46
1 ?He: zigi Babelon da" yu phara" joem thang lo" da" khyoo: nghoid da:.
Bela yo' Nebo ri goonham' no' byid: ago".
Nghoid loug we' akhid" gi hau: joem ri loo zei: joem gung tho' moo soin' zei too" shau" wigi
myung: dau da" gougnyhoug joem gung tho' moo yoovoin lid: bue" jo, da:.
2 Phara" soolhoo: joem gi nyangnu" nya: gung ri ayo" khyoid yu nghoid ago'.
Nyangnu" gi myheig yu shau" wigi yu ci: lo" byug zi shau" da:.
He: zigi Babelon da" yu phara" joem thang lo" da" khyoo: nghoid da:.
3 ?Yaku da" amyed ashen yi nghoid boem da" nga" byumyu" nyid deing mo, dangain" we"- nga" dang: tam" gyoo ge'.
Ngoo gi nanu" khu: re" da" ayo, mo nyang: goin coung: byid: bye:.
4 Ngoo gi nanu" Mangsoo nghoid wigi
nanu" mang: wigi xam: phyu: da" ayo, ju" sho' ngoo nanu" ri goin coung: byid: wa.
Ngoo gi nanu" ri phain" so: wigi nanu ri goin coung: byid: wa.
Ngoo gi nanu" ri pang" thoug wigi khyoid yu wa.
5 Aseing tid zigi ?Nanu" ngoo ri hang" yo" tu' yu" wa la".
Ngoo yo' du zi gootu: hang" nyid la".
6 Byu yigi nyangnu" ngei thung joem ri phang wigi sheing: ri foid kyo' ago".
Nyangnu" gi ngei ri jang moo leug ago".
Nyangnu" gi yu phara" koid wa shid re" sheing: zi baid bang: ri vhookung: lhoung: ago".
Hau: thang: nyangnu" goeb pid wigi hau: ziri no' ago".
7 Nyangnu" hau: ziri nyangnu" kootho' moo koid: vu, lho: dang lo" ago".
Nyangnu" gi hau: ziri nya: joyoo moo to" ago"- hau: zigi yab jo, wigi
nya: joyoo mo ayo" yu: nghoid da:.
Dayug yug hau: ziri akyu" yhe: mho' nghoid ri ayo" phug tid byid:.
Anghoid lang" kyi" khyeug jang" mo we' nyang: ri ayo" khyoid yu nghoid da:.
8 Yooboo thung: yi nanu" we"- hau ziri myid boin ge'.
Ngoo koid lid lo ziri myid yu" ge'.
9 Goonham' ci bui" lid: lo ziri myid boin ge'.
Ngoo dayug kyeing" Mangsoo nghoid ziyo' ngoo yo' du zi gootu: hang" anyid ziri yhen: yu ge'.
10 Bue" loo wa khyoo: ri xang: shi" mo ngoo Lapi: pe: to" wigi
cibui wa ein: ziri goonham' mo tid shid" too" bye:.
Ngoo soin to" da" moo" joem gi khanham we' asoem" pyam-
ngoo koid wa myid soin' to" zi ja: khang" moo" ri ngoo koid su: nghoid ein: ngoo tid.
11 Ngoo gi bidthu shoid mo byu dayug ri ri" wa shid re" khe: nyid.
Nyang: gi zoin yhang: ti" dang: gyo" re" wigi
ngoo soin' to" da" moo" ri re" zei: pain' wa
Ngoo tid too" bye:- hau: zi bue" ri' wa nghoid.
12 Oung: doid khyoo: gi gye" ve: ga jho: nyid boem da"
nheigloem: thain: da" byu nanu" we" nga" dang: ri tam" gyoo: we'.
13 Ngoo gi oung: doid da" bidnyid ri jhang lo nhang: nyid
hau: zigi dajhi' we' avi: loo.
Nga" oung: doid khyoo: gi thang: agyoo" wa.
Ngoo gi Yerusalem ri khyoid yu lho: Israela ri ngoo ngi: shab byid: wa? ga: tid da:.