THESALONI
BANG: JHANG FOIN: KAID DA" MOUGSOUG" DALOEM:
(1Thessalonians)
Thesaloni voo gi Roma mungdain khoug: mo Makedoni moug: toem mo yung" zhug to" voomoo" zeing nghoid- Lagyoo: Polu gi Philipi voo mo thu' lo" lho: hau: voo moo noku phung: daloem: ri tam: too" bye:. Nghoid loug we' khamyhang amyang" ri Thesaloni voo moo Yuda byumyu" anghoid Yuda noku thung" moo myid bo loem" loo mo, da" agyoo: moo Polu kho" kyo" da" ngeibu: lu dang: gi oung: doid loo" yoomo no" zo nheigloem: bo da" Yuda yi gi thougtheung lo zi thoung" shau" nyid boem- Houg: yoomo lagyoo: Polu gi Thesaloni voogung mo wigi Beria voo khyoo: phang: thu loo" ca" lo- hau: jangmo wigi Korinthu voogung khyoo: ju" lo" da" uri nyang: da" moo" voin byencang" phoo' nghoid da- Timothi doem cang ju" lo wigi nyang: re" tid kyo" yoomo Thesaloni voogung moo bue" nyid da" khyoo: ri shau" gyo: yu.
Lagyoo: Polu gi Thesaloni voo mo phung: byu yi jhang khyoo: lhid" kaid da" xangshid" lheung" lhid" pug' da" myid soin khyoo: gi Thesaloni voo moo nyid da" phung: byu yi ri yoem: byid: da" Venyi: yoem: vhoo" yo" yu wa shid re" lhid" kaid zi nghoid. Hau" mougsoug" moo nyang: gi hau" da" byu yi da" loem" jeing" khyoo: yo' jheddab emyed, yoomo jeju" ri coung" nghei nyid. Nyangnu" yo' dage" nyang: nyid shi" da" ayo, moo nyang: khasu" kangso dei nyid yab, lid loo bye: da" khyoo: ri doem tid poin" bye:. Hau: thang: ri Khristain byu dayug yug gi Khristu aju" ri" shi" uri shid: lo" byug nghoid rigi Aseing doem ju" re" uri byid: wa ga: da" apyaid atoo: mo kangso ri yo" kham: yu wa la"? ga: da" dang: myid: khoin" ri Khristain phung: khoug: moo myed: nyid boem ziri sho' kyo" nyid. Polu gi he: da" amyeung" akhang" ri ci: lho: Khristain byu yi gi Khristu doem ju' ri" wa da" ayo, ri lang" nyid zoore zei: soo, ca" da" moozoo" joem ri atheung: anoo: loo: za: xo' zei: yhe: loo" ca" da" khyoo: ri tid poin" pyeing: kaid.
1
1 Polu- Sila (Silas) Sivanu ( Silvanus) he: da" myeing eig ja: gi Greek myeing mo nghoid wigi dakhyoo" ti" nghoid. Kha: ja: ci: nghoid loug we' ashoid da- Polu yo' Timothi mo wigi Phoo Mangsoo yo' Aseing Yesu nghoid da" Thesaloni voogung mo phung: byu yi jhang khyoo: mougsoug" lhid" foin: kaid. Jeju" yo' ngeipyo: da" khyoo: gi nanu" moo dajo, jo, baja" o".
2 Ngoonu" gi nanu" dangain" bang: shid mo khanham we' jeju" ri dacoung" nghei nyid boem ziyo' ngoonu" da" akyu" mho' dang: moo nanu" da" myeing ri dabo kaid mho' nyid boem.
3 Khasu" wim ga: ri nanu" da" loem" jeing" khyoo: moo" zei: nyang: khasu" zei: yhe: lo" nyid boem ziri we' nanu" da" jheddab emyed yo' khayhi' gyeing"- moozoo" ri zei: so' nyid boem bye: ziri we' Aseing Yesu Khristu moo nanu" da"
4 Mangnhung" yi we' Mangsoo nanu" ri jheddab wigi nya: byumyu" yi bue" lo boem wa shid re" khe:yu bye: khyoo: ri nanu" se' nyid boem bye:.
5 Khasu" wim gari- ngoonu" gi hau" ngeibu: lu dang: gi ri- mung dang: khyo" za: we' anghoid- yoem: vhoo" khyo" we' gyeungshang: da" Venyi: khyo" we' hau" ngeibu: lu dang: da" deingmain" khyoo: ri bain" sho' nyang: loem" jeing" da" myid yo" we' nanu" jhang khyoo: ci: re" lho: kho" kyo" boem bye:. Ngoonu" gi nanu" yo' dage" nyid nyid da" ayo, moo nanu" ge loo wa shid re" ngoonu" khasu" koid lho: kangso dei so" yen" bye: da" khyoo:- nanu" nyang: se' nyid boem bye:.
6 Nanu" gi ngoonu" da" khoo" shid: yo' Aseing da" khoo" shid: ri yu" yu cang lo" nyid boem bye:- nanu" gi kyikhyeug, shen" yhen da" kyikhyeig myoo" sho' shau" boem nghoid loug we' hau: ngeibu: lu dang: ri gyeungshang: Venyi: khyo" yo" yu da" gau yi ngeibu: kang: lung bu, ziyo' lhoem: yu boem abye:.
7 Houg: su nghoid yoomo nanu" gi Makedoni mung" yo' Akhaia mung" mo loem" jeing" da" byu yi shidkhoin" moo akhyoo" again da" khoo" shid: daloem" bue" lo boem bye:.
8 Khasu" wim ga: ri nanu" jhang mo wigi hau" Aseing da" mungdang: gi Makedoni mung" yo' Akhaia mung" goin" jang" moo fu" nheung, lo" ziza: we' anghoid loo- Mangsoo moo nanu" da" loem" jeing" loemkhau: khyoo: ri we' joyoo khyi khang" moo" moo byo ngam, loo" bye:. Houg: su" nghoid yoomo nanu" ri citid' cang aboo loo.
9 Nanu" jhang moo ngoonu" ju" re" da" uri nanu" gi kha: khyo" ngoonu" ri lhoem: tau yu boem bye: da" khyoo: ri we' nanu" gi dadei nyid ziyo' deingmain" nyid da" Mangsoo ri noku loem khoug: wa shid re" yu soolhoo: joem ri nung, phoug pyam lho: Mangsoo jhang khyoo: khasu" phoug lheung: lo boem khyoo: ri we'.
10 Mougkhung: mougdi khyo" ju" ri" wa da" Mangso nya: zoo: ri dalang" nyid boem ziri we' hau" byu yi dangain" mo, gi tid fu" nyid boem abye: go". Hau: nya: zoo: Yesu gi shid: bye: jangmo Mangso wigi doem dei to'' loo nhang: yoomo ju" loo wa da" Mangso nheig yo: lo bidnyid mo, nanu" ri khyoid khyi: yu su: nghoid nyid.