: lo" abye: go". Zabyid yhid: parheing" sarhi' yi zabyid yhid: phung: zi shug wa nghoid lang" gye voem" mo, yo' gyoug myid aboo mo, nghoid ago".
23 Nghoid loug we' khougvhoid vho: yoomo yooboo yu" su: ri nanu" loid byoin nhang: kaid ago". Ce: yooboo ayoo" yug ri tarha" deingmain" zi ayo" yu loosho' toem' pyam ago".
24 Houg: yoomo akhid" khoofoo: yo? myo, kyug kyug joeb lo" yhang: ti" nghoid lho: myi: moo nge" lo" da:. Nanu" da" agyi: joem gi moin" lo" wigi nanu" da" bain: boo" gi shoem: kyug lo" lho: moid tang" lo" byug wa. Ciwim gari Israela da" gyeung" shang: da" Mangsoo- Myhang: thang da" Aseing wigi ngoonu" ri jhau" shid re" ziri nanu" ngeug he: pyam yoomo nghoid.
25 Aseing gi nya: byu yiri nheig yo: wigi nyangnu" ri yooboo dam byid: wa shid re" nya: lo, ri yhoin" kaid da:. Boem joem gi loeb loeb lei" loo wa. Byu shid: mang joem gi mhoid soid yo' dakhyo" khyoogung joem moo daboem loo goo" wa. Hougsu" nghoid loug we' Aseing da" nheig yoo: zigi agyoo" wa. Nya: lo, koem' gi yooboo dam byid: wa dayhoin" too" shigoo" wa zi nghoid.
26 Aseing gi vi: moo nyid boem da" byumyu" yiri khi: wa avoid byid: da:. Mougmyid thang sho' mo ri" goo" wa shid re" nyangnu" ri lo, moo" moid wigi khe: koid da:. Nyangnu" gi myab za: ju" re" ago".
27 Nyangnu" mo dayug we' amyung:- dayug we khyid: vhu" athung"- nyangnu" khanham we ayhoeb acoem"- phyid" cu" we' ashui:- khyid: zhung" tei" we abyed.
28 Nyangnu" da" myoo: joem gi coin: wigi nyangnu" da" lid: joem gi beig wa jen" jen" nghoid ago". Nyangnu" da" myang: joem khoodo, joem gi baid lug yhi' thain: ago". Nyangnu" da" myang: rheing" cab gi lid shoem' yhi' myab ago".
29 Gyizoo: yigi gougnyhoug dadu: ri yo" ngaid boem da" khangkhyi joem yhang: ti" hung: wigi hang" we' hau joem lo, mo ayhe: yo" yu nghoid ago".
30 Hau: bidnyid ju" lho: panglai: myeing thui: yhi' gyi: da" thui: yhang: ti" Israela ri nyangnu" kyi: nyho: loo goo" wa. He: mungdain: ri yu" ge'. Moug: coid jo, ziyo' nheigloem: thang pho" zi nghoid da:. Moug: bo" ri moug: coid wigi myhau: pyam zi shau" abye:.