7
(Thu 34:11-16)
1 Nanu" Aseing Mangsoo gi nanu" yhe: nyid seing: yu wa nghoid da" mungdain: khyoo: nanu" ri shu" vang yhe: wigi nyang: gi byumyu" myoo: sho' ri houg: mo khaid thu pyam byid: loo wa. Nanu" shid vhu" khyoo: jhen" yhe: lo" uri nanu" tho' je myo: lho: yoem: je bo da" Hiti- Girgashi- Amori- Khanan- Perizi- Hivi- Yebusi ga: da" byumyu" nyhed myu" ri nyang: khaid thu pyam wa zi nghoid.
2 Nanu" Aseing Mangsoo gi nyangnu" ri nanu" lo, khoug: moo to" wigi nanu" gi nyangnu" ri oung: pyam lang" nanu" gi nyangnu" ri dangain" said pyam ca" wa. Nyangnu" ri bidnoem akoid goo". Nheig khyeug myid aci: shug goo".
3 Nyangnu" mo dayug ri we' lo, axo' goo". Nyangnu" mo dayug ri we' nanu" nya: zoo: yiri lo, axo' nhang: goo".
4 Ciwim gari nyangnu" gi nanu" zoo: yi gootu: yu phara" yiri no' wa shid re" Aseing jang" mo shu" phang: lo" boem wa. Hougsu" bue" nghoid rigi Aseing gi nanu" ri nheig yo: wigi nanu" ri dalheing: dam said toem" pyam wa zi nghoid
5 Houg: yoomo nyangnu" da" phoin: phyo' pyam ge'. Nyangnu" da" gyeung" shang: lug zeingboung: joem ri adu du baid khyau" pyam ge'. Nyangnu" da" Ashera yu phara" myhi' da" ladoo" zeing joem ri phyed khyo' pyam lho: nyangnu" yu phara" lhoo: joem ri nghe' pyam ge'.
6 Hid: su" koid ge'. Ciwim gari nanu" gi nanu" Aseing Mangso wigi seing: nyid zi nghoid. Mougmyid tho' mo byumyu" dangain" mo nanu" ri nyang: gi nya: goo" ki" lid byumyu" khyo" khyen: too" bye:.
7 Aseing gi nanu" ri byumyu" gootu: tho' je myoo: yoomo nanu" ri jheddab ziyo' khyen: yu zi anghoid. Nanu" gi mougmyid tho' moo nge thang da" byumyu" nghoid ago".
8 Nghoid loug we' Aseing gi nanu" ri jheddab wigi nanu" phoug" phyid" yiri byid: to" da" dangsoo" ri jhug zug yoomo nghoid da:. Houg: yoomo nyang: gi nanu" ri nya: yoem: so' moo" wigi khyoid yu lho: Egutu khokham ri join koid byid: nyid jang" mo loid byoin nhang: bye:.
9 Nanu" Aseing Mangsoo gi Mangsoo nghoid ziyo' nyang: gi dang: zung" nyid ziri boin: nyid ge'. Nyang: gi nya: dang: theing ri ci: wa nghoid wigi nyang: ri jheddab lho: nya: amyeing" dang: joem ri tam" gyo: mo, ri byuxeig khyeing" moin ju" sho' abei abyo, da" jheddab myid ri ci: shug wa zi nghoid.
10 Nghoid loug we' nyang: ri ngheing" bang: ri yooboo dam byid: wa shid re" gi ane" nyid nghoid da:.
11 Houg: yoomo akhid" nanu" ri jhau" byid: bye: gu: ri cang nyid ge'. Akhid" nyid" ngoo nanu" ri byid: bye: da" tarha" joem dangain" ri cang nyid ge'.
(Tid 28:1-14)
12 ?Nanu" he: amyeing" dang: joem ri tam" gyo: wigi hau: joem ri dang: zung" cang yhe: nghoid rigi nanu" phoug" phyid" yiri nyang: dangsoo" byid: to" yhang: ti" nanu" Aseing Mangsoo gi nanu" yo' to" da" nya: dang: theing ri xo' ci: wigi nya: abei abyo, da" jheddab myid ri nanu" ri ci: shug byid: wa.
13 Nyang: gi nanu" ri jheddab wa nghoid wigi nanu" ri mainkaid byid: wa. Houg: lang" nanu" gi myo: loug loo wa nghoid lho: zoo: du myoo: sho' yoo" wa. Nyang: gi nanu" yoothung" ri mainkaid byid: wa. Houg: lang" nanu" gi gug shi" mei: shi" zabyid yo' zhainloin: xu: joem yo" loo goo" wa. Houg: lho: nyang: gi nanu" da" nu: yo' yang joem ri: myo: loug je: be: loo nhang: wa. Nyang: nanu" ri byid: wa ga: nanu" phoug" phyid" yiri dangsoo" byid: to" da" mungdain: moo nyang: gi nanu" ri he: mainkaid jeju" dangain" gam khain" byid: wa.
14 Mougmyid tho' moo nanu" yhi' mainkaid jeju" yo" zi hang" we' anyid loo. Nanu" we' nanu" gougnyhoug joem we' boug dung: boug thoin" abue" wa.
15 Aseing gi noo aja: ja: mo nanu" ri goem loem byid: wa. Houg: lho: nyang: gi Egutu mung" moo nanu" nyid boem shi" uri bue" da" gyoug pho" noo daja: ri we' nanu" moo abui" nhang: wa. Nghoid loug we' nanu" gyivoo yi atho' moo koem' gi hau: joem dangain" ri bui" nhang: wa.
16 Nanu" Aseing Mangsoo wigi nanu" yoem: so' khoug: moo kaid to" da" byumyu" khang" moo" ri said toem" pyam ge'. Houg: bang: ri nheig khyeug myid aci: shug goo". Houg: bang: da" yu phara" ri acoung" apid ano' goo". Hougsu" koid zigi shid: khyoo: nghoid wa.
17 ?Hau: byumyu" yigi nanu" tho' je myo: wigi nyangnu" ri ayo" khaid thu ein: nanu" nya: gung ri atid goo".
18 Nyangnu" ri agyug goo". Nanu" Aseing Mangsoo gi Egutu khokham yo' nya: byu yi dangain" ri khasu" koid ziri myid boin: ge'.
19 Nanu" myojid" yo' nyang: shau" myang bye: da" gyoug pho" lang: yoem" noo- mau" pho" alhoo: again joem yo' mau" pho" lo, moo" joem yo' nanu" Aseing Mangsoo gi yoem: so' moo" yo' yoem: vhu" yo' nanu" ri loid byoin nhang: kaid ziri myid boin: ge'. Egutu byumyu" yiri nyang: said pyam ziyo' dakhyoo" ti" akhid" nanu" gyoug nyid boem da" byumyu" dangain" ri we' nyang: said toem" pyam wa zi nghoid.
20 Nyang: gi nyangnu" phung: moo byoodain byooshoo" pho" zi bui" nhang: wigi loid byoin lho: goug" nyid bang: ri we' nyang: said toem" pyam ri" wa zi nghoid.
21 Houg: yoomo hau: byumyu" yiri agyug goo". Nanu" Aseing Mangsoo gi nanu" yo' dage" nghoid. Nyang: gi phung gyi: Mangsoo nghoid lho: gyoug phoug" moin: su: nghoid.
22 Nanu" shid khyoo: jhen" yhe: uri he: byumyu" yiri zo" zo" mo nyang: khaid thu pyam wa. Nanu" gi nyangnu" dangain" ziri dalheing: dam za: gi ayo" said toem" pyam goo" wa. Ciwim gari nanu" hougsu" koid nghoid rigi siyoo gougnyhoug lam" joem myo: re" wigi nanu" ri kyug zo: boem wa.
23 Aseing gi nanu" gyivoo ri nanu" da" yoem: so' khoug: moo to" to" wigi nyangnu" shid: loo" shoug" bidnyid ju" sho' nyangnu" ri byoodain byooshoo" bui" nyhang: wa.
24 Nyang: gi houg bang: khokham yiri nanu" yoem: so' khoug: moo to" too" wa. Nanu" houg bang: ri said pyam wigi nyangnu" we' to" myid pyam goo" wa. Nanu" ri hang" we' ayo" toem goo" wa. Nanu" gi yugkhang" moo" ri said toem" pyam goo" wa.
25 Nyangnu" yu phara" soolhoo: ri nghe' pyam ge'. Hau: joem adang moo dab da" ngei anghoid lang" sheing: ri vho: da" myid aboo goo". Nanu" shid re" hau: zi joem ri ayu goo". Nanu" yu nghoid rigi shid: shoug" wa zi nghoid. Ciwim gari Aseing gi yu phara" soolhoo: no' ziri ngheing" nyid da:.
26 He: yu phara" soolhoo: joem mo daja: ri we' nanu" yhoem: khyoo: aci: loo goo". Anghoid lang" nyangnu" adang mo nheing" khoin" yo' dakhyo" za: nanu" dang moo we' zang" loo wa. Nanu" gi he: yu phara" soolhoo: joem ri ngheing" ziyo' aphoug" akhyoid koid pyam ca" da:. Ciwim gari nyangnu" gi Aseing da" nheing" khoin" zang" mo, nghoid da:.