14
1 Israela vhujhung: yi dayham" gi Aseing da" myid vho: ziri myid: yu" wa shid re" nga" jhang re" ago".
2 Houg: lang" Aseing ngoo ri dang: tid da:.
3 Nyang: tid zigi ?Shid: se' da" byu we"- he: byu yigi nyangnu" da" nheigloem: ri yu phara" soolhoo: joem khyoo: byid: pyam lho: soolhoo: joem wigi nyangnu" ri yooboo thoem" khyoo: shu" she: loo" nhang: da:. Ngo wigi dang: phuid: joem byid: abe? ga: nyangnu" myid jho: boem lha".
4 ?Akhid" nyangnu" ri dang: tid wigi ngoo yoem: moo" bo Aseing nyangnu" ri tid nyid ziri tid kyoo" we'. Israela byumyu" yi mo nanu" nyang: nya: nheigloem: soolhoo: yu phara" ri ab byid: lho: hau: soolhoo: joem: wigi nyangnu" ri yooboo thoem" khyoo: shu" yhi: nhang: bang: yo' lapi: dayug jhang re" myid: sham: goo" bang: yugkhang" moo" gi nga" jang" mo dang: phuid: daloem: shoug" yu wa. Hau: dang: phuid: gi re" soolhoo: myoo" sho' yo' moin: yi" da? ga: zi nghoid da:.
5 Hau: soolhoo: yu phara" dangain" gi nanu" Israela byumyu" yiri ngoo mo lheing: loo" nghoid loug we' nyangnu" da" dang: zung" ziri nga" dang: phuid: wigi doem yo" oung: yu wa ein: ngoo myid byu.
6 ?Houg: lho: akhid" ngoo yoem: moo" bo Aseing tid nyid ziri Israela byumyu" yiri tid kyoo" we'. Doem lheing: tau" lo wigi nanu" da" aco' ajhoid soolhoo: yu phara" joem ri to" pyam khoo' ge'.
7 ?Israela byumyu" yi mo dayug yug anghoid lang" Israela byumyu" yi phung: moo nyid da" tungbau byumyu" yi mo dayug yug ngoo mo lheing: phug lo" lho: yu phara" soolhoo: joem ri no' wigi lapi: dayug ri yhe: myid: sham: yu" da" kha: ayo, nghoid nghoid ngoo Aseing gi nyang: ri nya: dang: phuid: byid: wa.
8 Ngoo gi nyang: ri ngeug pyam wa. Ngoo gi nang ri khooshid: khyo" koid pyam wa. Ngoo gi nanu" ri nga" byumyu" yi phung: mo yu pyam wa. Houg: lang" nanu" dangain" gi ngoo Aseing ri se' loo goo" wa.
9 ?Lapi: dayug yug gi shoid da" dang: phuid: ri byid: wa shid re" mhau' fain" zi shoug" nghoid ri ngoo Aseing nyangnu" ri mhau' fain" pyam wigi nghoid. Ngoo gi nyangnu" ri Israela byumyu" yi mo yu pyam wa.
10 Lapi: yi yo' nyangnu" ri re" myid: sham: goo" bang: hang" nghoid loug we' eig yug goin" yooboo dam dakhyo" za: shoug" kham zoo: wa.
11 Israela byumyu" yi ngoo ri atoo" khoo' wa yo' nyangnu" da" yooboo joem wigi nyangnu" nya: gung ri aphyo' shoin' pyam wa shid re" he: ziri koid wa. Nyangnu" gi nga" byumyu" yi nghoid wigi ngoo gi nyangnu" da" Mangsoo nghoid loo wa? yoem: moo" bo Aseing tid bye:.
12 Aseing ngoo ri dang: tid da:.
13 ?Nyang: tid zigi ?Shid: se' da" byu we"- mungdain: daloem: yooboo shoid wigi ngoo ri jhug azug nghoid rigi ngoo gi myhi: ju" re" wigi hau: mungdain: moo zoo: noem ri phyo' sain" pyam byid: wa. Ngoo gi phang" khoug ri nhang: kaid lho: byu yo' gougnyhoug joem ri dakhyo" za: said pyam wa.
14 Hau: byu soem" yug nghoid da" Noa- Danela yo' Yoba bang: houg moo nyid boem nghoid rigi nyangnu" da" ge khyoo: gi nyangnu" da" kangso' ri za: dayo" khyoid yu goo" wa? Yoem: moo" bo Aseing tid bye:.
15 ?Anghoid lang" ngoo gi byu yiri said pyam wa shid re" gougnyhoug lam" joem ri nhang: kaid byid: wigi hau: mougmyid khyo" hang" gyung: avoem" so" lid: loo" sho' gyoug ci' ca" joyoo bui" nhang: pyam wa.
16 Hau: byu soem" yug hau: joyoo moo nyid nghoid loug we' Yoem: moo" bo Aseing ngoo kangso' dei Mangsoo nghoid ziyo' dayhang: ti" nyangnu" gi nyangnu" zooshang: yiri ayo" khyoid yu wa. Nyangnu" nya: kangso' ri kyeing" yo" khyoid yu wigi hau: mougmyid gi dain" pyoid yoo bue" lo" byug wa.
17 Anghoid lang" ngoo gi byu yo' gougnyhoug joem ri dakhyoo" ti" kyeing" jhoid yu pyam wa shid re" hau: mougmyid khyoo: meing: zain: ziri yo' phyo' shoin' pyam da" gyi joem ri nhang: kaid byid: wa.
18 Hau: byu soem" yug hau: joyoo moo nyid nghoid loug we' yoem: moo" bo Aseing ngoo kangso' dei Mangsoo nghoid ziyo' dayhang: ti" nyangnu" gi nyangnu" zooshang: yiri lang" ayo" khyoid yu wa. Nghoid loug nyangnu" nya: kangso' ri kyeing" yo" khyoid yu wa.
19 Ngoo gi hau: mougmyid khyoo: lang: yoem" noo daja: ri nhang: kaid byid: lho: nga" nheig yo: zi wigi kangso' myoo" sho' ri yu pyam wa. Byu yo' gougnyhoug myoo" sho' ri said pyam nghoid rigi
20 Noa- Danela- Yoba bang: houg: moo nyid boem nghoid loug we' yoem: moo" bo Aseing ngoo kangso' dei da" Mangsoo nghoid ziyo' dayhang: ti" nyangnu" gi nyangnu" da" nya: zooshang: yiri lang" ayo" khyoid yu goo" wa. Nyangnu" da" ge khyoo: gi nyangnu" nya: kangso' joem ri za: dayo" khoid yu wa.
21 He: zigi yoem: moo" bo Aseing tid nyid zi nghoid. Ngoo gi byu yo' gougnyhoud joem ri dakhyoo" za: said pyam wa shid re" nga" da" age thang yooboo dam myid: ja: nghoid da" meing: byo, khyoo:- phang" khoug- gougnyhoug lam" yo' noophyoo" joem ri Yerusalem khyoo: nhang: kaid byid: wa.
22 Dayham" ashid: lhoo: nyid deing wigi nyangnu" zooshang: yiri khyoid yu nghoid rigi nyangnu" re" jhang re" loo wa ayo, ri yu" nyid we'. Nyangnu" khayhi' akhyeing" ziri myid boin: we'. Houg: lho: ngo wigi Yerusalem adang moo yu loo byid: da" yooboo dam gi jo ziri loem ge'.
23 Hau: thang: nang gi ngoo koid da" ja: khang" moo" shid re" ge da" akhyoo" jo, ziri se' loo wa. Yoem: moo" bo Aseing tid bye:.