1 Moshe da" yugphoo' Midian khainjung phoo Yethru gi Israela byumyu" yiri Mangso wigi Egutu mung" mo shu" thu lo da" uri Moshe yo' Israela byumyu" yiri Mangsoo cikoid byid: lo da" khyoo: ja: khang" moo" ri shau" gyo: da:. 2 Houg: yoomo nyang: gi Moshe jhang khyoo: Moshe nyhid: too" kho' da" nya: zo: myhi' Ziphora ri we' nya: zoo: eig yug nghoid da" Gershom yo' Eliaza ri shu" wigi re" shoug" bye:. 3 (Moshe gi ?Ngoo gi subi" mung" moo tungbau danghoid? ga wigi zooshang: da yug ri Gershom ga: myeing byid: bye:. 4 Nyang: gi ?Nga" phoo da" Mangsoo ngoo ri pang" wigi Egutu khokham ngoo ri said pyam wa jang" mo khyoid yu bye:? ein: yoomo nyang: gi gootu: yuggi zoo: ri Eliaza ga: myeing byid: bye:.) 5 Yethru gi Moshe da" yhoem: seing: myhi' yo' nya: zoo: eig tang: ri we' shu" wigi Moshe dab koid lho: nyid da" gyeung" shang: boem dain" pyoid yoo khyoo: re" ago". 6 Yethru gi nyangnu" re" lo nyid khyoo: ri Moshe jhang khyoo: kyo" kaid da:. 7 Houg: lang" Moshe gi nyang: ri yhe: thu shoug" wa shid re" thu lo" wigi nya: shidkhoin" moo goeb, pid lho: babug bug bye:. Nyangnu" dayug yo' dayug yang" zain: khyoo: myid: go" wigi Moshe da" zoem" khyoo: vang yhe: loo" bye:. 8 Moshe gi Yethru ri Israela byumyu" yiri khyoid yu wa shid re" Aseing gi Egutu khokham yo' byumyu" yiri khasu" koid bye: ga ziri dangain" tid kyoo" bye:. Nyang: gi byumyu" yi gyung: khyoo: moo thung" shau" da" yau: khe" kyi" khyeug yo' Aseing gi nyangnu" ri khasu" khyoid yu da" khyoo: ri we' nyang: ri tid kyoo" bye:. 9 Yethru he: ziri dangain" shoug" gyoo: lang" nyang: gau wigi 10 ?Egutu khokham yo' byumyu" yi mo nanu" ri khyoid yu da" Aseing ri coung" ge'. Join koid nyid da" nya: byumyu" yiri khyoid yu da" Aseing ri coung" nghei ge'. 11 Yu phara" dangain" tho' mo Aseing gi gyi: nyid ein: ziri akhid" ngoo si' bye:. Ciwim ga: ri nyang: gi Israela byumyu" dang moo anoug ashoo" zoem" khau: da" Egutu byumyu" yi dang moo hid: yhang: ti" koid pyam yoomo nghoid? ga: tid. 12 Hau: thang: Yethru gi myi: nghi' xoin" du: du: goin" yo' gootu: xoin" joem yo' Mangsoo ri xoin" to' byid: da:. Arun yo' Israela vhujhung: yi dangain" nyang: yo' dage" noku koid khyo" hau: younglho' zoo: noem ri coem' zoo: wa shid re" yhe: ago".

13 Thang: nyid" ri Moshe gi byumyu" yi akhoug: moo tid ngeig go" nyid ziri tarha" dang: phyed byid: nyid wigi nyang: gi nab soin: mo myen" ju" sho' moo" myo: nyid da:. 14 Yethru gi Moshe koid nyid khyoo: ri myang lang" nyang: gi nang byumyu" yi shid re" koid nyid da" he: zi dangain" gi cinghoid la". Byumyu" yiri nab soin: mo myen" ju" sho' hid: moo yab nhang: wigi nang yo' doem go" lho: nang nyang: kyeing" ce: noem koid nyid la"? ga: myid: bye:.

15 Moshe gi ?Ngoo hidsu" koid zigi byumyu" yi nga" jhang re" wigi Mangso da" myid vho: khyoo: ri re" se' yu wa shid re" nghoid. 16 Byu eig yug ngeig goo" wa akhyoo" boo lang" nya: eig yug gi nga" jhang khyoo: re" ago". Houg: lang" ngoo gi nya: eig yug khayug jo ein: ziri dang: phyed byid: wigi Mangso da" amyeing" dang: yo' tarha" ri tid kyo" byid: da:? ga: tid.

17 Hau: thang: Yethru gi ?Hid: nang koid zigi ajoo shi". 18 Nang nyang: we' he: byumyu" yi we' gye" myung: zi nghoid. He: zigi nang nyang: kyeing" koid wa shid re" gye" moo" myo: nyid da:. 19 Akhid" ngoo nang ri ge da" phajhi" dajhi' byid: ba. Mangsoo we' nang yo' dage" nghoid baja". Nang gi byumyu" yi da" gungthid Mangso shidkhoin" khyoo: nyangnu" khyoo: ri ci: yhi: byid: lho: nyangnu" tid go" khyoo: ri yhe: tid kyo" ri dajoo wa. 20 Nang gi nyangnu" ri Mangso da" amyeing" dang: ri jhau" byid: wigi nyangnu" khasu" kangso' dei wa ziyo' nyangnu" khasu" koid wa ziri nyangnu" ri tid kyoo" eung: da:. 21 Hau: tho' ago"- ge: bui" wa da" byu dayham" ri khyen: yu wigi nyangnu" ri byu dakhyeing" yug- dashoo: yug wim xi: yug- daxi: yug ri vhoeb wa da" vhujhung: khyo" khyen: too" we'. Hau: bang: gi deungmain" ziyo' khougvhoid ayu da" Mangsoo ri gyoug phau" myang: da" bang: nghoid ca". 22 Nyangnu" gi byumyu" yi adang moo tarha" agyi moo" zoo" ayo, byeung" koid baja". Yau: khe" moo" zoo" dangain" rigi re" jhang ci: ri" goo" baja"- nghoid loug we' moo" zoo" zoo: yiri gi nyangnu" nyang: dang: phyed byid: goo" baja". Hougsu" nghoid lang" nyangnu" re" yoovoin bo gam yu yoomo nang moo" zoo" koid lei wa nghoid. 23 Mangso da" amyeing" dang: yo' dakhyoo" ti" nang he: ziri koid nghoid rigi nang myung: wa zi anghoid. Hau: byumyu" yi dangain" we' nyangnu" moo" bain lho: yhoem: khyoo: yo" loo" wa zi nghoid? ga: tid da:.

24 Moshe gi Yethru da" phajhi" byid: dang: ri khab' yu wigi 25 Israela byumyu" yi akhoug: mo ge bui" wa da" byu ri khyen: yu bye:. Nyang: gi nyangnu" ri byu dakhyeing" yug- dashoo: yug- wim: xi: yug- daxi: yug ri vhoeb wa da" vhujhung: yi khyo" soin' too" da:. 26 Nyangnu" gi byumyu" yi adang moo tarha" agyi moo" zoo" ayo, byeung" koid wigi yau: khi" moo" zoo" ri Moshe jhang ci: yhe: lho: lei da" moo" zoo" rigi nyangnu" nyang: dang: phyed byid: ago".

27 Hau: thang: Moshe gi Yethru ri vhu" kaid lho: Yethru gi yhoem: khyoo: doem tau" lo" da:.