39
1 Yoem: moo" bo Aseing tid zigi ?Shid: se' da" byu we"- Mesheg yo' Tubala byumyu" yi da" vhoebkhang" zoug: moo? Goga ri tid phue: pyam we'. Houg: lho: ngoo gi nya: gyivoo: nghoid khyoo: nyang: ri tid kyoo" we'.
2 Ngoo gi nyang: ri khyoo: seig khyoo: lheing: phug nhang: kaid wigi nyang: gi Israela boem joem khyoo: ju" loo sho' ve: da" mougzhung: ju" loo sho' ve: da" mougzhung: shoid mo nyang: ri shu" thu yu wa.
3 Hau: thang: ngoo gi nya: da" lo, kung" shoid lo, mo nya: da" lid: ri baid khyo' pyam byid: lho: nya: da" lo, yo shoid mo nya: da" myoo: joem ri baid sain" khyo' pyam byid: wa.
4 Goga yo' nya: gyidab yi nya: da" myid veing" bidnoem mungdain: joem gi Israela mung" mo boem joem moo shid: leung lo" byug goo" wa. Houg: lho: ngoo gi nyangnu" da" shid: manggung joem ri ngho' joem yo' siyoo gougnyhoug lam" joem dangain" da" shid re" zoo: noem khyo" byid: zho" pyam wa.
5 Nyangnu" gi jang: pa: moo shid: leung loo" goo" wa. Yoem: moo" bo Aseing ngoo tid too" bye:.
6 Ngoo gi Magoga mougmyid mo zi hang" wigi we' phibu apu' lho: za: nyid boem da" panglai: gyid yam cang mo mougmyid joem dangain" ri ngoo myi: nghe' tab kaid wa.
7 Ngoo gi nga" da" gyeung" shang: myeing ri nga" byumyu" Israela bang: si' sho' koid wa. Houg: lho: nga" da" myeing ri ngi: adoem yoem" nhang: loo wa. Houg: lang" byumyu" yigi ngoo Israela da" gyeung" shang: Mangsoo Aseing nghoid ziri se' loo goo" wa.
8 Yoem: moo" bo Aseing tid zigi ?Ngoo tid da" bidnyid gi gyeing" nyhang: ju" loo wa.
9 Israela mung" mo voomoo" joem moo: nyid boem da" bang: gi thu lo" wigi she: pyam too" kho' da" gyi jonu" joem ri thang" koid wa shid re" cang koid: zheing" loo goo" wa. Nyangnu" gi goo joem lid: joem myoo: joem lham: joem thung" keing: joem ri myi: nghe' boem wigi nyhed zain ju" sho' yo" nghi' wa.
10 Nyangnu" gi jangpa: mo thang" ashoo: ca" goo" wa. seig moo" yoo mo seiggam joem we' athug ca" goo" wa. Ciwim gari nyangnu" nghi' wa shid re" gi she: pyam too" kho' da" gyi jonu" joem yoo" wa zi nghoid. Nyangnu" jang" mo lanyhoeb lhoid yu wigi phyo' zoo: bang: ri nyangnu" wigi doem lhoid yu lho: phyo' zo: pyam boem goo" wa. Yoem: moo" bo Aseing ngoo tid too" bye:.
11 Aseing tid zigi ?He: zi dangain" bue" lo da" uri ngoo gi Israela mung" mo xoo" thoem" da" bidthu shoid gyung: soo" bang: da" lang: khung" moo Goga ri myhoeb wa shid re" loeb boug daloem: byid: wa. Goga yo' nya: da" gyidab dangain" ri hau: joyoo moo myhoeb pyam lho: hau: lang: khung" ri ?Goga da" gyidab lang: khung"? ga: myheing boem goo" wa.
12 Hau: byu shid: mang joem ri Israela byumyu" yi de" pyam lho: hau: mougmyid ri shoem" sain' pyam ri lhammoo" nyhed khyab myang" lo boem wa.
13 Hau: mougmyid mo yugkhang" moo" gi hau: mang joem ri bo pang" myhoeb loo goo" wa. Houg: lho: nyangnu" gi he: nga" oung: doid da" bidnyid moo ngi: shab byid: zi shau" boem goo" wa. Ngoo yoem: moo" bo Aseing tid too" bye:.
14 Hau: lhammoo" nyhed khyab lid: lo" thang: ri hau: mougmyid ri yo" sho' sain' pyam wa shid re" hau: myidjang tho' moo deing jo, da" byushid: mang joem ri yhe: sho: myhoeb pyam wa shid re" mungdain: jang: sho' so" lheing: yen" wa byu yiri khyen: to" boem goo" wa.
15 Nyangnu" gi hau: mungdain: boem moug: khyoo: do, do, gyoo" gyoo" so" yen" bang: gi byu shooyoug: ri myang khang" moo" hau: ziri nyangnu" asoo" tab too" khoo' wa zi nghoid. Houg: lang" loeb du bang: re" wigi hau: shooyoug: ri Goga da" gyidab lang: khung" moo yo" du: myhoeb pyam wa zi nghoid.
16 (Hau: aqei: ayam moo gyidab myeing cang myheing da" voogung daloem: jo, wa). Houg: lho: hau: mougmyid gi doem younglho' loo wa.
17 Yoem: moo" bo Aseing tid zigi ?Shid: se' da" byu we" khyi' khang" moo" mo ngho' joem yo' gougnyhoug joem ri khe: yu lho: nyangnu" shid re" ngoo soin' too" byid: da" xoin" joem ri byid: zhoo" we'. Hau: zigi Israela mung" mo boem joem moo pui" zeing daloem bui" wa wigi houg: moo nyangnu" shoo" shoug" zo: suid" shoug" shug loo goo" wa.
18 Nyangnu" gi gyizoo: yi da" manggung ri zo: wigi mougmyid tho' mo zoug: yi da" suid" ri shug goo' wa. Houg bang: dangain" gi yang loo: joem yang nu" joem coidbaid joem yo' xu: da" nu: joem ri yhang: ti" said pyam zi shoug" bang: nghoid wa.
19 Ngoo gi he: byu yiri xoin" joem khyo" said pyam uri ngho' joem yo' gougnyhoug joem gi xu: ri nyangnu" yo" zo: nhoo' zo: lho: suid" ri yed sho' shug boem goo" wa.
20 Nyangnu" gi nga" da" zoobui" moo myang: joem yo' myang: zhung: bang: gyizoo: yi yo' gyi khaid bang: ri nyangnu" yo" zo: yhi' zo: boem goo" wa. Ngoo yoem: moo" bo Aseing tid too" bye:.
21 Aseing tid zigi ?Ngoo gi byumyu" yiri nga" da" phung" yoeb ri myang nhang: lho: nga" da" tarha" deingmain" da" khyo" myid phyed ziri koid bui" wa shid re" nga" yoem: so' ri khasu" ci: ziri nyangnu" ri ci: shug byid: wa.
22 Hau: ayo mo thang: phyang" Israela byumyu" yigi nyangnu" da" Aseing Mangsoo ngoo nghoid ziri se' lo boem goo" wa.
23 Houg: lho: Israela byumyu" yi pyoung" shu" nyhid: too" shoug" zigi ngoo ri thougtheung shoid boem da" yooboo joem gang mo nghoid khyoo: ri byumyu" yi se' loo goo" wa. Ngoo gi nyangnu" mo lheing: phug lo" wigi nyangnu" da" gyivoo yigi nyangnu" ri oung: pyam ziyo' nyangnu" ri gyipui" moo: said pyam boem agoo".
24 Ngoo gi nyangnu" ri nyangnu" da" ayung" alho' ziyo' nyangnu" da" akhyeing" ziyo' moin: yi" ziri byid: bye:. Ngoo gi nyangnu" mo lheing: phug loo" bye:.
25 Yoem: moo" bo Aseing tid zigi ?Nghoid loug we' akhid" ngoo gi Israela byumyu" yi nghoid da" Yaku da" amyed ashen yiri nheig khyeug yu wigi nyangnu" ri dalheing: doem nyid gi yab ge nhang: wa. Ngoo gi nga" gyeung" shang: myeing ri goem loem yu wa.
26 Nyangnu" gi nyangnu" da" mougmyid moo hang" wigi we' akyug nhain' loo: goem loem tung" dalheing: doem" lo" nyid boem uri nyangnu" gi ngoo mo phug lo" byug boem yoomo nyangnu" ngi: yoem" shoug" khyoo: ri yo" to" myhid pyam boem goo" wa.
27 Byumyu" myoo" sho' bang: ri nga" gyeung" shang: khyoo: ri yo" ci: shug wa shid re" ngoo gi nga" byumyu" yiri nyangnu" da" gyivoo yi nyid da" mungdain: dangain" mo doem shoug" thu yu wa.
28 Houg: lang" nga" byumyu" yigi ngoo nyangnu" da" Aseing Mangsoo nghoid ziri se' lo boem goo" wa. Nyangnu" he: khyoo: ri se' lo boem goo" wa. Ciwim gari ngoo gi nyangnu" ti" thung: byu bui" nhang: kaid lho: akhid" nyangnu" ri dayug rilang" ateing too" loo sho' khe: zheing" yu wigi nyangnu" da" mougmyid khyoo: doem shu" tau" yu bye:.
29 Ngoo gi nga" da" Venyi: ri nga" byumyu" Israela yi dang moo foid shoin" khyoo' byid: wigi nyangnu" mo khanham we' alheing: phug loo" loo: wa. Ngoo yoem: moo" bo Aseing tid too" bye:.