47
1 Aseing tid zigi
?Babelon we"-re" zhungtang mo gyo" wigi myidgung pheilhoug: boem" moo zhung: we'. Nang gi shid phyang" ayo" ge oung: pyam da"
voomoo" zoomyi: gyeing" dayug yhang: ti" nghoid da:.
Nghoid loug we' nang gi nu" nu" nham' nham' anghoid loo wa.
Akhid" nang gi join nghoid abye:.
2 Lug lheing: ri gyeug we' cen: moin" phei" gyeug we'.
Re" myo, nghoeb za: pain" ri yu pyam we' re" byimi gi ri khyoid pyam we'.
Gyid gyung: gu: dab yhi: wa re" mi sham' ri to' we'.
3 Byu yigi nang gung cen: nghoid ziri shau" myang re" boem wa.
Nyangnu" nang ri yu" nyhoem: pyam lho: yu" sho' loo goo" wa.
Ngoo gi latoo: phug wa. Ngoo ri hang" we' atoem' goo" wa? ga: tid da:.
4 Israela da" gyeung" shang: Mangsoo gi ngoonu" ri loid byoin nhang: kaid bye:.
Nya: myeing gi myhang: thang Aseing nghoid.
5 Aseing gi Babelon ri
?Pug zheig aga: ziyo' moug: coid khoug: moo zhung: jo, we'.
Nyangnu" nang ri byumyu" yi da" khokham myhi' ga: akhi: loogoo" wa.
6 Ngoo gi nga" byumyu" yiri nheig yo: lho:
nyangnu" ri nga" byu yi anghoid lo: da" khyo" koid wa.
Ngoo gi nyangnu" ri re" yoem: so' khoug: moo kaid byid: bye:.
Nang nyangnu" ri nheig khyeug myid aci: shug byid: nghoid da:.
Apyaid gyi: bang: rilang" nang thain: thain: koid da:.
7 Nang gi nang khanham we' khokham myhi' bue" jo, wa jho: da:.
He: joem ri re" nheigloem: moo akaid too" nghoid da:.
Hau: zi dangain" khasu" thang loo" wa ziri we' nheigloem: moo akaid too" nghoid da:.
8 Pyo: khyoo: ri jheddab su: we"- he: ziri tam" gyoo: we'.
Nang gi goug: nyu: tung" za: goem loem nyid ga: jho: nyid da:.
Nang gi Mangsoo yhi' gyi: sheung: su: nghoid.
Nang yo' du zi gootu: hang: anyid ga: nang tid da:.
Nang gi cougmoo" khanham we' abui" wa ga: nang jho: da:.
Re" zooshang: yi byug lo" da" kyi" khyeug khyoo: ri khanham we' akham zoo: wa ga: jho: da:.
9 Nghoid loug we' daso' kyeing" ri danyid" kyeing" ri
Hau: gu: dangain" bue" loo wa
Nang fa" da" phajhi" ri ci: yhung: nghoid loug we'
nang re" yhoem: seing: phoo yo' re" zooshang: yiri ci: phyug wa.
10 ?Nang gi nanya: akhyeing" da" moo" moo gyeing" nyang: gi jho: nyid da:.
Nang ri hang" wigi we' azang" myang ga: jho: da:.
Re" phajhi" yo' lasi laleug gi nang ri khyoo: vhang: shu" vhang: lo" da:.
Houg: lho: nang gi nanya: gung ri ?Ngoo gi Mangsoo nghoid- ngoo yo' du zi gootu: hang" anyid? ga: tid da:.
11 Yau: khi" kyi" khyeug zigi re" adang moo ju" re" wigi
re" da" fa" phajhi" ce: ja: wigi we' hau: ziri ayo" toem' pyam nghoid da:.
Byo, yoin" zigi re" adang moo nyeigdain tung" ju" lo wigi
khanham we' yhoebmo, amo, yu" da" ja: byo, yoin" nhang: wa.
12 Re" da" fa" ziyo' main dain khain" pha' dangain" ziri zoem: ci: we'.
Hau: joem ri nang ngi shi" ayo, mo ci: lo abye:.
Hau: joem gi nang ri daja: ja: yo" pang" thoug byid boem abe.
Re" gyivoo joem ri yo" kyug tang" kaid abe.
13 Nang phajhi" byid: dang: yo" yu sho' nghoid loug we' nang gi yoem: so' aboo nghoid da:.
Nanu" lo, kyo' yu" bang:-
kyi: ri yu" zhang: nyid bang: nghoid.
Lhammoo" dakhyab thang: dakhyab ju" loo wa da" ayo, shid re"
boid phyed bang: gi nanu" shid khyoo: re" wigi
nanu" dang moo: bue" ri" wa da" akhyoo" mo nanu" ri khyoid yu nhang: we'.
14 ?Nyangnu" gi khoofoo: khaid du joem yo' du wigi myi: gi hau: joem ri nge" pyam wa.
Nyangnu" nya: gung rilang" ayo" khyoid yu boem goo" wa.
Myiyham: gi nyangnu" shid re" gye" lung wa.
Nyangnu" gi myi: ri langi: khyo" ayo" gang wa.
15 Re" pyaid goin" moo nang dang: myid: myid: lo- lo, kyo' yu" bang gi
nang ri akyu" boo sho' koid loo wa zigi vhoo: mo ziyo' dakhyo" nghoid.
Houg: zigi nyangnu" dangain" gi nang ri too" kho' lho: nyangnu" nya: khyoo: khyoo: lo" byug goo" wa.
Nang ri khyoid yu wa dayug we' adeing goo" wa? ga: tid da:.