1 Xang: shed" mo dang: soo" to" da" thang" cab, moo noku coung" nghei khyoo: bo nyid ziyo' dakhyoo" ti" byu lo, yo' koid da" noku joyoo we' jo, ca" wa nghoid. 2 Khasu" wim gari gyeungshang: da" joyoo ga: da" xangshid" pyaid moo noku zoem" daloem: koid to" boem. Houg: mo xangshid" yab, moo myibung: ki" jang: yo' Mangsoo ri xoin" to' byid: zooyho' ke" da" zoobui" jo, jo. 3 Hau: lho: eig loem: ein: da" pain" xiyam, da" akhau: shoid moo gyeungshang: thang da" joyoo ein: da" zoem" jo, jo. 4 Hau: jang" moo nam, pyo: ja: nghe nghei" byid: da" sheing: yo' koid to" da" phoin: yo' dagung goin" sheing: yeing shoin" da" Dang: Theing Koid: bo jo. Hau" kuid: zei: khoug: moo Mana zooyho' bo da" sheing: juang: we' afu' nu" toid' lo nyid da" Arun da" lham: dung: we' tung: to" tarha" lhid" to" da" lug yho' eig khyab, we' bo jo. 5 Hau" koidzei: da" atho' moo dung eig khyab, dab da" Kherubim soolhoo: eig khyab, jo wigi Mangsoo bo zung" nyid da" aved, ri thu nhang: boem. Nyangnu" da" dung joem ri yau: noo yooboo ri khyoid pyam byid: joyoo ein: da" koidzei: amyhid" tho' moo pyo: nghoeb, to" boem. He: da" dangkang: ri jid" nug, nug, phoid: kho" nyid aca" loo. 6 He: da" noku coung" nghei byid: da" thung" ri yo' dakhyoo" ti" zi azuang ri bain jhoeb to" thang: ri khainjung agyi yi gi nyangnu" da" noku shu" vhu" she: da" moo" ri voin vu, wa shid re" zoem" khoug: mo xangshid" ju" vang lo" da" yab, moo nyid" khang" moo" vang lo" nyid boem. 7 Nghoid loug we' zoem" khoug: mo noku joyoo moo koem gi khainjung agyi gyi: thang su: za: nya: shid re" we' mungbyu yi asi aboin: loo: shoid vhang: da" yooboo shid re" we' xoin" to' byid: da" suid" ri ci: lho: dazain' ri dalheung: za: date: yo" vang lo. 8 Hau: da" thung" yo' dakhyoo" ti" xangshid" ju" vang lo" da" yab, goin" dageing: jo, jo, gi gyeungshang: da" yab, khyoo: khoem" aphang shi" wa da" khyoo: hau: gyeungshang: da" Venyi: gi bang bang jhau" byid: nyid. 9 He: da" khyoo: gi he: pyaid mo da" khyoo: ri toin" shid nyid dangtu daloem: nghoid nyid Hau: da" dangkang: gi Mangsoo jhang khyoo:- ngei" byid: nyid da" jhungshug jhung: lang: yi yo' gougnyhoug xoin" du: joem gi noku coung" nghei su: da" ung: khoug: nheigloem: ri yo" joeb, byeung" loo" nhang: wa zi anghoid. 10 Hau: gu: gi zoo: noem shug phoo" yo' cid" yung" cid" lho, da" thung" aja: ja: yo' sen: lho: wigi zei: da" khyoo: za: nghoid nyid. Hau: gu: gi Mangsoo wigi aseig doem nyheung so' da" apyaid aju" shi" uri byam, koid to" da" atho' pyam: yo' sen: da" cang yhe: loo" wa tarha" thung" ri nghoid nyid.

11 Nghoid loug we' Khristu gi akhid" nyhang" yo" kham zo: nyid bye: da" nyid ge nyid de, loo wa khyo: da" khainjung agyi moo" khyo" nyang: ju" ri" bye:. Nyang: noku xoin" ngei" byid: da" zoem" gi lo, wigi akoid to" da" he: phain" too" shau" da" mougmyid yo" asen: da" je" gyi: lho: joeb, byeung" da" noku zoem" nghoid nyid. 12 Khristu gi gyeungshang: da" joyoo khoug: khyoo:- pyaid mo too: mo shid re" dalheung: dam- bain sho' vang lo" da" uri xoin" ngei" byid: wa shid re" shoobaid' suid"- nujung lo: suid" ri aci: vang loo" loo: za: Nya: da" suid" yo' vang lo" wigi ngoonu" shid re" apyaid atoo: mo khyoid yu khyoo: ri yo" yu nhang: bye:. 13 Shoobaid' suid" nujung lo: suid"- myi: moo nghe pyam bye: nujung nu" da" myimoeb, yo' aco' ajhoid bue" da" byu yi tho' moo noku coung" nghei da" thung" tarha" yo' dakhyoo" ti" peug shoin" gyoin: kaid ri ayung" alho' da" byu yiri yo" gyeung: lho' nghoid rigi 14 Khristu da" suid" gi hau: tho' mo je" wigi yo" cid" yung" cid" lho, byid: zi anghoid goo" la". Khristu gi hau: apyaid atoo: mo Venyi: yo' nya: da" gungdu: ri ce" noo abo da" xoin" khyo" wigi Mangsoo ri ngei" byid: pyam bye:. Dadei nyid da" Mangsoo ri ngoonu" yo" noku coung" nghei sho' Khristu da" suid" gi ngoonu" da" nheigloem: emyed ri akyu" abo da" noku loemkhau: khyoo: moo cang lo" jangmo yo" cid" yung" cid" shang: yu byid: bye:.

15 Khyoo: he:khaid khyo" Mangso khe: yu zi shau" bang: gi Mangsoo nyang: dang: soo" khoin" byid: too" bye:da" apyaid atoo: mo mainkaid jeju"- shau" kham: yu boem baja" ga: Khristu gi dang: thang" cab, aseig ri nyheing byid: bye:. Hougsu" kham: yu wa da" amyeung" akhang" ri yo" yu da" khyoo: gi xangshid" mo da" dang: theing khoin" akhoug: moo nyid uri shoid vhang: lo" da" yau: noo yooboo mo khyoid lhoid kaid wa shid re" shid: kham khyoo: dakhaid bue" thu loo yoomo nghoid bye:.

16 Agyid asoo: yo' sen: da" dang: soo: khoin" ri bue" thu' loo nhang: wa da" shid re" dang: theing go" too" bye:. Gyeing" nyang: shid: bye: khyoo: sagsi ri toin" shid ca" nyid. 17 khasu" wim gari dang: soo" too" su: dadei nyid shi" uri gi dang: soo" age bui" shi"- dang: soo" too" su: gi shid: lo" thang: ri she' hau: dang: soo" khoin" gi dageung: jo,. 18 Houg: su" nghoid yoomo xangshid" mo dang: theing khoin" lang" ri suid" ci: lho: dageing: teing jo,. 19 Xang: shed" ri Moshe gi tung: to" tarha" moo pyeing: to" khyoo: dangain" ziri byumyu" yi ri bain tid kyoo" lang" gi ne" da" yang, moug" yo' husug, seig kung: ri yu lho: nushain: lo: suid" shoobaid suid" joem yo' gyid yo' cam" wigi tarha" mougsoug" deing: moo we' byu yi dangain" ri we' byeug, sain" gyoin: kaid da. 20 Hau: thang: ri nyang: gi ?He: zi gi nanu" tam" gyo: lho: cang yhe: loo" wa shid re" to" da" dang" theing khoin" ri dazid' baid lho" geingteing jo, nhang: da" suid" nghoid ga tid. 21 Houg: yo' dakhyoo" ti" Moshe gi noku zoem" khung: tho' moo we' noku coung" nghei uri ci: da" zi joem dangain" da" atho' moo we' hau: suid" yo' byeug, sain" gyoin: da. 22 Toung: to" tarha" yo' dakhyoo" ti" ga: rigi- ziyoo jo, moojo, alug bain sho' ri suid" yo' yo" cid" yung" cid" shang: loo nhang" wigi suid" shoin: byid: khyoo: khyo" za: yau: noo yooboo ri yo" khyoid pyam byid: nyid.

23 Mougkhung: mougdi tho' moo akhang: re jo' gu zi joem yi da" la: du- hau: khyoo: khyo" za: yo" cid" shang: gyeung, yu nyid. Nghoid loug we' Mougkhung: mo zi joem ri nyang: gi je" ge da" xoin" to' byid: ziyo' yo" cid" shang: byid: ca" nyid. 24 Khasu" wim gari Khristu gi gyeing" nyang: gyeungshang: joyoo gyeung" da" ladu nghoid- byu yi da" lo, wigi koid to" da" gyeungshang: joyoo moo avang, loo" loo: za: mougkhung: khyoo: nyang: vang lo" wigi akhid" nyha" da" gung thid' Mangso shidkhoin" moo thu' myhang, loo" bye:. 25 Yuda khainjung agyi moo" gi gougnyhoug suid" ci: lho: hau: gyeungshang: da" yab, moo zain' khang" moo" vang lo". Nghoid loug we' Khristu gi nya: gungdu: ri myoo" sho' lheung: xoin" to' ca" nyid zi anghoid. 26 Houg: su" xoin" myo" sho' lheung: dato' nyid ca" shi" nghoid rigi mougmyid ri phain" shed" jangmo nyang- myo" sho' lheung: doem: shid: kham: kham: koid nyid wim bye:. Akhid" koem' gi mougmyid pyaid thang wa zi jhang lo nyid uri pyaid didu shid mo dalheung: dam, bain sho' nya: gungdu: ri xoin" to' pyam bye: ziyo' yau: noo yooboo ri shoem" shoung: pyam byid: bye:. 27 Xangsu: byu yi yug khang" moo" gi dalheung: za: shid: lo" lho: hau: thang: ri Mangso da" dang: phyed zi shau" shi" wa nghoid. 28 Houg: yo' dakhyoo" ti" Khristu we' byu yi myoo" sho' mo, da" yau: noo yooboo joem ri pyaid didu shid re" dalheung: dam, bain sho' nya: gungdu: ri xoin" du: koid lho: to' ngei' byid: pyam bye:. Yooboo ri bo voin pyam byid: wa khyoo: yo' asen: loo: za: nyang: ri dalang" nyid mo, ri khyoid yu wa shid re" eig lheung: ein: lheung: moo doem thu' myang loo wa zi nghoid nyid.