12
1 Aseing gi Egutu moo Moshe yo' Arun ri
2 ?He: lhammoo" khyab gi nanu" da" zain nyid mo xang: shi" da" lhammoo" khyab nghoid da:.
3 Israela byumyu" dangain" mo, ri he: jhau" shid dang: ri jhau" byid: we'. He: lhammoo" khyab daxi: nyid" nyid" ri nyang: tu: nya: yhoem: shid re" yugkhang" moo" yang zoo: anghoid lang" coidbaid zoo: khyen: too" ca" da:.
4 Nya: ikoin deunghku: mo hau: da" gougnyhoug ri abain zoo: nghoid wa rigi yugkhang" moo" yo" zoo: wa nhoo' tu' yu" wigi byu ri ngab lho: nyang: yo' nya: yhoem: kyoo" cang" shoin" wigi dadu: ri gam goo" ge'.
5 Nanu" gi yang zoo: anghoid lang" coidbaid zoo: ri khyen: ge'. Nghoid loug we' dam aboo dazain byeung" da" aloo: nghoid ca".
6 Hau: thang: he: khyab daxe: myid: nyid" myen" thang: ri Israela byumyu" dangain" mo, hau: gougnyhoug joem ri said wa nghoid.
7 Byumyu" yigi suid" dayham" ri yu wigi hau: gougnyhoug ri zoo: wa nghoid da" yhoem: joem mo khoem" duang: atho' moo we' khoem" bung moo we' gyoid too" ge'.
8 Hau: myen ri shoo" ri phoid wigi kho" da" macid" fu' yo' doocid" abo da" zooyho' yo' zoo: wa zi nghoid.
9 Hau: ziri ajoem: we' po" lho: we' age zoo:. Nghoid loug we' vhuloem- khyid:- khauseing" khougloem dangain" yo' dagung goin" ziri phoid lho: zoo: ge'.
10 Hau ziri nab soin: ju" sho' ateing too" goo". Deung nghoid rigi myi: moo nghe' pyam ge'.
11 Nanu" hau: ziri gyung soo" wa shid re" khyid: zhung" zhung"- lhamdung: lo, moo ci: wigi void mi void byi: soin' void lho: myab myab zoo: wa zi nghoid. He: zigi ngoo Aseing ri ngi: shab da" lhid: kaid pui" nghoid.
12 Hau: myen ri Egutu mung" goin" khyoo: ngoo jang: sho' lo" wigi byu yi yo' gougnyhoug joem da" yuggi zoo: zooshid" yiri said pyam byid: wa zi nghoid. Egutu mo yu phara" dangain" zi riwe' dam byid: wa zi nghoid. Ngoo gi Aseing nghoid.
13 Khoem" bung moo suid" dab zigi nanu" nyid da" yhoem: nghoid ein: da" laxoem" nghoid wa. Suid" ri myang lang" nanu" ri ngoo lhid: kaid zi nghoid. Ngoo Egutu byumyu" yiri yooboo dam byid: yen" uri nanu" ri bo zang" wa zi anghoid.
14 Nanu" hau: nyid" ri ngoo Aseing cakoid loo bye: ein: ziri boin: nyid wa shid re" laloem lakhoug: pui" ri koid zi nghoid. Hau: ziri ju" loo wa ayo, dangain" mo we' koid nyid wa zi nghoid.
15 Aseing gi ?Nyhed nyid" ju" sho' nanu" doocid" yo' koid da" zooyho' azoo: goo". Doocid" abo da" zooyho' kyeing" dazoo: ge'. Xang: shi" nyid" ri nanu" yhoem: mo doocid" dangain" ri she: lhei" pyam ca" da:. Ciwim gari houg nyhed nyid" akhoug: moo doocid" yo' koid da" zooyho' zoo: su: gi nga" byumyu" mo she: pyam wa.
16 Xang: shi" nyid" yo' nyhed nyid" nyid" rigi nanu" noku coung" wa shid re" zoebphung: koid ca" da:. Nanu" zoo: shug nyeung moo" zoo" mo jain" gootu: ce: moo" we' hau: bidnyid joem moo ayo" koid wa.
17 He: pui ri khanham we' koid ge' ciwim ga ri ngoo nanu" da" byumyu" yiri Egutu mung" mo shu" thu lo da" bidnyid nghoid da:. He: bidnyid mo he: pui" ri ju" loo wa ayo, dangain" moo nanu" koid nyid ge'.
18 Xang: shi" lhammoo" khyab daxe: myid: nyid" myen" thang: mo eig xe: danyid" myen" thang: ju" sho' doocid" kaid da" zooyho' ri nanu" age zoo: wa.
19-20 Hau: nyhed nyid" akhau: mo nanu" yhoem: cang doocid" age: jo,. Hau: mung" mo hku: mo, nghoid nghoid- tungbau yi nghoid nghoid doocid" yo' koid da" zooyho' zoo: lang" nyang: ri nga" byumyu" mo she: pyam zi shau" wa? ga: tid.
21 Moshe gi Israela vhujhung: yi dangain" ri khe: yu wigi nyangnu" ri ?Nanu" ikoin deunghku: moo lhid: kaid pui" yo" koid wa shid re" nyang: yug nyang: yang nghoid nghoid coidbaid nghoid nghoid dadu: ri khyen: wigi said ge'.
22 Pagyoem akung: dakung: ri yu wigi gougnyhoug suid" bo da" jarung: moo doin: joem lho: nanu" yhoem: khoem" duang: adang moo we' khoem" bung moo we' hau: suid" gyoid tab too" we'. Nanu" dayug we' nab soin: ju" sho' yhoem: pain' khyoo: age thu wa.
23 Aseing Egutu byumyu" yiri said wa shid re" Egutu mung" jang: sho' lid lo" uri khoem" bung yo' khoem" duang: adang mo suid" ri myang lang" kangso' said da" moug: lagyoo: yi nanu" ri said wa shid re" nanu" yhoem: khoug: khyoo: vang nhang: wa zi anghoid.
24 Nanu" yo' nanu" zooshang: yigi he: tarha" ri apyaid atoo: cang ca" goo" wa.
25 Nanu" ri byid: wa ga: Aseing dangsoo" byid: to" da" mung" khyoo: nanu" vang lo" uri he: noku thung" ri: ri nanu" koid ca" wa.
26 Nanu" da" nya: zooshang: yi nanu" ri ?He: noku thung" ri: da" dang: kang: khasu" lha"? ga: myid: nghoid ri
27 Nanu" gi he: zigi Egutu mung" moo Aseing gi Israela byu yi da" yhoem: joem ri lhid: kaid yoomo Aseing ri ngi: shab byid: wa shid re" koid da" lhid: kaid pui" da" xoin" nghoid da:.
Nyang: gi Egutu byumyu" yiri said pyam nghoid loug we' ngoonu" rigi teing to" da? ga: tu" goo" wa? ga: tid. Israela byumyu" yi poid thug thug wigi noku boem bye:.
28 Hau: thang: nyangnu" thu lo" wigi Moshe yo' Arun ri Aseing amyeing" byid: to" ziyo' dakhyoo" ti" koid bye:.
29 Myen" gamgung ri Aseing gi khokham zhungtang thid yu eung: da" khokham nya: zoo: zooshid" mo zi myidthung: lung" da" thung: byu nya: zoo: zooshid" ju" sho' Egutu mung" mo zooshid" dangain" mo, yo' gougnyhoug joem mo xang: shi" xang" da" gougnyhoug nu" dangain" ri said pyam bye:.
30 Hau: myen ri khokham we' khokham gyizoug: yi we' gootu: Egutu byumyu" yi dangain" mo, we' to' re" ago". Yuggi zoo: zooshid" mang ajo, da" yhoem: daloem: we' ajo, loo: yoomo Egutu damung" goin" jang" moo nyho: ngoug nyid ago".
31 Hau: myen ri nyang: khokham gi Moshe yo' Arun ri khe: yu wigi ?Thu' loo" ge'. Nga" mung" mo nang yo' re" Israela byumyu" thu ge'. Re" tang: tid ziyo' dakhyoo" ti" yhe: wigi Aseing ri noku ge'.
32 Nanu" da" yang joem coidbaid joem nu: kyung joem ri we' shu" wigi thu loo" ge'. Nga" adang moo we' akyu" mho' mainkaid byid: ge'? ga: tid.
33 Egutu byumyu" yigi ?Nanu" athu loo" nghoid rigi ngoonu" dangain" mo, shid: wa zi nghoid? ga: tid wigi byumyu" yi hau: mung" mo myab myab thu loo" wa shid re" jhoin" ago".
34 Houg: yoomo byumyu" yigi nyangnu" da" zooyho' koid da" oug" phain' joem moo doocid" abo da" cen: moin" joem ri kaid lho: nyangnu" byimi yo' thoeb wigi nyangnu" katho' moo vu, ago".
35 Israela byumyu" yigi Moshe tid to" ziyo' dakhyoo" ti" bain koid wigi Egutu byumyu" yi jang" mo sheing: we' ngei we' byimi we' mho' yu ago".
36 Aseing gi Egutu byumyu" yiri Israela byumyu" ri phau" myang: nhang: wigi Israela byumyu" yi mho' da" ja: dangain" ziri byid: ago". Hougsu" nghoid yoomo Israela byumyu" yigi Egutu byumyu" yi da" jonu" ri yo" ci: thu lo" ago".
37 Israela byumyu" yigi Ramese mo zi Sukhod khyoo: khyid: soo" so" yhe: lo" ago". Nyangnu" gi myiyi: yi yo' zooshang: yiri abo soin: loo: za: yuggi zooyang" nyang: 600,000 koo: nghoid.
38 Gootu: byumyu" gye" myoo: sho' we' nyangnu" yang joem coidbaid joem nu: joem myoo: sho' yo' nyangnu" thang: cang lo ago".
39 Nyangnu" gi Egutu mung" mo nyeigdain tung" koin" thu zi shau" wigi zoo: shug joem doocid" kaid da" zooyho' joem koid wa da" ayo, akhyeing: ayoo" yoomo doocid" abo da" zooyho' ri bung: zoo: ago".
40 Israela byumyu" yi Egutu moo yhe: nyid zi 430 zain nghoid bye:.
41 430 zain byeung" nyid" ri Aseing da" byumyu" kung: yi Egutu mung" mo thu loo bye:.
42 Nyangnu" ri Egutu mung" mo shu" thu loo wa shid re" zung" yu" nyid da" ayo, gi myen" nghoid. He: myen ri nyang: ju" loo wa da" ayo, dangain" shid re" Israela yi zung" yu" wa myen khyo" Aseing ri shugbyid: da" myen nghoid da:.
43 Aseing gi Moshe yo' Arun tang: ri ?He: zigi lhid: kaid pui" da" thung" tarha" joem nghoid. Tungbau yi dayug we' lhid: kaid pui" zoo: shug ri age zoo: wa nghoid.
44 Nghoid loug we' qei yu da" join yigi nyang: ri xang: shi" shooyid thang: yham" byid: nghoid rigi hau: ziri yo" zoo: wa nghoid.
45 Daso' dadam re" theing: su: yo' vhoo" kung: yigi hau: ziri age zoo: wa nghoid.
46 Zoo: noem ri nyeing to" da" yhoem: moo kyeing" dage zoo: wa. Hau: ziri yhoem: pain' khyoo: age ci: thu lo" wa. Gougnyhoug da" shooyoug: dayoug: we' age khyau" pyam nghoid da:.
47 Israela byumyu" phung: goin" hau: pui" ri koid ca" da:.
48 Nghoid loug we' athang: ayham" da" yug gi hau: ziri age zoo:. Nanu" phung: moo nyid da" tungbau byu dayug gi Aseing ri phau" myang: ngi shab da" lhid: kaid pui ri koid noug nghoid rigi nya: yhoem: mo yuggi yiri nanu" shooyid thang: yham" byid: ca" wa nghoid. Hau: thang: nyang: gi mougseing: myidseing: yhang: ti" nghoid bye: yoomo pui" moo yo" vang wa zi nghoid.
49 Mougseing: myidseing: yiri we' nanu" jhang bo nyid da" tungbau yiri we' thung" tarha" daja: za: nghoid wa? ga: tid.
50 Moshe yo' Arun ri Aseing amyeing" byid bye: ziyo' dakhyoo" ti" Israela byumyu" yi dangain" phau" myang: ziyo' koid ago".
51 Hau: nyid" ri nyang:- Aseing gi Israela byumyu" kung: yiri Egutu mung" mo shu" thu lo da:.