20
1 Ayo, gi ngoonu" ri pyoung" she: nyhid: to" zi nyhed zain ein: zain- lhammoo" wim: khyab daxi: nyid" ri nghoid da:. Israela byu phung: mo vhujhung: dayham" gi nga" jhang re" lho: Aseing myid vho: khyoo: ri myid: sham: yu" da:. Nyangnu" gi nga" shidkhoin" moo re" zhung: boem ago".
2 Houg: lho: Aseing ngoo ri dang: tid da:.
3 Nyang: tid zigi ?Shid: se' da" byu we"- he: vhujhung: yiri dang: tid wigi yoem: moo" bo Aseing tid nyid ziri nyangnu" ri tid kyoo" we'. Nanu" gi ngoo myid vho: khyoo: ri myid: wa shid re" ju" re" boem zi nghoid rhe". Ngoo gi kangso' dei nyid Mangsoo nghoid zi deingmain" ziyo' dakhyoo" ti" nanu" ri ngoo mo ce: daja: we' myid: wa akhang" abyid: wa. Ngoo yoem: moo" bo Aseing tid bye:.
4 Shid: se' da" byu we"- nang gi nyangnu" ri dang: phyed wa jen" jen" nghoid bye: rhe". Houg: lang" hougsu" koid we'. Nyangnu" phoug" phyid" yi koid bye: da" aco' ajhoid khyoo: joem nyangnu" ri tid poin" kyoo" we'.
5 Ngoo tid nyid ziri nyangnu" ri tid kyoo" we'. Ngoo Israela byumyu" yiri khyen: yu uri nyangnu" ri ngoo dangsoo" daloem: byid: to". Ngoo gi Egutu moo nyangnu" ri ngoo nya: gung thu shug wigi ngoo nanu" Aseing Mangsoo nghoid ein: nyangnu" ri tid too" bye:.
6 Hau: uri ngoo gi nyangnu" ri Egutu mo shu" thu yu lho: nyangnu" shid re" ngoo khyen: too" byid: da" nyid gi yab ge ziyo' myid xu: ge da" mougmyid- dangain" tho' ge thang da" mougmyid khyoo: nyangnu" ri shu" vhu" she: loo" wa ein: dang: soo" byid: to" zi nghoid.
7 Nyangnu" ri nyangnu" jheddab da" aco' ajhoid da" yu phara" soolhoo: joem ri she: pyam lho: Egutu moo Mangsoo agyeing" anghoid da" yu phara" joem wigi nyangnu" nya: gung ri agyeing" ashang: abui" nhang: goo" ein: tid too" bye:. Ciwim gari ngoo gi nyangnu" Aseing Mangsoo nghoid.
8 Nghoid loug we' nyangnu" gi pyi: sho: wigi nga" dang: atam" gyoo: nghoid da:. Nyangnu" gi aco' ajhoid da" yu phara" soolhoo: joem ri we' ashe: pyam. Egutu mo yu phara" joem ri we' ato" pyam nghoid ago". Ngoo gi nyangnu" ri hau: Egutu mung" moo nga" nheig joem: yo: khyoo: byeung" sho' ziri kham zoo: nhang: wa jen" jen" za: danghoid lo:.
9 Nghoid loug we' ngoo hougsu" akoid. Ciwim gari hougsu" koid ri nga" myeing ngi yoem" khyoo: bue" loo wa nghoid. Nyangnu" nyid nyid boem da" akhoug: mo byumyu" yi da" shidkhoin" moo ngoo gi nyangnu" ri Egutu mo shu" thu yu wa ein: Israela byumyu" yiri tid too" bye: zi nghoid.
10 ?Houg: yoomo ngoo gi nyangnu" ri Egutu mo shu" thu lo wigi dain" pyoid yoo khyo" shu" loo bye:.
11 Ngoo gi nyangnu" ri nga" amyeing" dang: yo' tarha" joem ri byid: bye:. Hau: ziri cang pyeing bang: yugkhang" moo" gi kangso' yo" da:.
12 Ngoo Aseing wigi nyangnu" ri yung" gyeing" nhang: to" zi nghoid khyoo: ri tid poin" byid: wa shid re" nyangnu" yo' nga" agyoo: moo asoo" khyo" Dougno: Bidnyid ri cang pyeing nhang: too" bye:.
13 Nghoid loug we' nyangnu" gi dain" pyoid yoo moo lang" ngoo ri pyi: sho: ago". Cang" pyeing bang: yugkhang" moo" ri kangso' byid: da" nga" tarha" joem ri nyangnu" phyo' pyam lho: nga" amyeing" dang: joem ri he: ngeug pyam da:. Nyangnu" gi Dougno: Bidnyid ri bain sho' aco' ajhoid bui" nhang: pyam da:. Ngoo gi nyangnu" ri hau: dain" pyoid yoo moo nga" nheig joem: yo: ziri kham: zoo: nhang: wa yo' nyangnu" ri said toem" pyam wa jen" jen" nghoid bye:.
14 Nghoid loug we' ngoo hougsu" akoid. Ciwim gari hougsu" koid ri ngoo gi nyangnu" ri Egutu mo shu" thu yu ziri shau" myang kaid da byumyu" yi phung: gung moo ngoo nya: myeing ri ngi: yoem" nhang: khyoo: bui" wa.
15 Houg: yoomo ngoo gi nyangnu" ri byid: wa aeung: dang: soo" byid: to" da" mougmyid- jonu" yo' myid xu: ge da" mougmyid- dangain" tho' je ge da" mougmyid dain" pyoid yoo moo dangsoo" too" bye:.
16 Ngoo gi dangsoo" daloem: koid too" bye:. Ciwim ga ri nyangnu" gi nga" amyeing" dang: joem ri ngeug he: pyam- nga" tarha" joem ri phyo' pyam wigi Dougno: Bidnyid ri aco' ajhoid koid pyam da:. Nyangnu" gi nyangnu" da" yu phara" soolhoo: joem ri no' wa myid bo boem ago".
17 ?Nghoid loug we' nyangnu" ri ngoo nheig khyeug da:. Ngoo gi nyangnu" ri hau: dain" pyoid yoo moo asaid pyam wa shid re" myid phyed bye:.
18 Hau: gungthid ngoo gi nyangnu" phung: mo zoolu: zooyam yiri tid poin" bye:. Nanu" da" phoug" phyid" yi koid to" da" tarha" joem ri aci: goo". Nyangnu" da" thung" ri: joem ri acang goo". Nyangnu" da" yu phara" joem wigi nanu" nya: gung ri anyhoin: athung" abui" nhang: pyam goo".
19 Ngoo nanu" Aseing Mangsoo nghoid. Nga" tarha" joem yo' amyeing" dang: joem ri tam" gyo: cang yhe: nyid ge'.
20 Dougno: Bidnyid ri young" gyeing" da" bidnyid khyo" ci: ge'. Houg: lang" hau: zigi nyhang" koid to" da" dang: theing da" asoo" yo' ngoo gi nanu" da" Aseing Mangsoo nghoid ziri tid poin" byid: loo wa.
21 Nghoid loug we' hau: xeig mo bang: we' ngoo ri pyi: sho: boem ago". Hau: ziri phau" cang da" yugkhang" moo" ri kangso' byid: da" nga" tarha" ri phyo' shoin' pyam lho: nga" amyeing" dang: ri azoem: nghoid ago". Nyangnu" gi Dougno: Bidnyid ri aco' ajhoid koid pyam da:. Ngoo gi nyangnu" ri hau: dain" pyoid yoo moo nga" nheig joem: yo: ziri kham zoo: nhang: wa yo' nyangnu" dangain" ri said pyam wa jen" jen" nghoid bye:.
22 Nghoid loug we' ngoo hougsu" akoid. Ciwim gari Hougsu" koid ri ngoo gi nyangnu" ri Egutu mo shu" thu yu ziri shau" myang kaid da" byumyu" yi phung: gung moo nga" myeing ri ngi yoem" nhang: khyoo: bui" wa.
23 Houg: yoomo ngoo gi dain" pyoid yoo moo thang" cab gootu: daloem: doem too" bye:. Ngoo gi nyangnu" ri mougmyid gyab goin" khyoo: khaid sain" pyam byid: wa ein: thang" cab to" too" bye:.
24 Ngoo he: ziri koid bye:. Ciwim gari nyangnu" gi nga" amyeing" dang: ri ngeug he:- nga" tarha" ri phyo'- Dougno: Bidnyid ri aco' ajhoid koid wigi nyangnu" phoug" phyid" yi dei byid: lo da" yu phara" soolhoo: ri nyangnu" no' boem yoomo nghoid.
25 ?Houg: lang" ngoo gi nyangnu" ri age da" tarha" joem yo' kangso' abyid: da" amyeing" dang: joem byid: bye:.
26 Ngoo gi nyangnu" ri nyangnu" nya: xoin" joem wigi nyangnu" nya: gung ri anyhoin: athung" bui" nhang: bye:. Ngoo gi nyangnu" ri nyangnu" da" yuggi zoo: zooshid" yiri xoin" khyo" ngei" byid: nhang: bye:. He: zigi nyangnu" ri yooboo dam byid: wa yo' ngoo Aseing nyid khyoo: ri ci: shug wa shid re" nghoid.
27 ?Shid se' da" byu we"- akhid" ngoo yoem: moo" bo Aseing nyangnu" ri citid nyid khyoo: ri Israela byumyu" yiri tid kyoo" we'. He: zigi nyangnu" da" phoug" phyid" yi ngoo ri jhug azug da" khyo" rue" khyoo: gootu: daloem: nghoid da:.
28 Ngoo gi nyangnu" ri byid: wa ein: dangsoo" byid: to" da" moug: khyoo: nyangnu" ri shu" loo bye:. Nyangnu" gi myhang: da" bouggung joem yo' nyau young" da" seiggam joem ri myang lang" hau: joem dangain" jang" moo nyangnu" xoin" ngei" byid: boem ago". Nyangnu" gi nyangnu" nghe' da" xoin" joem yo' xoin" khyo" nyangnu" ngei" byid: da" zabyid yhid: joem wigi ngoo ri nheig yoo: nhang: bye:.
29 Ngoo gi nyangnu" ri myid: bye:. He: nyangnu" yhe: da" myhang: da" joyoo joem gi ci: nghoid la". Hougsu" yoomo hau: ayo, mo nyangnu" gi ?Myhang: da" joyoo? ga: myheing ago".
30 Akhid" Israela byumyu" yiri ngoo citid nyid ziri tid kyoo" we'. Nanu" gi ciwim nanu" da" phoug" phyid" yi shoid lid: lo da" yooboo joem ri koid wigi nyangnu" da" yu phara" soolhoo: joem thang: khyoo: cang yen" boem la".
31 Akhid" nyid" lang" nanu" gi hau: jhungshug ri nyang: shugbyid: lho: hau: yu phara" soolhoo: ri nyang: nanu" nya: zooshang: yiri myi: moo nghe' wigi houg: bang: ri shugbyid: da" khyo" nanu" nya: gung ri anyhoin: athung" koid pyam ago". Hau: thang: Israela byumyu" yi nanu" gi nga" myid vho: khyoo: ci: nghoid la" ga: da re" myid: boem ashi" go". Ngoo yoem: moo" bo Aseing gi kangso' dei da" Mangsoo nghoid zi deingmain" nyid ziyo' dayhang: ti" ngoo gi nanu" ri nga" jang" mo ce: daja: we' ayo" myid: yu nhang: wa.
32 Nanu" gi gootu: mungdain: joem yhang: ti"- gootu: mungdain: mo nyid lho: seiggam yo' lugboem joem ri no' da" gootu: byumyu" yi yhang: ti" du nau ga: myid phyed to" ago". Nghoid loug we' hau: zigi khanham we' bui" wa anghoid.
33 ?Ngoo yoem: moo" bo Aseing gi kangso' dei nyid da" Mangsoo nghoid zi deingmain" nyid ziyo' dayhang: ti" ngoo gi nga" nheig yo: ziyo' nanu" atho' moo nga" yoem: bo lo, yo' nga" yoem: so' dangain" wigi vhoeb wa.
34 Nanu" ri khaid sain" nyhid: to" da" mungdain: dangain" jang" mo ngoo nanu" ri khe: zheing" yu wigi shu" lo da" uri ngoo gi nanu" ri nga" da" yoem: so' yo' nga" nheig yo: khyoo: ri ci: shug byid: wa.
35 Ngoo gi nanu" ri ?Mungdain: joem da" dain" pyoid yoo? khyoo: shu" lo wigi houg: moo nanu" ri myonhoo: shu: lho: yooboo dang: phyed byid: wa.
36 Ngoo gi Sina dain" pyoid yoo moo nanu" da" phoug" phyid" yiri dang: phyed byid: yhang: ti" akhid" nanu" ri dang: phyed byid: wa. Yoem: moo" bo Aseing tid bye:.
37 Ngoo gi nanu" ri teing za: zei: ci: wa wigi nga" dang: theing ri nanu" tam" gyo: cang yhi: sho' koid wa.
38 Ngoo gi nanu" da" phung: moo thougtheung gyi koid bang: yo' yooboo shoid bang: ri yu pyam wa. Ngoo gi nyangnu" ri akhid" nyangnu" nyid da" mougmyid mo yu pyam wa. Nghoid loug we' nyangnu" ri Israela mung" khyoo: adoem tau" loo" nhang: wa. Houg: lang" ngoo Aseing nghoid khyoo: ri nanu" se' loo goo" wa?.
39 Yoem: moo" bo Aseing tid zigi ?Akhid" Israela byu nanu" dangain"- nanu" nya: gung ri ngei bu: nyid ge'. Nanu" da" yu phara" soolhoo: joem ri xo' lho: dei byid: ge'. Nghoid loug we' hau: thang: ri gi nanu" nga" dang: ri tam" gyo: cang yhe: ca" ziyo' nanu" da" yu phara" soolhoo: joem ri xoin" ngei" byid: da" khyo" nga" gyeung" shang: myeing ri ngi: yoem" nhang: ziri theing: pyam ca" goo" wa ein: tid poin" nyid.
40 hau: mougmyid moo nga" da" gyeung" shang: boem tho' moo Israela da" myhang: da" boem moo Israela byu nanu" dangain" bang: gi ngoo ri noku loo wa. Ngoo gi nanu" ri yu" nheugdeug wigi nga" jhang nanu" da" xoin" joem ge thang da" alu: xoin" joem yo' nanu" da" gyeung" shang: da" jhungshug joem ci: ri" wa ziri myid byu nyid wa.
41 Ngoo gi nanu" ri khaid sain" to" da" mungdain: joem mo shu" yu wigi khe: zheing" to" thang:- ngoo gi nanu" nghe' ngei" byid: da" xoin" ri khab' yu byid: wa. Houg: lho: byumyu" mungdain: joem gi ngoo gyeung" shang: ziri shau" myang loo goo" wa.
42 Ngoo gi nanu" da" phoug" phyid" yiri byid: wa ein: ngoo dangsoo" byid: to" da" moug: Israela mung" khyoo: nanu" ri doem shu" tau" yu uri ngoo Aseing nghoid ziri nanu" se' loo goo" wa.
43 Houg: lang" nanu" gi nanu" koid lid: lo da" ngi yoem" khyoo: dangain" ri yo' nanu" nya: gung ri khasu" anyhoin: athung" bui" nhang: pyam bye: khyoo: ri boin: so" loo goo" wa. Nanu" gi nanu" nyang: koid lid: loo bye: da" akhyeing" ashoeb moo" gang mo nanu" nya: gung ri co' loo goo" wa.
44 Ngoo gi nga" phung" yoeb ri goem loem byid: khyoo: ri koid uri ngoo Aseing nghoid ziri nanu" Israela byumyu" yi se' loo goo" wa. Ciwim gari nanu" da" nheigloem: guid" ziyo' akhyeing" ashoeb moo" shid re" moin: yi" da" khyo" yooboo dam ngoo abyid: yoomo nghoid da:. Yoem: moo" bo Aseing tid too" bye:.
45 Aseing ngoo ri dang: tid da:.
46 Nyang: tid zigi ?Shid: se' da" byu we"- mougpyi: shoid khyoo: yu" kaid we'. Mougpyi: shoid ri thougtheung tid wigi mougpyi: shoid mo seig moo" yoo ri thougtheung lapi: pi: we'.
47 Yoem: moo" bo Aseing tid nyid ziri tam" gyoo: wa shid re" mougpyi: shoid mo seig moo" yoo ri tid kyoo" we'. Yu" we'. Ngoo gi myi: tab kaid wa bye:. Hau: zigi re" seiggam dangain"- ajoem: nghoid nghoid- akyug nghoid nghoid nge" pyam zi shoug" wa. Hau: ziri ce: ze: wigi we' ayo" said pyam wa. Hau: zigi mougpyi: shoid mo zi mougzhung: shoid khyoo: dab ju" lo wigi yugkhang" moo" gi hau: myiyham: lung ziri shoug" kham zo: loo goo" wa.
48 Ngoo Aseing myi: nghe' kaid ziyo' hau: ziri hang" wigi we' ayo" said pyam ziri nyangnu" dangain" bang: se' loo goo" wa? ga: tid.
49 Nghoid loug we' ngoo gi ?Yoem: moo" bo Aseing we". Ngoo ri hau: ziri akoid nhang:. Ngoo khanham we' qeishoem joem khyo" tid ziri yugkhang" moo" gi se' gyo: gu nghoid boem ago" ein: tid ngeug he: kaid bye:.