4
1 Yhoem: seing: yi we"- nanu" we' mougkhung: tho' moo Aseing dayug nyid ziri myid boin: zoore nyang: tu: nya: da" join yi ri dei nhang: zo: nyid da" khyoo: moo yu" tu, lho: tarha" ziyo' nyeung veung" dain: khyo" dakoid nyid ge.
2 Anoo: loo:- atheing: loo: akyu" damho, nyid ge'. Hau: tho' moo gootu: nanu" akyu" mho' khyoo: moo zid" zoore Mangsoo ri jeju" daboin: nyid ge'.
3 Aseing Yesu da" no, thang mungdang: ri yo" kho" kyoo" wa shid re" amyeung" akhang" akhyoo" ayo, ge zi Mangsoo gi nyhang" ri byid: baja" ngoonu" shid re" we' akyu" dabo mho' nyid ge- Khasu" wim gari Khristu da" no, thang mungdang: ri kho" kyoo" yoomo akhid" ngoo gi thung moo loung" jo.
4 Ngoo kho" kyoo" eung: ziyo' dakhyoo" ti" gyeung: gyeung: yo" kho" kyoo" wa shid re" akyu" bo mho' nyid ge'.
5 Nanu" yo" yu da" amyeung" akhang" ri goolhoo: zoo: ci: yhoung: lho: aloem" jeing" bang: yo' zoem" khau: uri- phajhi" bo nyid ge.
6 Nanu" tid da" dang: khoin" joem gi- khanham we' gyo: da" dang: yo' myid loem" zi nghoid baja"- nyangnu" doem myed: da" dang: khoin: joem ri jo da" dang: phid: yo" byid: sho' xei' too" ge'.
7 Nanu" da" jheddab mangnhung" phoo'- jhug' zug, da" moo" voin su: Aseing da" moozoo" jid: zoo" moo bo pang" bo thoug da" deizoo: nghoid da" Tukhiku gi ngoo yo' sen: da" lu dang: dangain" ri nanu" jhang tid kyoo" wim bye:.
8 Ngoonu" dangain" bang: khasu" bue" nyid boem da" khyoo: nanu" ri tid kyo" ziyo' nanu" da" nheigloem: emyed joem ri yoem: foin, byid: zi shug: goo" baja"- ngoo, gi nyang: ri nanu" jhang khyoo: nhang: kaid zi nghoid.
9 Nya: tho' moo je" wigi nanu" jhang mo nghoid da- gye" jhug' zug, da" jheddab mangnhung" phoo'- Onesimo ri we' ngoo nhang: kaid bye:- nya: eig yug gi hid: moo bue" khyoo: dangain" ri nanu" jang moo tid kyoo" goo" wa su.
10 Nga" da" thung: loung" luzoem" cang" Aristaku we' nanu" ri vhu" kaid- hau: lho: Barnaba da" zoo: oug: Marku we' nanu" ri vhu" kaid (Nanu" jhang khyoo: Marku ju" re" lo uri lhoem: tau, yu byid: ge' ein: tid kaid da" khyoo: joem ri) nanu" yo" yu too" gu nghoid bye:.
11 Yustu ein: we' myheung to" da" Yoshu we' nanu" ri vhu" kaid hid: bang: soem" yug za: Mangso mungdain shid re" ngoo yo' dage" moo" voin da" byen, cang" loem" jeing" da" Yuda byu yi nghoid ago"- hid: bang: gi ngoo ri gye" bo pang" thoug bye: mo, nghoid ago".
12 Nanu" jhang mo nghoid da" Khristu da" join phoo' Epaphra gi nanu" ri vhu" kaid da- nanu" gi loem" jeing" da" khyoo: moo geingteing jo, wa ziyo' nheig boo ung: gyeung: ziyo' jhug zug, da" Khristain yi bue" loo sho' Mangsoo vho: ngei khyoo: ri goolhoo' cang: lho: nyang: gi nanu" da" shid re" gye" loem" jeing" myid yo' akyu" mho' nyid.
13 Nyang: gi nanu" da" shid re" we' Ladoki yo' Herapoli moo nyid bang: shid re" we' moozoo" ri ashid: asoo" yoem: kaid nyid zigi ngoo gi nya: shid re" sagsi kham byid.
14 Nga" da" jheddab moocid" sara: Luka yo' Dema gi nanu" ri vhu" kaid ago".
15 Ladoki moo nyid da" mangnhung" yi yo' sayen" myhi' Numpha nya: yhoem: moo shau" go" wigi noku da" phung ri bo vhu" byid: kaid.
16 Hid: foin: kaid da" mougsoug" ri nanu" bain nghab yu lang" Ladoki phung: byu yi ri we' nghab nhang: kaid ge- Houg: yo' dakhyoo" ti" Ladoki phung: ri foin: kaid mougsoug" ri we' nanu" nghab yu" ge.
17 Hau: Aseing moozoo" ri voin vu, wa shid re" nang ri ab, byid: to" da" yoovoin, ri bain sho' zei: we' ein: wigi Arkhripo ri bo tid kyoo" byid: ge.
18 Ngoo Polu nyang:- nga" lo, yo' he: da" vhu" kaid mougsoug" ri lhid" kaid zi nghoid- ngoo gi thung: moo loung" jo, uri we' nanu" ato" myhed, pyam goo" lhe"-
Mangso jeju" gi nanu" yo' dage" dabo jo, baja".