11
1 Ref 11:1: Psh 5:5; 22:16. David da" khokham kung: gi thug lheing: pyam bye: da" seiggam yhang: ti" nghoid da:. Nghoid loug we' seig ngoid mo seig bu: aseig to re" ziyo' dakhyo" David da" amyed ashen yi mo khokham aseig dayug doem thu loo wa.
2 Aseing da" Venyi: gi nya: byumyu" yiri vhoeb wa shid re"
Phajhi"- Lasi phajhi" yo' se' jhang: khyoo: ri nyang: ri byid: loo wa.
Nyang: gi Aseing da" myid vho: khyoo ri se' wigi nyang: ri phau" myang: byid: loo wa.
3 Houg: lho: nyang: gi Aseing ri tam" gyo: cang yhe: jang" mo ngei pyo: khyo: shau" yu wa.
Nyang: gi myonhoo: ri yu" lho: agoin tid da" dang: ri gyo: lho: dang: aphyed wa.
4 Ref 11:4: 2Th 2:8. Nyang: gi myung shoo" bang: ri nyeung veung" khyo" dang: phyed byid: lho: asho" ajhen: bang: da" akho: akhang" ri goem loem byid: loo wa.
Nya: amyeing" dang: moo mung" byu yi yooboo dam byid: zi shau" lho:
akhyeing" da" bang: shid: loo" goo" wa.
5 Ref 11:5: Eph 6:14. Nyang: gi nya: byumyu" ri nyeung veung" ziyo' jhug zug ziyo' vhoeb loo wa.
6 Ref 11:6-9; Esa 65:25. Zeigni joem yo' yang joem yug yoo tung" dage" nyid boem wa.
Zooloo: joem gi coidbaid nu" joem yo' dage" vhoeb jo, wa.
Nu: nu" joem yo' khangkhyi nu" joem dage" zoo: shug goo" wa.
Zooshang: nu" yigi hau: joem ri shu" coung: nyid loo goo" wa.
7 Nu: jung joem yo' voem joem gi dage" zo: loo goo" wa.
Houg: lho: nyangnu" da" nu: nu" joem yo' voem nu" joem gi yug yoo tung" vhoeb jo, wa.
Khang khyi joem gi nu: yhang: ti" khoofoo: zoo: wa.
8 Zooshang: nu" gi dug thain: da" lhangmyu nam moo
lhu: ei" nyid nghoid loug ce: dam adab wa.
9 Mangso da" gyeung" shang: bouggung- Ziun boem moo:
Yau: khi" bui" nhang: ziyo' akhyeing" zi ci: we' abui" wa.
Panglai: moo gyid byeung" jo ziyo dayhang: ti"
Aseing da" lasi phajhi" gi mougmyid goin" moo byeung" jo, wa.
10 Ref 11:10: Rom 15:12. David khokham kung mo khokham aseig gi byumyu" yi da" asoo" bui" wa ayo, ju" re" nyid bye:. Nyangnu" gi nya: khokham voomoo" moo zeing: foem: nyid wigi nyang: ri ngi: shab byid: loo goo" wa.
11 Hau: bidnyid ju" loo lang" Aseing gi nya: yoem so' ri dalheing: doem ci wigi Asuri- Egutu- Pathro mung" joem Etiopi- Elam- Babelon- Hamad yo' gyid yam cang mo mungdain: joem panglai: gugyoo: kang joem moo nyid deing jo, boem da" nya: byumyu" yiri yhoem: khyoo: doem shu" tau" yu wa.
12 Aseing gi nyid byo: sain" jo, da" Israela yo' Yuda byumyu" yiri dalheing: doem zheing" yu nyid khyoo: ri byumyu" yiri ci: shug byid: wa shid re" aved asoo" dung khoin: ri tu: to' loo wa. Houg: lho: mougmyid myonhoo: myid: shoid goin" mo nyangnu" ri doem shu" tau" yu loo goo" wa.
13 Israela mungdain: gi Yuda ri myid zo da" myid aboo loo wa. Houg: lho: Yuda gi Israela da" gyivoo anghoid loo wa.
14 Nyangnu" dage" bidvang shoid mo Philisti byu yiri gyi zain: lho: bidthu shoid moo nyid boem da" bang: ri phyo' zo: loo goo" wa. Nyangnu" gi Edom- Moba byumyu" yiri oung: pyam lho: Amon byu yigi nyangnu" da" dang: tam" gyo: loo goo" wa.
15 Ref 11:15: Psh 16:12.
16 Nyangnu" da" phoug" phyid" yi Egutu mo thu lo boem uri yo' dayhang: ti" Asuri moo nyid deing jo, shi" da" nya: byumyu" Israela shid re" Asuri mung" mo thu lo" da" fu" moo" khyoo: jo, loo wa.