1 Aseing ngoo ri dang: tid da:. 2 Nyang: tid zigi ?Shid: se' da" byu we"- Magoga moug: mo Mesheg yo' Tubala byumyu" yi da" zoug: moo" Goga ri tid pei" pyam we'. Nyang: ri tid pei" pyam wigi 3 Ngoo yoem: moo" bo Aseing gi nyangnu" da" gyivoo nghoid ziri tid kyoo" we'. 4 Ngoo gi nyang: ri lang: phug lheing: yu wa. Nya: da" amcam" joem langhui" wigi nghue" yu lho: nyang: yo' nya: da" gyizoo: phung: joem ri she: khyoid loo" wa. Nya: da" gyidab gi myang: joem gyizuang void da" myang: jui: bang: yo' dage" gye" myo: boem ago". Houg: lho: gyizoo: yugkhang" moo" gi goo dakhyab khyab yo' shamcoin" dacam" voin boem. 5 Persi- Etiopi yo' Libya mo gyiphung: joem gi nyang: yo' dage" nghoid wigi dangain" bang: gi goo joem yo' joto' mug joem yo" boem ago". 6 Mougzhung: shoid Gomera yo' Bed Togarma mougmyid mo gyi khaid bang: dangain" gi nyang: yo' dage" nghoid ago". Hougyo' dayhang: ti"- gootu: byumyu" yi mo byu yi we' nya: shoid moo bo bo ago". 7 Jen" jen" soin' to" wa shid re" yo' nya: da" gyizoo: phung: joem ri we' nyang: amyeing" byid: ri tid kyoo" we'. 8 Zain nyid myoo" sho' lid: lo" thang: ri hau: byumyu" yi mungdain: myoo" sho' mo, shu" pyoung" yu lho: dage" nyid nyid da" joyoo- byumyu" yi gyipui" ri agyug ca" lo da" mungdain: daloem: ri yhe: jhen" vang seing: yu wa shid re" nyang: ri ngoo amyeing" byid: wa. Nyang: gi jham" coug: youg gye" myang" sho' she: pyam too" nghoid loug we' akhid" byu yi yug yoo tung" nyid boem da" Israela boem joem ri yhe: jhen" vang seing: yu loo wa. 9 Nyang: yo' nya: gyidab gi byumyu" myoo" sho' yo' dage" uglid yhang: ti" khaid zain: lo wigi jhoemmoug" pung yhang: ti" hau: mougmyid ri nghoeb pyam loo wa ga: tid da:.

10 He: zigi Goga ri yoem: moo" bo Aseing tid zi nghoid da:. ?Hau: ayo, ju" lang" nang gi akhyeing" da" moo" zoo" ri myid shid" thu loo wa. 11 Nang gi gyikhoug: zung ajo,- vang khyam: abo da" voomoo" joem moo yug yoo myenjham" ziyo' goem loem tung" nyid boem da" byumyu" yi joyoo' khyang: khyang: de: de: mungdain: khaid jhen" vang seing: yu wa shid re" myid phyed loo goo" wa. 12 Nang gi goonham' dalheing: byo, yoin" jo, da" voomoo" joem moo nyid boem da" byu yiri lhoid zo: wigi lanyhoeb joem shoem" yu pyam wa. Nyangnu" ri byumyu" yi mo shu" khaid zheing" yu lho: akhid" nyangnu" gi gougnyhoug joem yo' jonu" joem yo" wigi mougmyid da" khyookang" moo nyid boem ago". 13 Sheba yo' Dedan mo byu yi yo' Spain mung" moo voogung joem moo nyid boem da" phaga: byu yigi nang ri hid: su" ga: myid: loo goo" wa. Nang gi lanyhoeb shoem" yu wigi lhoid yu wa yo' khaid zain: wa shid re" re" gyidab ri khe: zheing" too" bye: rhe". Nang gi sheing: yo' ngei- gougnyhoug joem yo' jonu" joem shoug" yu lho: hau: zi dangain" ri de" phang: loo" wa ein: myid soin' to" rhe"? ga: myid: loo goo" wa.

14 Houg: lho: Goga ri nyang: yoem: moo" bo Aseing citid nyid ziri yhe: tid kyoo" wa shid re" ngoo ri nhang: kaid da:. ?Akhid" nga" byumyu" Israela gi goem loem tung" nyid boem uri 15 nang gi mougzhung: shoid gye" ve: da" re" joyoo mo byumyu" mungdain: myoo: sho' mo dangain" myang: zhung: da" gyidab zeing dadab mo yoem: so' gyi: da" gyizoo: yiri shu" loo wa. 16 Nang gi mougmyid moo hau' lid: lo" da" uglid yhang: ti" nga" byumyu" Israela ri khaid zain: loo wa. Hau: ayo, ju" loo lang" ngoo gi byumyu" yiri ngoo hang" nghoid ziri ci: shug byid: wa yo' nang khyo" wigi ngoo koid lo" da" moo" moo nga" gyeung" shang: ziri ci: shug byid: wa shid re" nang ri nga" da" mougmyid khyoo: jhen" vang yhi: nhang: kaid wa. 17 Nang gi ju" loo wa ayo, gu: moo Israela ri khaid zain: wa shid re" byu dayug ri ngoo shu" loo byid: wa ein: nga" dei zoo:- yi Israela da" lapi: yi khyo" wigi ngoo tid fu" da" uri goonham' ngoo lhung tid nyid su: gi nang nyang: nghoid abye:. Yoem: moo" bo Aseing tid too" bye:.

18 Yoem: moo" bo Aseing tid zigi ?Israela ri Goga khaid jhen" vang lo da" bidnyid moo ngoo nheig joem: yoo: wa. 19 Ngoo gi nga" nheigloem: lung wigi hau: bidnyid moo Israela mung" moo myid leug leug nhang: wa. 20 Mougmyid gyab moo nyid da" wimdo, khang" moo"- ngho' du: khang" moo"- gougnyhoug gyi: zi nge zi du: khang" moo" byu xangsu: yi yugkhang" Moo" gi ngoo ri gyoug wigi ko' ko' nain" loo goo' wa. Boem joem leung gyoo" lo" byug wa. Lug pyo' joem gyoeb gyoo" lo" wa. Vang khyam: joem leung gyoeb byug wa. 21 Ngoo gi yau: khi" acang: joeb wigi Goga ri kyug nain' wa? Ngoo yoem: moo" bo Aseing tid too" bye:. Nya: da" byu yigi nyangnu" da" shamcoin" joem wigi nyang: cang" nyang: zain: go" loo wa. 22 Ngoo gi nyang: ri noophyoo' yo' suid" thu dam wigi yooboo dam byid: wa. Moug: yo' leigvoo tung: byung: joem yo' dage" myi: yo' fang lheig wigi nyang: yo' nya: da" gyidab moo we' nyangnu" shoid moo bo da" byumyu" myoo" sho' bang: jang" moo we' foid shoin" wa. 23 Hid: su" khyo" wigi ngoo gi gyi: sheung: ziyo' gyeung" shang: yug nghoid ziri byumyu" dangain" ri ngoo ci: shug wa. Houg: lang" nyangnu" gi ngoo Aseing nghoid ziri se' loo goo" wa.