1 Yuda yi da" tarha" gi gyeing" nyang: agyeing" nghoid da" khyoo:- deingmain" joeb, byeung" da" akhyoo" again anghoid loo: za: ju" loo wa da" shau" void' shau" zoo: wa da" khyoo: mo amyang abang da" khyoo: za: date: nghoid nyid. Nyangnu" gi khanham we' to' byid: nyid da" xoin" daja: riza:- zain khang" moo" xoin" to' byid: boem ago". Hougsu" wigi he: da" mungdang: yo' Mangso jhang khyoo: yu: vang lo" da" byu yi ri hau: toung: to" da" tarha" gi khasu" wim gi joeb, byeung" mo, yo" bue" loo nhang: wa lha". 2 Mangsoo ri loemkhau: noku nyid mo, ri yooboo mo dayo" to cid" yung" cid" shang: byid: nghoid rigi nyangnu" gi yooboo yoo" mo nghoid ein: khanham we' amyid jho: nyid byid: lho: xoin" to' byid: khyoo: we' dangain" no: pyam byid: ca" loo wa zi nghoid. 3 Akhid" gi zain khang" moo" to' byid: da" xoin" du: joem gi byu yi ri nyangnu" da" yau: noo yooboo ri myid boin: nhang: nyid wa shid mo nghoid nyid. 4 Khasu" wim gari nushain: lo: da" suid" yo' shoobaid' suid" gi yau: noo yooboo ri khanham we' yo" cid" shang: pyam byid: wa zi anghoid. 5 Hougsu" nghoid yoomo Khristu gi he: mougmyid moo ju" ri" wa ga: soin' nyid da uri Mangsoo ri Nang gi xoin" du: joem yo' jhungshug ri vho: ngei nyid zi anghoid, nga" shid re" gungdu: ri nang nyheung too" byid: abye:. 6 Phoin: tho' mo gungdu: goin" ngei" to" da" gougnyhoug xoin" yo' yooboo khyoid pyam da" xoin" ri nang vho: ngei zi nghoid. 7 Houg: lang" ngoo gi phoo Mangsoo we"- tarha" mougsoug" joem moo nga" da" khyoo: lhid" to" nyid ziyo' dakhyoo" ti" Nang myid vho: khyo" koid wa akhid" ngoo hid: moo ju" ri" bye:- ein: tid bye: ga: wigi tid. 8 Hau: lho: nyang: gi To' byid: da" xoin" du: joem yo' jhungshug joem ri we' phoin: tho' moo nghe to' ngei" byid: da" myi nghi' xoin" ri we' yooboo khyoid da" xoin" joem ri we' Hau: tung: to" tarha" yo' dakhyoo" ti" xoin" to' ngei" byid: nghoid loug we' hau: xoin" du: joem ri Aseing nang gi vho: ngei nyid zi anghoid, ga: wigi nyang: shid re tid too" bye:. 9 Hau: thang: ri nyang: gi Mangsoo we"- nang vho: khyo" cang koid wa shid re" ngoo hid: moo nyid nyid, ga: wigi tid. Houg: yoomo Mangsoo gi xangshid" to' byid: da" xoin" axoug" dangain" ri yoeb shoung pyam lho: Khristu to' byid: da" xoin" ri houg: bang: da" joo yoo moo gung thid' kaid byid: bye:. 10 Yesu Khristu gi Mangsoo myid vho: lho: koid nhang: ziyo' dakhyoo" ti" nya: gungdu: ri pyaid mo too: mo shid re" dalheung: za: yo' bain sho' xoin" ri to' pyam byid: bye: yoomo nyang: nu: dangain" bang: gi yug: noo yoo boo mo yo" cid" kyeing cid" shang: yu zi shau" boem bye:.

11 Yuda Khainjung yi yug khang" moo" gi nyang: to' byid: da" xoin" to' khyoo ri nyid" khang" moo" zei: nyid lho: xoin" du: daja: riza: myoo" sho' lheung: koid nyid nghoid loug we' hid: su" to' byid: nyid da" xoin" du: joem gi yau: noo yooboo joem ri khanham we' yo" shoem" shoung: pyam da" khyoo: ajo. 12 Khristu koem gi yau: noo yooboo ri khyoid pyam byid: wa shid mo pyaid didu moo akyu" bo da" xoin" daja: yo' za: bain to' byid: pyam thang: ri Mangso lo, yo shoid moo lo" zhoung: jo, bye:. 13 Akhid" nyang: gi hau: jang" moo nya: gyivoo joem ri nya: da" khoovoo: khoug: moo khyid: nang: zhungtang khyo" Mangsoo too" byid: jang" moo ju" sho' lang" zoore danyid nyid. 14 Khasu" wim gari nyang: gi to' byid: da" xoin" daja: yo' za: cid" yung" cid" shang: yu zi shau" bye: mo, ri pyaid' didu mo shid re" joeb, byeung" nhang: bye:. 15 Hau: gyeungshang: da" Venyi: we' ngoonu" ri sagsi bo kham byid: bye:- xangshid" ri nyang: gi 16 Khyoo: he: zigi ju" loo wa da" bidnyid joem moo Nyangnu" yo' ngoo too" goo" wa dang: thang" cab, nghoid nyid Nyangnu" da" nheigloem: ung: khoug: joem moo nga" da" tarha" joem too" wa zi nghoid, ga: wigi hau" Aseing tid nyid. 17 Hau: thang: ri nyang: gi Nyangnu" da" yug: noo: yooboo ri we' nyangnu" da" akhyeing" ashoeb khyoo: joem ri we' ngoo doem boin: loo: wa zi anghoid, ga: tid. 18 Houg: su" wigi yau: noo yooboo ri khyoid pyam byid: zi shau" bye: nghoid rigi yau: noo yooboo khyoid pyam byid: zi shau" wa shid mo xoin" gootu: ngei" byid: anoo" loo.

19 Houg: su" nghoid nyid yoomo nga" da" mangnhung" yi we"- Yesu gi shid: kham: byid: bye: yoomo ngoonu" gi hau: gyeungshang: thang da" joyoo khyoo: vang lo" boem wa shid re" joeb, byeung" da" amyeung" yoo" mo, nghoid nyid boem bye:. 20 Nyang: gi nya: gungdu: ga: da" Mangso yhoem: moo" khoug: mo pain" xiyam, ri lid vang lo" wigi Mangso da" shidkhoin" khyoo: khyang: lo" da" kangso' khyoo: seig dakhaid ngoonu" shid re" phang too" byid: bye:. 21 Ngoonu" moo Mangso da" yhoem: ekoin deungkhu: ri vhoeb khang" zung" lhug nyid wa da" khainjung agyi moo" dayug yo" boem bye:. 22 Houg: su" nghoid yoomo ngoonu" gi yooboo yoo" boin: da" nheigloem: ung: khoug: joem ri cid" yung" cid" shang: pyam lho: ngoonu" da" gungdu: ri we' gyeungshang: da" gyid yo' bain cid" shang: pyam lang" ashoid avhang: loo:- jhug zug, da" loem" jeing" nheigloem: yo' Mangso jhang khyoo: yu: tain" vang lo" boem shang. 23 Ngoonu" yhen: yu lho: loem" jeing" da" loemkhau: nheig byu khyoo: moo aloeb, adei loo: nyhang" geingteing, jo, loo: shang. Khasu" wim gari Mangsoo gi nyang: dang: soo" to" da" khyoo: moo jhug' zug, da" dang: zung" su: nghoid khyoo: ri ngoonu" loem" jeing" nyid boem. 24 Ngoonu" gi ngoonu" nyang: cang" pang" goo" thug goo" wa shid re" nyhang" nyang: cang" jheddab da" nheigloem: toin" shid go" zoore ge da" moozoo" ri zei: wa shid mo nheigloem: tu: to' lho: pang" goo" thug go" nyid shang. 25 Nyhang" nyang: cang" zeung: foem: da" thung" ri ri dayham" gi she: pyam nyid boem ago". Nyhang" gi houg: su" akoid boem loo: za: hau: Aseing doem ju" ri" wa da" bidnyid jhang loo bye: ziri se' nyid boem bye: yoomo nyang: cang" nyang: je" wigi yoem: byid: go" nyid boem shang.

26 Khasu" wim gari nyangnu" gi hau deingmain" khyoo: ri bain se' gyo: kham: yu thang: ri yooboo ri zhoo: gyi: gyi: dadoem koid nyid boem nghoid rigi ngoonu" da" yooboo shid re" to' byid: wa da" xoin" gootu: jo, loo: wa zi anghoid. 27 Ngoonu" gi ju" loo wa nghoid da" tarha" dang: phyed khyoo: yo' Mangsoo yo' aveing" goo" mo, ri nghe jhoem" pyam wa da" atho' tid loo: sho' gyoug pho" moovoo moug: myi: ri gyoug nain" zoore lang' nyid wa zi za: danghoid lo. 28 Moshe da" tarha" ri atam" gyoo: loo: shoid vhang: mo, hang" ri nghoid loug we' sagsi eig eig yug dang: yo' yooboo yo" ga: dang: phyed zi shau" nghoid rigi nheig akhyeig loo: said pyam nyid boem. 29 Houg: su" nghoid rigi Mangso da" nya: zoo: ri aphoug" akhyoid koid su: gi ngoonu" gi nyang: ri yau: noo yooboo mo cid" gyeing cid" shang: yu da" Mangso dang: theing khoin" yo' sen: da" suid" ri ci: asoin: cishu: anhang: su: gi jeju" byid: nyid da" Venyi: ri aphoug" zoo: wa da" shidgyoin noogyoin gi khayhi' je" no, wa lha"- damyid yu" ge. 30 Khasu" wim gari ngoo latoo: phoug wigi yooboo da" jhen: ri ngoo do' wa"- ga: wigi we' Hau: lho: hau" Aseing gi nya: byumyu" yi ri tarha" dang: phyed wa ga: wigi we' tid nyid su: gi hang" nghoid ziri ngoonu" se' nyid. 31 Dei nyid da" Mangso lo, moo gyo" vhang, lo" ein: zigi atho' tid loo: sho' gyug ca" da" khyoo: nghoid. 32 Lid loo" bye: da" bidnyid joem moo nanu" gi khayhang: te" mo, nghoid nyid boem ziri doem boin: so" nyid ge. Hau: bidnyid joem moo Mangso bidbang ri zheung: yo" kham: yu ci: boem lho: shidgyoin noogyoin myoo" sho' ri shau" kham zo: lid lo boem bye:- nghoid loug we' nanu" yoem: kaid thoug shang" lo boem yoomo hau: shidgyoin noogyoin gi nanu" ri yo" oung: lo" khyoo: ajo. 33 Nanu" nyang:- mungbyu yi da" shid moo juang" yi gei sang: ziyo' shen" yhen khyoo: ri daso' so' thoung" shau" lid lo boem bye:. Hau: lho: goo tu: da" ayo, joem moo gi nanu" yhang: ti" shen" yhen ziri thoung" shau" nyid da" byencang" yi tab khyoo: bo nyid lho: wigi sho" jhin: yaukhi" ri bo kham zo: khyo" yoem: byid: pang" thoug go" lid lo boem bye:. 34 Nanu" gi thung: lung" mo, ri we' nheig khyeug ago"- nanu" da" ziyoo jonu" joem ri lhoid yu zi shau" lo da" uri gau yi ziyo' kham zo: boem bye:- Khasu" wim gari abyo, abei lo da" ziyoo jonu" daja: yoo" shi" zigi nanu" se' ago". 35 Houg: su" nghoid yoomo nanu" da" yoem: vhoo" ri ashe: pyam- aci: phyug goo". Houg: lang" gi nanu" da" vhookung: phoug" azeing' yo" yu goo" wa zi nghoid. 36 Mangsoo myid vho: khyoo: ri cang zei: wa ziyo' nya: da" dang: soo" khoin" joem yo' dakhyoo" ti" akyu" yo" kham: yu boem sho' nanu" gi gyi: sheung: nheigloem: yo' zeung: kham ca" nyid boem. 37 Khasu" wim gari jhoem: mungdang: moo daso' ri ju" ri" wa su: gi ayo, daso' lang" ju" ri" wim bye:- Nyang: gi no: nyid theung: nyid wa zi anghoid. 38 Nga" da" deing byeung" byu yi koem gi loem" jeing" ziyo' dei nyid boem wa zi nghoid. Nghoid loug we' nyangnu" mo dayug yug- thang: khyoo: doem tau" thu' byam, lo" nghoid rigi ngoo gi nyang: ri vho: ngei loo: wa zi anghoid- ga: wigi tid nyid. 39 Ngoonu" gi doem tau" zoid phang: lo" da" byu yi anghoid loo: za: loem" jeing" lho: khyoid yu shau" da" byu yi nghoid nyid boem bye:.