1 ?Akhid" nyid" ngoo nanu" ri byid: da" tarha" joem dangain" ri dang: zung" cang koid nyid ge'. Houg: lang" nanu" gi kangso' dei nyid wigi myo: loug: loo goo" wa. Nanu" phoug" phyid" yiri Aseing wigi dangsoo" byid: to" da" mungdain: ri yo" seing: yu loo goo" wa. 2 Nyang: gi nanu" cikoid wa soin' nyid go" da" khyoo: we' nya: amyeing" dang: joem ri nanu" cang acang ziri myang: si wa shid re" nanu" Aseing Mangsoo gi nanu" ri jham" ca: yu" wa shid re" yau: khi" ri nhang: kaid lho: dain" pyoid yoo khyo" so" lid: da" he: gyung: sheing: khyoo: moo myid: xi: zain nanu" ri khasu" shu" lo ziri myid boin: ge'. 3 Nyang: gi nanu" ri zooyoid nhang: da:. Hau: thang: nanu" yo' nanu" da" phoug" phyid" yi shid phyang" khanham we' azo: yu" da" zoo: noem Manna nanu" ri byid: zhoo" bye:. Nyang: hid: su" koid zigi byu gi zooyho' yo' za: kangso' dei nyid zi anghoid. Aseing tid da" mungdang: ja: khang" moo" yo' za: kangso' dayo" dei nyid khyoo: ri nanu" ri jhau" byid: wa shid re" koid zi nghoid. 4 Hau: myid: xi: zain agyoo: moo nanu" byimi joem we' ajeig nanu" khyid: joem we' ayam: nghoid da:. 5 Nya: phoo gi nya: zoo: yiri tarha" khyoo: shid to" yhang: ti" nanu" Aseing Mangsoo we' nanu" ri jo da" khyoo: ri shid wigi yooboo dam byid: khyoo: ri myid boin: ge'. 6 Houg: yoomo nanu" ri Aseing wigi amyeing" byid: to" khyo" koid ge'. Nya: tarha" joem khyo" wigi kangso' dei lho: nyang: ri ngi: shab byid: ge'. 7 Nanu" Aseing Mangsoo gi nanu" ri mougmyid nu" da" mung" khyoo: shu" loo nyid bye:. Hau: mung" gi gyid lang joem yo' gyid bug joem bouggung lang: khung" cang gyid thu nyid da" mung" 8 hau: mung" gi yoono, zabyid shi" lafoem shi" lamei shigam zhainloin: shi" yo' byooyhid: joem thu da" mung" nghoid da:. 9 Houg: moo nanu" khanham we' zoo ayoid goo" wa. Khanham we' amyung goo" wa. Hau: mung" mo lug pyo' cang joto' yo' boem moug: cang gyid: ni shoug" du: yu wa nghoid. 10 Nanu" zoo: nau ja: dangain" yo" loo goo" wa. Houg: lho: nanu" ri nyang: wigi byid: to" da" hau: mougmyid nu" da" mungdain: yoomo nanu" Aseing Mangsoo ri nanu" jeju" boin: so" loo goo" wa.

11 Nanu" Aseing Mangsoo ri nanu" ato" myid wa shid re" zid" nyid ge'. Akhid" nyid" ngoo nanu" ri byid: da" nya: tarha" daja: ri we' cang wa shid re" ato" myhid goo". 12 Nanu" zoo: nau ja: dangain" yo" lo ziyo' nyid wa shid re" yhoem: gi joem yo" koid lang" 13 nanu" nu: yo' yang- nanu" ngei yo' sheing: gootu: jonu" dangain" myo: je: lo: lang" 14 nanu" join bue" nyid da" Egutu mung" mo nanu" ri khyoid yu da" nanu" Aseing Mangsoo ri to" myhid pyam lho: nghoid boin: da" myid aboo wa shid re" zid" nyid ge'. 15 Nyang: gi nanu" ri damung" dadain: gyi: lho: dug thain: da" lhangmyu yo' gung goug" nyid da" gyoug pho" da" dain" pyoid yoo khyo" nanu" ri shu" lid loo bye:. Hau: gyid ajo, moug: kyug moo nyang: gi nanu" shid re" lugzeing mo gyid yau thu loo nhang: bye:. 16 Dain" pyoid yoo moo nanu" phoug" phyid" yi khanham we' ashau" zo: yu" boem da" zoo: noem Manna nanu" ri nyang: byid: zho" da:. Lo" thang moo nyang: gi nanu" ri ge da" ja: yo' mainkaid byid: wa shid re" nyang: gi nanu" ri jham" yu" wa shid re" yau: khe" kyi" khyeug nhang: kaid bye:. 17 Houg: yoomo nanu" gi nanu" nya: yoem: so' yo' yoem: u" wigi nanu" nyang: koid lho: jonu" yo" zi nghoid ein: khanham we' age' myid wa. 18 Nanu" ri jonu" yoo" wa yoem: so' byid: da" yug gi nanu" Aseing Mangsoo nghoid ziri myid boin: ge'. Nyang: hid: su" koid zigi nanu" phoug" phyid" yi yo' nyang: koid to" da" dang: theing adang mo nyang: akhid" nyid" ju" sho' dang: zung" nyid shi" yoomo nghoid. 19 Nanu" Aseing Mangsoo ri khanham we' ato" myhid goo". Gootu: yu phara" joem ri no' wa yo' nyangnu" ri dei byid: wa shid re" alheing: loo" goo". Nanu" hougsu" koid boem nghoid rigi nanu" gi gi nyang: said toem" pyam zi shau" boem ri" goo" wa ein: akhid" nyid" ngoo nanu" ri tid poin" byid: bye:. 20 Nanu" gi Aseing ri atam" gyoo: nghoid rigi nanu" shid khyoo: jhen" yhe: lo" boem uri nyang: wigi said toem" pyam da" byumyu" yi yhang: ti" nanu" we' said toem" pyam zi shoug" loo goo" wa.