21
1 Aseing gi ngoo ri dang: tid da:.
2 Nyang: tid zigi ?Shid: se' da" byu we"- Yerusalem ri ngeug pyam we'. Byumyu" yi noku da" joyoo joem ri ngeug he: pyam we'. Israela mougmyid ri tid poin" we'.
3 Ngoo Aseing tid nyid. Ngoo gi nanu" da" gyivoo nghoid. Ngoo gi nga" shamcoin" ri she: yu wigi nanu" dangain" bang:- gi bang: yo' akhyeing" bang: ri dakhyo" za: said pyam wa.
4 Ngoo gi mougzhung: shoid mo zi mougpyi: shoid moo ju" sho' moo nyid da" yugkhang" moo" ri nga" shamcoin" ci: wigi khaid zain: wa.
5 Ngoo Aseing gi nga" shamcoin" ri she: yu wigi hau: ziri ngoo ashe: pyam too" wa ga: ziri yugkhang" moo" se' loo goo" wa.
6 ?Shid: se' da" byu we"- re" nheigloem: gi bug go, lo" nyid bye: ziyo' dayhang: ti" noo kyeing" kyeing" we'. Nang ri yugkhang" moo" yo" myang da" joyoo moo noo kyeing" kyeing" myeing nyid we'.
7 Nyangnu" nang ri ciwim hougsu" noo kyeing" kyeing" nyid la"? ga: myid: uri ju" lo nyid da" lu dang: yoomo nookyeing" kyeing" nyid ein: tid we'. Hau: lu dang: ju" loo lang" nyangnu" nheigloem: moo gyoug ziyo' byeung" lo boem wa. Nyangnu" lo, joem gi pyoung" lhang" jo, boem wa. Nyangnu" da" voem" myid thang byug wa. Nyangnu" da" poid lug joem gi ko' ko' nain" nyid boem wa ayo, ju" abye:. Hau: zigi hid: moo nyang: nghoid abye:. Yoem: moo" bo Aseing tid bye:.
8 Aseing ngoo ri
9 ?Shid: se' da" byu we"- Lapi: pi: we'. Ngoo citid nyid ziri byumyu" yiri tid kyoo" we'.
Shamcoin"- Shamcoin" dacam" gi sei" tho' wigi soid yung" to" da:.
10 Hau: zigi said wa shid re" sei" tho' to" wigi
Lhab' myeig yhang: ti" bang wa shid re" soid yung" to" da:.
Houg moo ngei pyoo: wa ga: zi ajo,
Ciwim ga: ri nga" byumyu" yigi tid poin" nyid zi ja: khang" moo" yo' yooboo dam byid: khyoo: ja: khang" moo" ri cishu: anhang: nghoid ago".
11 Shamcoin" gi ci: wa jen" jen" soid young" too" bye:.
Hau: zigi byu said su: da" lo, moo byid: too" wa shid re" sei" tho' lho: soid yung" too" bye:.
12 Shid: se' da" byu we". Koug wigi kyi: ngau kaid we'.
He: shamcoin" gi nga" byumyu" yi yo'
Israela vhujhung: yi shid re" nghoid da:.
Nyangnu" gi deing nyid shi" da" nga" byumyu" yi dangain" yo' said pyam zi shoug" loo: wa.
Re" yang gang moo nheigloem: thang ziyo' baid we'.
13 Ngoo gi nga" byumyu" yiri jham" yu" nyid.
Houg: lho: nyangnu" nheigloem: athid boem nghoid rigi
He: zi dangain" gi nyangnu" moo bue" loo wa.
14 ?Shid: se' da" byu we"- akhid" Lapi: pi: we'. Re" lo, yo' lo, pyug pyug we'. Houg: lang" shamcoin" gi pug gi pug gi baid myeing loo wa. He: zigi byu said da" shamcoin" kyug tain' wigi byu said da" shamcoin" nghoid da:.
15 Hau: zigi nga" byumyu" yiri yoem: gyau: nhang: wigi khyid: vhu" thung" leung nhang: da:. Ngoo gi moug: lhab' myeig yhang: ti" yi: yi: bang lho: said wa jen" jen" nghoid da" shamcoin" wigi nyangnu" da" voomoo" ri kyug nhain nyid bye:.
16 Tho' da" shamcoin" nang we". lo, yo shoid zain:- lo, kung" shoid zain: koid we'. Nang lheing: phug lo" da" joyoo khang" moo" zain: we'.
17 Ngoo we' nga" lo, yo' lo, pyug pyug wigi nga" nheig yoo gyo" byug wa. Ngoo Aseing tid too" bye:.
18 Aseing ngoo ri dang: tid da:.
19 Nyang: tid zigi ?Shid: se' da" byu we"- Babelon khokham gi nya: da" shamcoin" ci: wigi yo" ri" wa khyoo: eig khaid phang we'. Hau: khyoo: eig khaid goin" gi damung" dain: mo za: phang shid" ca" wa. Khyoo: kang" moo laxoem" dung" zeing zhug too" we'.
20 Khyoo: dakhaid gi khokham phoo ri Amon voomoo" Raba khyoo: toin" shed wa. Gootu: dakhaid gi Yuda mung" gyidab voomoo" Yerusalem khyoo: toin" shed wa zi nghoid.
21 Babelon khokham gi khyoo: kang" mo laxoem" dung" zeing nam moo yab jo, da:. Nyang: nyang: kha: shoid khyoo: yhi: wa ziri se' wa shid re" myoo: joem ri lhei' nyid da:. Nyang: gi nya: yu phara" soolhoo: joem ri myid: sham: yu" da:. Nyang: gi xoin" khyo" ngei" byid: da" gougnyhoug joem da" seing" ri joeb ca: yu" da:.
22 Akhid" nya: lo, yoo shoid moo Yerusalem ga: lhid" to" da" myoo: khaid ri zhoeb ci: da:. Hau: zigi nyang: ri yhe: wigi thung" thoid loo" wa seig thung" moo" ri koid wa. Gyi khaid thui: khyo" yoid nyhoo: we'. Khoem" moo" joem phyo' da" seig thung" joem de" jhid too" we'. Myid zhoo" du: boem" we' gadug joem du: we' ga: tid nyid da:.
23 Yerusalem byu yigi nyangnu" koid to" da" myid veing" thang" cab gang mo hid su" bue" loo wa ajhoo: go" nghoid da:. Nghoid loug we' lapi: pe: to" zigi nyangnu" ri nyangnu" da" yooboo joem yo' tid poin" lho: nyangnu" ri myheig yu pyam wa tid poin" to" da:.
24 Houg: lho: he: zigi ngoo yoem: moo" bo Aseing tid nyid zi nghoid. Nanu" da" yooboo gi di: di: myang thu loo bye:. Nanu" khayhi' yooboo shoid bye: ziri yugkhang" moo" se' ago". Nanu" gi nanu" nya: avoid asoo" khang" moo" yo' nanu" nya: yooboo ri lho: shug ago". Nanu" gi dang: phyed zi shau" wigi ngoo gi nanu" ri nanu" nya: da" gyivoo yi lo, khyoo: ab byid: pyam wa.
25 ?Israela da" akhyeing" ziyo' agyeungshang: da" vhoebkhang" su: nang we' re" bidnyid nang ri yooboo dam byid: wa lo" thang bidnyid ju" lo nyid bye:.
26 Ngoo yoem: moo" bo Aseing tid too" bye:. Re" da" bidmug yo' vhuthoeb ri khyoid pyam we'. Du go" zi daja: we' adoem jo, loo wa. Myung bang: ri yoem: so' lung: byid: we'. Vhoeb khang" nyid bang: ri lang: khyo' pyam we'.
27 Byo, yoin" bye:. Byo, yoin" bye:. Nghoid bye:. Ngoo gi voomoo" ri byo, yoin" jo, nhang: wa. Nghoid loug we' hau: voomoo" ri yooboo dam byid: wa shid re" ngoo khyen: to" da" su: aju" ju" gi hau: zi abui" wa. Ngoo gi nyang: ri hau: ziri ab byid: pyam wa.
28 ?Shid: se' da" byu we" Lapi: pi: we' Israela byumyu" yiri rue" nyid da" Amon byu yiri yoem: moo" bo Aseing ngoo tid nyid da" dang: joem ri tid fu" kyoo" we'. Nyangnu" ri hid: su" ein: tid we'. ?Shamcoin" gi said wa jen" jen" nghoid nyid bye:. Hau: zigi lhab' su" yi: yi: bang wa shid re" yo' byu said wa shid re" boid yung" too" bye:.
29 Nanu" myang da" yoeb myang gi ajoo nghoid da:. Houg: lho: nanu" pe: da" lapi: dang: gi mhau' zi nghoid. Nanu" gi akhyeing" boem ashoeb boem nghoid ago". Nanu" da" bidnyid nanu" ri yooboo dam byid: wa da" lo" thang bidnyid ju" lo nyid bye:. Shamcoin" gi nanu" da" leung zeung: moo gyo" zang" wa bye:.
30 ??Shamcoin" ri shambyang khyoo: doem kaid too" we'. Ngoo gi nanu" ri phain" so: to" da" joyoo- nanu" ri khu: kaid da" joyoo moo nanu" ri dang: phyed wa.
31 Ngoo wigi nanu" ri moo yi: yi: bang da" myi: wigi nghe' pyoid kaid uri nga" nheig joem: yo: ziri shoug" kham zo: loo wa. Houg: lho: ngoo gi nanu" ri phyo' shoin' jang" moo bue" doid da" athoug" akhyoug: byu yi jhang khyoo: ab byid: pyam wa.
32 Nanu" gi myi: yo' phyo' shoin' pyam zi shoug" wa. Nanu" da" suid" gi nanu" nya: mougmyid moo shoin: gyo" wigi nanu" ri hang" wigi we' amyid boin: loo: wa. Aseing tid too" bye:.